قازاقستاندىقتار سولتۇستىك وڭىرلەردەن كوشۋدى جالعاستىرۋدا - ەڭبەك مينيسترلىگى

مينيستر ورىنباسارىنىڭ مالىمەتىنشە، 2050-جىلعا قاراي حالىق سانى 27,5 ميلليون ادامعا جەتەدى دەپ كۇتىلۋدە. الايدا ءوسىم بارلىق وڭىردە بىركەلكى بولمايدى.

- حالىق سانىنىڭ نەگىزگى ءوسىمى نەگىزىنەن مەگاپوليستەردە بايقالادى، ياعني كوشى-قون ەسەبىنەن. وتكەن جىلدىڭ وزىندە كوشى-قون ارقىلى مەگاپوليستەردەگى حالىق سانى 127 مىڭ ادامعا ارتتى. ال سولتۇستىك، ورتالىق جانە شىعىس وڭىرلەردە حالىق سانىنىڭ ازايۋ ءۇردىسى جالعاسۋدا. بۇعان تابيعي ءوسىمنىڭ تومەن بولۋى جانە كوشى-قون اسەر ەتۋدە، - دەدى ولجاس انافين سەنات قابىرعاسىندا وتكەن ءىس-شارادا.

ونىڭ ايتۋىنشا، سولتۇستىك وڭىرلەردە تۋۋ كورسەتكىشى تومەن، اتاپ ايتساق، سولتۇستىك قازاقستان وبلىسىندا 1000 ادامعا 9,7 تۋۋ، قوستاناي وبلىسىندا – 11، ال قازاقستان بويىنشا ورتاشا كورسەتكىش - 18,1 تۋۋ (2024-جىل).

سونىمەن قاتار سولتۇستىك وڭىرلەردە ءولىم كورسەتكىشى جوعارى، سولتۇستىك قازاقستان وبلىسىندا - 1000 ادامعا 11,5، قوستاناي وبلىسىندا – 10، ال ەل بويىنشا ورتاشا كورسەتكىش - 6,6.

اتالعان وڭىرلەر بويىنشا حالىقتىڭ ورتاشا جاسىنا كەلسەك، سولتۇستىك قازاقستان وبلىسىندا - 37 جاس، ورتالىق جانە شىعىس وڭىرلەردە - 39 جاس، ال ەل بويىنشا ورتاشا جاس - 32.

- كوشى-قون تۇرعىسىنان وتكەن جىلى وڭ وزگەرىس تەك الماتى جانە ماڭعىستاۋ وبلىستارىندا، سونداي-اق استانا، الماتى جانە شىمكەنت قالالارىندا تىركەلدى. ال سولتۇستىك وڭىرلەردەن حالىق كوشۋدى جالعاستىرۋدا. 2015-جىلدان بەرى سولتۇستىك قازاقستان وبلىسىنان 51 مىڭ ادام، قوستاناي وبلىسىنان 52 مىڭ ادام كوشىپ كەتكەن. بۇل ءۇردىس سولتۇستىك وڭىرلەردەگى حالىق قۇرىلىمىنىڭ رەسپۋبليكاعا قاراعاندا ايتارلىقتاي وزگەشە بولۋىنا الىپ كەلدى، - دەپ ءتۇسىندىردى ول.

زەينەت جاسىنداعى حالىقتىڭ ۇلەسى سولتۇستىك وڭىرلەردە 2024-جىلى %17 دى قۇرايدى، ال قازاقستان بويىنشا بۇل كورسەتكىش - %11. 2050-جىلعا قاراي بۇل كورسەتكىش سولتۇستىك وڭىرلەردە %22 عا، ال رەسپۋبليكا بويىنشا %14 عا دەيىن ءوسۋى بولجانىپ وتىر.

ەڭبەككە جارامسىز جاستاعى جاستاردىڭ ۇلەسى سولتۇستىك وڭىرلەردە - %22، ال قازاقستان بويىنشا ورتاشا كورسەتكىش - %30. ەگەر قازىرگى ۇردىستەر ساقتالسا، 2050-جىلعا قاراي بۇل كورسەتكىش سولتۇستىكتە %19 عا، ال قازاقستان بويىنشا %29 عا دەيىن تومەندەۋى مۇمكىن.

- بۇل جاعداي ايماقتىق تەڭگەرىمسىزدىكتىڭ كۇشەيۋىنە الىپ كەلۋى مۇمكىن، - دەپ تۇيىندەدى ۆيتسە-مينيستر.

ەسكە سالا كەتسەك، بىلتىر قاراشادا سولتۇستىك قازاقستاننان ون ايدا 21 مىڭ ادام كوشىپ كەتكەن.

بۇگىن سەناتتىڭ الەۋمەتتىك- مادەني دامۋ جانە عىلىم كوميتەتىندە «دەموگرافيالىق ءوسۋ - ۇلتتىڭ ستراتەگيالىق ارتىقشىلىعىنىڭ نەگىزى» تاقىرىبىندا بىلتىر وتكەن ۇكىمەت ساعاتىندا قابىلدانعان ۇسىنىمداردى ىسكە اسىرۋ قورىتىندىلارىن تالقىلاۋعا ارنالعان كەڭەيتىلگەن وتىرىس ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى