قازاقستاندىقتار قاي ەلدىڭ الاياقتارىنا ءجيى الدانادى
استانا. KAZINFORM - ىشكى ىستەر مينيسترلىگى كريمينالدىق پوليتسيا دەپارتامەنتى كيبەرقىلمىسقا قارسى كۇرەس ورتالىعىنىڭ باستىعى جاندوس ءسۇيىنباي ورتالىق كوممۋنيكاتسيالار قىزمەتىندە وتكەن بريفينگىدە قازاقستاندىقتاردىڭ قاي ەلدىڭ الاياقتارىنا ءجيى الداناتىنىن ايتتى.
«بۇعان دەيىن ينتەرنەت الاياقتىققا بايلانىستى وندىرىسكە الىنعان 158 مىڭ ءىستىڭ 93 مىڭى اشىلماي قالعانى تۋرالى مالىمەت ايتىلدى. ونىڭ سەبەبى نەدە؟»- دەپ سۇرادى جۋرناليست.
ىشكى ىستەر مينيسترلىگىنىڭ وكىلى مۇنىڭ سەبەبىن قازاقستان ازاماتتارى شەتەلدىكتەرگە ءجيى الداناتىنىمەن بايلانىستىردى.
«ءيا، شىنىمەن دە اقپارات تەحنولوگيالارىن پايدالانۋ ارقىلى جاسالاتىن قىلمىستاردىڭ اشىلۋىنا بايلانىستى ونداي پروبلەمالىق ماسەلەلەر بار. ونىڭ ىشىندە قىلمىسكەرلەر شەتەلدەن ارەكەت ەتەدى. سوندىقتان ولاردى اشۋدى قيىندىقتار تۋىندايدى. ويتكەنى تىركەلگەن ءىس بويىنشا قوڭىراۋ تۇسكەن ەلدەرگە رەسمي ساۋال جولدانادى»، - دەگەن جاندوس ءسۇيىنباي قازاقستاندىقتارعا قاتىستى ينتەرنەت الاياقتىق فاكتىسى ءجيى تىركەلەتىن ەلدەرمەن ءوزارا ءىس- قيمىل تۋرالى كەلىسىمدەر جاسالىپ جاتقانىن اتاپ ءوتتى.
ب ا ق وكىلى قازاقستاندىقتار قاي ەلدىڭ الاياقتارىنا ءجيى الداناتىنىن ناقتىلادى.
«قازاقستان ازاماتتارى ورىس ءتىلدى بولعاندىقتان كوبىنەسە كورشىلەس ەلدەردىڭ الاياقتارىنا ءجيى الدانادى. مىسالى، ۋكراينادا وسىنداي توپتار ۇستالدى. باسقا دا كورشىلەس ەلدەر بار. اعىلشىن ءتىلدى قازاقستاندىقتار قىتاي، ءۇندىستان سياقتى ەلدەردىڭ الاياقتارىنا الدانادى. نەگىزى الاياقتاردىڭ كوبى ۋكراينادان بايلانىسقا شىعادى»، - دەدى ءى ءى م وكىلى.
