قازاقستاندىقتار كيىپ جۇرگەن شۇلىقتىڭ 80 پايىزى شەتەلدىكى - دەپۋتات
استانا. KAZINFORM - ءماجىلىس دەپۋتاتى قايرات بالابيەۆ پرەمەر-مينيسترگە جولداعان دەپۋتاتتىق ساۋالىندا شۇلىق وندىرەتىن قازاقستاندىق كاسىپورىنداردى قوسىلعان قۇن سالىعىنان بوساتۋدى ۇسىندى.
«ەلىمىزدە جەڭىل ونەركاسىپتىڭ مىسىن ءالى كۇنگە يمپورت باسىپ جاتىر. بۇعان مەملەكەتتىك قولداۋدىڭ جەتكىلىكسىزدىگى جانە سالىقتىڭ جوعارى جۇكتەمەسى سەبەپ. مىسالى، 2024 -جىلعى ەسەپ بويىنشا ەلىمىزدە توقىلعان جانە تريكوتاج شۇلىق بۇيىمدارىن وندىرۋمەن اينالىساتىن زاڭدى تۇلعالاردىڭ سانى 24 قانا بولعان. ونىڭ ىشىندە ءبىر عانا كاسىپورىن ورتا بيزنەس بولسا، ال قالعان % 95,8 ى شاعىن بيزنەستىڭ قاتارىندا. بۇل رەتتە شۇلىق تۇرلەرىنىڭ 80 پايىزى شەتەلدەن اكەلىنەدى.
يمپورتتىق تاۋارلار وتە ارزان باعادا بولعاندىقتان، جوعارى سۇرانىسقا يە. سول سەبەپتى وتاندىق وندىرۋشىلەر يمپورتتىق ونىمدەرمەن باسەكەگە تۇسە المايدى. يمپورتتىق ءونىمنىڭ باسىم بولىگى تومەن باجدارمەن اكەلىنەدى. بۇعان قازاق- قىتاي شەكاراسىنداعى ەكونوميكالىق جانە كونتراباندالىق سيپاتتاعى قۇقىق بۇزۋشىلىقتار دا ىقپال ەتەدى»، - دەدى ءماجىلىس دەپۋتاتى.
سونداي- اق، ول جەڭىل ونەركاسىپ سالاسىنداعى وتاندىق كاسىپورىندار %12 سالىق تولەپ وتىرعانىن ايتتى.
«مۇنىڭ ءبارى وتاندىق ءونىمنىڭ تۇپكىلىكتى باعاسى قىمباتقا تۇسۋىنە اكەپ سوعادى. ەلىمىزدە وندىرىلگەن ءونىم كولەمىن مەملەكەتتىك سۋبسيديالاۋ كوزدەلمەگەن. ءبىزدىڭ كاسىپكەرلەر ءۇشىن نەگىزگى ەكسپورت نارىعى رەسەي بولىپ تۇر. وندا جىل سايىن 9,7 ميلليون دوللاردىڭ ءونىمى جەتكىزىلەدى. بۇل بارلىق ەكسپورتتىڭ %98- ى دەگەن ءسوز.
بىلتىر وتاندىق كاسىپورىندار باسقا ەلدەرگە 9,9 ميلليون دوللاردىڭ 490,9 توننا شۇلىق ونىمدەرىن ەكسپورتتادى. بۇل وتە تومەن كورسەتكىش»، - دەگەن دەپۋتات قىتايدىڭ جەڭىل ونەركاسىپتى قولداۋ ساياساتىن مىسالعا كەلتىردى.
دەپۋتات ۇكىمەت باسشىسىنان شۇلىق وندىرەتىن قازاقستاندىق كاسىپورىنداردى ىشكى نارىقتا الىناتىن %12 قوسىلعان قۇن سالىعىنان بوساتۋدى سۇرادى.
«وندىرۋشىلەرگە شىعارىلاتىن ءونىمنىڭ سالماقتىق كولەمىنە قاراي مەملەكەتتىك سۋبسيديالار ءبولۋدى؛
وسى سالادا %3 دان اسپايتىن جەڭىلدەتىلگەن نەسيە بەرۋدى؛
قازاقستان-قىتاي شەكاراسىنداعى ەكونوميكالىق جانە كونتراباندالىق قىلمىستاردى جويۋدى؛
ءوزىمىزدىڭ كاسىپورىندار وندىرۋگە دايىن جەڭىل ونەركاسىپ ونىمدەرىنىڭ جەكەلەگەن تۇرلەرىنىڭ يمپورتىنا باج سالىعىن ۇلعايتۋدى سۇرايمىن»، - دەدى قايرات بالابيەۆ.
اۆتور
ەسىمجان ناقتىباي
