قازاقستاندىقتار SIM- كارتانى تىركەۋدە بيومەتريادان وتۋگە مىندەتتەلەدى
شەتەلدىك الاياقتارعا SIM- كارتا تىركەۋگە كومەكتەسكەن قازاقستاندىقتارعا قۇقىقتىق جاۋاپكەرشىلىك ەنگىزىلەدى.
بۇل تۋرالى ق ر ىشكى ىستەر ءمينيسترىنىڭ ورىنباسارى يگور لەپەحا پارلامەنتتە ايتتى، دەپ حابارلايدى Kazinform.
«كوپتەگەن ادامدار «اۋىستىرىلاتىن نومىرلەردى بۇعاتتاۋ جۇيەسى بولسا، الاياقتار شەتەلدەن قالاي قوڭىراۋ شالا الادى؟» دەگەن سۇراق تۋىنداۋى مۇمكىن. بۇعان ەكى سەبەپ بار. ءبىرىنشىسى - ولار قازاقستاندىق ۇيالى بايلانىس كومپانيالارىنىڭ نومىرلەرىن پايدالانا باستادى. سول باياعى «دروپەرلەر» اقىلى تۇردە ەلەكتروندى SIM- كارتالاردى ءوز اتتارىنا تىركەپ، ونى الاياقتارعا بەرەدى. وسىلايشا قىلمىسكەرلەر WhatsApp قوسىمشاسىندا تىركەلەدى. ونى ىسكە قوسقان سوڭ، الاياقتار جابىرلەنۋشىلەرگە مەسسەندجەر ارقىلى قوڭىراۋ شالادى، مۇنداي جاعدايدا ولاردىڭ ورنالاسقان جەرىن انىقتاۋ قيىندايدى»، - دەپ ءتۇسىندىردى ءى ءى م وكىلى.
وسى ۋاقىتقا دەيىن ابونەنتتىك ءنومىردى باسقا ادامدارعا زاڭسىز بەرگەنى ءۇشىن جاۋاپكەرشىلىك بولعان جوق. بۇل ءىس جۇزىندە وسىنداي ارەكەتتەردى كەدەرگىسىز ىسكە اسىرۋعا مۇمكىندىك بەردى. قازىرگى ۋاقىتتا بۇل ولقىلىق جويىلۋدا. اكىمشىلىك قۇقىق بۇزۋشىلىق تۋرالى كودەكستىڭ 637-بابى (قازاقستان رەسپۋبليكاسىنىڭ بايلانىس سالاسىنداعى زاڭناماسىن بۇزۋ) وسىنداي ارەكەتتەر ءۇشىن قۇقىقتىق جاۋاپكەرشىلىكتى كوزدەيتىن 18-تارماقپەن تولىقتىرىلادى.
سونداي-اق باقىلاۋ شارالارىن كۇشەيتۋ ءۇشىن سيفرلىق دامۋ مينيسترلىگى «بايلانىس قىزمەتتەرىن كورسەتۋ قاعيدالارىنا» تولىقتىرۋلار جوباسىن ازىرلەدى، وعان سايكەس تەلەفون نومىرلەرىن تىركەۋ كەزىندە ازاماتتار «بيومەتريادان» وتۋگە مىندەتتى بولادى. بۇل شارا ازاماتتىق جاۋاپكەرشىلىكتى ارتتىرادى جانە ۇيالى بايلانىس قىزمەتتەرىن پايدالانۋدا ءتارتىپ ورناتۋعا مۇمكىندىك بەرەدى.
ايتا كەتەيىك، بۇگىن ماجىلىستە «حالىقتىڭ شامادان تىس كرەديت الۋىن ازايتۋ جانە قارجى ساۋاتتىلىعىن ارتتىرۋ» تاقىرىبىندا پارلامەنت تىڭداۋى ءوتتى.
بۇعان دەيىن ي. لەپەحا شەتەلدىك الاياقتاردىڭ قوڭىراۋلارى بۇعاتتالعانىن، الايدا قازاقستاندىقتاردىڭ وزدەرى ازداعان سىياقى ءۇشىن الاياقتارعا جاردەم بەرىپ وتىرعانىن ايتقان ەدى.
