قازاقستاندىقتار ەندى ياندەكس ىزدەۋگە انا تىلىندە داۋىستىق سۇراۋ سالا الادى
استانا. KAZINFORM -ياندەكس ىزدەۋ قازاق تىلىندەگى داۋىستىق سۇراۋلاردى تۇسىنە باستادى.
ەندى قولدالانۋشىلار سۇراقتاردى داۋىسپەن ورىس تىلىندە عانا ەمەس، قازاق تىلىندە دە قويا الادى. جاڭا مۇمكىندىك ياندەكس ۆەب شولعىش جانە ياندەكس اليسامەن بىرگە موبيلدى قولدانبالارىندا قولجەتىمدى.
ناۋرىز ايىندا 12 ميلليون استام قازاقستاندىق ياندەكس ىزدەۋدى قولداندى، ونىڭ 4,5 ميلليون موبيلدى قولدانبا ارقىلى. سمارتفوندا داۋىسپەن سۇراقتار قويۋ، ءماتىن تەرۋدەن گورى ىڭعايلى. قارىم- قاتىناس ءتىلىن الدىن الا تاڭداۋدىڭ قاجەتى جوق. ياندەكس ادام ءتىپتى ورىس جانە قازاق تىلدەرىن ارالاستىرىپ ايتسا دا تۇسىنەدى - مىسالى، «قوجا احمەت ياساۋي ماۆزولەي قاي جەردە ورنالاسقان؟» . داۋىستىق سۇراق قويۋ ءۇشىن، قولدانبانىڭ ىزدەۋ جولاعىنداعى ميكروفون بەلگىشەسىن باسۋ كەرەك.
قازاق تىلىندەگى سۇراۋ سالۋلار بويىنشا قولدانۋشىلار ۇلتتىق تىلدەگى قۇجاتتاردى عانا ەمەس، سونىمەن قاتار قازاق تىلىنە نەيروجەلىلىك اۋدارماداعى اعىلشىن جانە ورىس تىلىندەگى ماتەريالداردى دا كورەدى. نەيرواۋدارمانى ەنگىزۋ ارقىلى ىزدەۋدە قازاق تىلىندەگى پايدالى ماتەريالداردىڭ سانى 15 ميلليوننان اسىپ ءتۇستى.
«ءبىز قازاق تىلىندەگى ىزدەۋ ونىمدەرىن جوسپارلى تۇردە جاسايمىز: بۇل قولدانۋشىلار ءۇشىن ىڭعايلى جانە ۇلتتىق ءتىل مەن مادەنيەتتىڭ دامۋىنا ىقپال ەتەدى. قازاق تىلىندە داۋىستىق سۇراۋلاردى تانۋ - بۇل باعىتتاعى تاعى ءبىر قادام»، - دەيدى قازاقستانداعى ىزدەۋدىڭ اعا مەنەدجەرى الماز سادەنوۆ.
داۋىستىق سۇراۋلاردى تانۋ ءۇشىن ياندەكس قازاقستان قازاق ءتىلى ءۇشىن بەيىمدەلگەن SpeechKit تەحنولوگياسىن قولدانادى. داۋىستىق سۇراۋ ماتىنگە اۋدارىلادى، سودان كەيىن ىزدەۋگە جىبەرىلەدى. ناتيجەسىندە قولدانۋشى سۇراقتى قولمەن جازعانداي جاۋاپ الادى.
ياندەكس قازاقستان - ماشينالىق وقىتۋ جانە نەيروجەلى نەگىزىندەگى ونىمدەر مەن سەرۆيستەر جاسايتىن، تەحنولوگيالىق كومپانيا. كومپانيا قولدانۋشىلاردىڭ ءومىرىن جاقسارتىپ جانە قازاقستاندا سيفرلىق ورتانىڭ دامۋىنا باعىتتالعان يننوۆاتسيالىق تەحنولوگيالاردى ازىرلەۋمەن جانە ەنگىزۋمەن اينالىسادى. ەلىمىزدە قازىرگە تاڭدا ىزدەۋ، قالالىق، بۇلتتىق جانە ويىن- ساۋىق سەرۆيستەرى جۇمىس جاسايدى، سونىمەن قاتار كومپانيا ءبىلىم بەرۋ جانە الەۋمەتتىك جوبلاردى دا دامىتۋدا.
