قازاقستاندىقتار ەندى اسپانداعى شوقجۇلدىزدارعا ءوز ەسىمدەرىن بەرە المايدى
الماتى. KAZINFORM - اسپانداعى جۇلدىزدى ءوز اتىڭىزبەن اتاۋ تۋرالى ۇسىنىس كوپشىلىكتى قىزىقتىرادى. بۇعان حالىقارالىق استرونوميالىق وداق رۇقسات بەرە مە، Kazinform اگەنتتىگىنىڭ ءتىلشىسى انىقتاپ كوردى.
قازىر عالامتوردا جاڭا جۇلدىز اتاۋلارىن قوسۋ قىزمەتتەرىن ۇسىناتىن سايتتار كوپ.
بۇل قىزمەتتەر قازاقستاندا دا قولجەتىمدى. وسى جارنامالاردىڭ بىرىندە قۇنى 12500 تەڭگەدەن 250000 تەڭگەگە دەيىن وزگەرەتىن سىيلىق جيىنتىقتارى مەن قۇنى 7 ميلليون تەڭگەلىك ەكسكليۋزيۆتى VIP سىيلىق ۇسىنىلعان. تاپسىرىس قۇنى ەكى قۇرامداس بولىكتىڭ نەگىزىندە قالىپتاسادى: سىيلىق جيىنتىعىنىڭ باعاسى ونىڭ جارىقتىعىنا بايلانىستى بولادى.
ماسەلەن، «شىعىس جۇلدىزى» سىيلىق جيناعىنىڭ باعاسى - 70000 تەڭگە.
مۇنداي سىيلىققا تاپسىرىس بەرۋ وتە قاراپايىم. الدىمەن، «جۇلدىز ساتىپ الۋ» تۇيمەسىن باسۋ كەرەك، سودان كەيىن جۇلدىزدىڭ ولشەمىن تاڭداپ، تىركەۋ ءۇشىن قاجەتتى دەرەكتەردى تولتىراسىز. شوقجۇلدىزدى، جۇلدىزدىڭ اتىن جانە ءوزىڭىزدىڭ تەگىڭىزدى كورسەتەسىز.
وسىدان كەيىن تاپسىرىستى ورىنداۋ ءۇشىن كومپانيا قىزمەتكەرى سىزگە حابارلاساتىن بولادى.
الايدا، ۆ. گ. فەسەنكوۆ اتىنداعى استروفيزيكا ينستيتۋتى ديرەكتورىنىڭ ورىنباسارى راشيت ۆاليۋللين، مۇنداي ۇسىنىستار اياسىندا بەرىلگەن اتاۋلاردىڭ رەسمي نەمەسە زاڭدى مارتەبەسى جوق ەكەنىن ايتتى.
حالىقارالىق استرونوميالىق وداق مۇنداي كەلىسىم- شارتتاردى مويىندامايدى، رەسمي جۇلدىزدار كاتالوگتارى وبەكتىلەردى تەك ساندىق اتاۋلارمەن عانا بەلگىلەيدى.
- اسپان دەنەلەرىنە اتاۋدى الەم استرونومدارىن بىرىكتىرەتىن حالىقارالىق استرونوميالىق وداق قانا بەرە الادى. جۇلدىزدارعا جاڭا اتاۋلار بەرىلمەيدى. استرونومدار اشقان كومەتالارعا عانا اتاۋ بەرىلەدى. جۇلدىزدارعا رۇقسات جوق. ارينە، اتى جوق جۇلدىزدار بار، ءبىراق ولار ساندارمەن بەلگىلەنەدى. ءبىزدىڭ گالاكتيكادا ميللياردتاعان جۇلدىز بار جانە ولاردىڭ بارلىعىن كورۋ مۇمكىن ەمەس. ويتكەنى ولاردىڭ باسىم بولىگى تىم كۇڭگىرت، - دەپ اتاپ ءوتتى ول.
سپيكەردىڭ سوزىنشە، قازىر جۇلدىزداردى رەسمي تىركەيتىن زاڭدى كوممەرتسيالىق اگەنتتىكتەر جوق. ەشبىر جۇلدىزدار كاتالوگى، وبسەرۆاتوريا نەمەسە عىلىمي قوعامداستىق جەكە ادامداردىڭ جۇلدىزدى «مەنشىكتەپ» الۋ قۇقىعىن مويىندامايدى.
- عالامتوردان ءتۇرلى جارنامالاردى تابۋعا بولادى، ءبىراق ولاردىڭ رەسمي ستاتۋسى جوق. مۇنداي كومپانيالار بەرەتىن سەرتيفيكاتتار ەش ماڭىزى بولمايدى. بۇل ويىن- ساۋىققا كوبىرەك ۇقسايدى. ەشبىر رەسمي جۇلدىزدار كاتالوگى مۇنداي جازبالاردى مويىندامايدى. بۇل ۇيىمدار وزدەرىنىڭ كاتالوگتارىن جاسايدى. بۇل يدەيانىڭ اۆتورى قازاقستان بولماسا دا، ءبىزدىڭ ەلدە بەلسەندى تۇردە جۇزەگە اسىپ جاتىر. ءبىزدىڭ وبسەرۆاتورياعا ادامدار ءجيى ەكسكۋرسياعا كەلىپ، ءوز جۇلدىزىن كورسەتۋدى سۇرايدى، ءبىراق ءبىز بۇل جۇلدىزدىڭ ەش جەردە تىركەلمەگەنىن تۇسىندىرەمىز، - دەپ اتاپ ءوتتى ر. ۆاليۋللين.
قازىر KAZINFORM اگەنتتىگى قازاقستانداعى جالعىز وبسەرۆاتوريا تۋرالى ماتەريال دايىنداپ جاتىر.
الما مۇقانوۆا
اۆتور
