قازاقستاندىقتار جەمقورلىق تۋرالى حابارلاعانى ءۇشىن 15,7 ميلليون تەڭگەگە دەيىن سىياقى الا الادى
استانا. KAZINFORM - قازاقستاندىقتار سىبايلاس جەمقورلىق فاكتىلەرى تۋرالى حابارلاعانى ءۇشىن سىياقى الادى.
بۇگىن - حالىقارالىق ينفورماتور كۇنى. بۇل حابار جەتكىزۋشىلەردىڭ قوعامعا قوسقان ماڭىزدى ۇلەسىن اتاپ وتەتىن داتا. ماقسات - ادامداردى ءۇنسىز قالماي، جەمقورلىققا، الاياقتىققا، حالىق دەنساۋلىعىنا جانە قورشاعان ورتاعا تونەتىن قاۋىپتەرگە قارسى بەلسەندى كۇرەسۋگە شاقىرۋ.
قوعامدى ءجيى الاڭداتاتىن كۇردەلى ماسەلەنىڭ ءبىرى - سىبايلاس جەمقورلىق. مەملەكەت باسشىسىنىڭ تاپسىرماسىمەن سىبايلاس جەمقورلىققا قارسى ءىس- قيمىل اگەنتتىگى قوعامدا «زاڭ مەن ءتارتىپ» قاعيداتتارىن ىلگەرىلەتۋ باعىتىنداعى جۇمىستى جالعاستىرىپ جاتىر. سىبايلاس جەمقورلىققا قارسى ءتيىمدى جۇمىس تەك حالىقتىڭ بەلسەندى قاتىسۋىنىڭ ارقاسىندا مۇمكىن. وسى ورايدا سىبايلاس جەمقورلىققا قارسى ءىس- قيمىل اگەنتتىگى ءتۇرلى بايلانىس ارنالارى ارقىلى اشىقتىق قاعيداتىن ىسكە اسىرۋدا.
ايتا كەتسەك، سىبايلاس جەمقورلىققا قارسى قىزمەتتىڭ Call-ورتالىعى تاۋلىك بويى جۇمىس ىستەيدى، ازاماتتارعا تەگىن اقپاراتتىق- كونسۋلتاتسيالىق قولداۋ كورسەتەدى.
وپەراتورلار اگەنتتىكتىڭ قىزمەتى تۋرالى سۇراقتارعا جاۋاپ بەرەدى، سىبايلاس جەمقورلىققا قارسى ماسەلەلەر بويىنشا شاعىمداردى، ۇسىنىستار مەن پىكىرلەردى قابىلدايدى.
ورتالىق بولعان نەمەسە جوسپارلانىپ جاتقان سىبايلاس جەمقورلىق فاكتىلەردى تاۋلىك بويى قابىلدايدى. سىبايلاس جەمقورلىق قارسى ءىس- قيمىل اگەنتتىگى وپەراتورى قۇقىق بۇزۋشىلىق جاسادى دەگەن كۇدىك تۋرالى قوڭىراۋ تۇسكەن كەزدە ابونەنتتى حابارلاماعا تىركەيتىن جانە جەدەل شارا قابىلدايتىن اگەنتتىكتىڭ كەزەكشى وفيتسەرىمەن بايلانىستىرادى. وسىلايشا، ءاربىر حابارلاما ۋاقتىلى تەكسەرىلەدى. جەتكىلىكتى نەگىز بولعان جاعدايدا سوتقا دەيىنگى تەرگەۋ باستالادى.
بىلتىر Call-ورتالىققا 26 مىڭنان استام ءوتىنىش ءتۇستى، سىبايلاس جەمقورلىققا قارسى قىزمەت ماسەلەلەرى بويىنشا 5,8 مىڭنان كەڭەس بەرىلدى جانە سىبايلاس جەمقورلىق قۇقىق بۇزۋشىلىق بەلگىلەرى بار 862 حابارلاما جەتكىزىلدى. Call-ورتالىققا تۇسكەن حابارلامالاردىڭ ناتيجەلەرى بويىنشا اشىلعان قىلمىستىق ىستەردىڭ سانى ارتىپ كەلەدى.
سىبايلاس جەمقورلىق قۇقىق بۇزۋشىلىق فاكتىسى تۋرالى حابارلاعان نەمەسە سىبايلاس جەمقورلىققا قارسى ءىس- قيمىلعا وزگە دە جولمەن جاردەم كورسەتەتىن ادامدارعا، ەگەر كىنالى ادامعا قاتىستى سوت قاۋلىسى نەمەسە ايىپتاۋ ۇكىمى زاڭدى كۇشىنە ەنگەن جاعدايدا، ءبىرجولعى اقشالاي سىياقى تولەنەدى.
سىياقى قاعيدالارى رەگلامەنتتەلگەن جانە سىبايلاس جەمقورلىققا توزبەۋشىلىكتى قالىپتاستىرۋ، ازاماتتىق قوعامدى وعان قارسى كۇرەسكە تارتۋ جولىنداعى ىنتالاندىرۋشى تەتىك.
سىياقىنىڭ كولەمى %10- عا دەيىن جانە 4 مىڭ ايلىق ەسەپتىك كورسەتكىشتەن اسپايدى. ناقتى ايتقاندا، سىبايلاس جەمقورلىق زاڭ بۇزۋشىلىقتار تۋرالى سەنىمدى اقپارات بەرگەنى ءۇشىن 15,7 ميلليون تەڭگەگە دەيىن سىياقى كوزدەلگەن.
وتكەن جىلى سىبايلاس جەمقورلىققا قارسى قىزمەت جالپى سوماسى 35,5 ميلليون تەڭگەگە 104 ازاماتقا سىياقى بەردى، ونىڭ ىشىندە 38 مەملەكەتتىك قىزمەتشى گراموتالارمەن ماراپاتتالدى.
ورتالىققا كوبىنە قانداي حابارلامالار كەلىپ تۇسەدى؟
- قىلمىستىق جانە اكىمشىلىك جاۋاپتىلىققا تارتپاعانى ءۇشىن پارا الۋ؛
- وكىلەتتىگىن اسىرا پايدالانۋ؛
- مەملەكەتتىك ساتىپ الۋ سالاسىنداعى زاڭ بۇزۋشىلىقتار؛
- لاۋازىمدى تۇلعالاردىڭ باسقا دا زاڭسىز ارەكەتتەرى.
سىبايلاس جەمقورلىق فاكتىلەرى تۋرالى حابارلاپ، سىياقى العان ازاماتتاردىڭ دەنى قاراعاندى، اقتوبە جانە باتىس قازاقستان وبلىسىندا تىركەلدى، اتالعان وڭىرلەردە 6 ادامنان 10 ادامعا دەيىن سىياقى الدى.
مەملەكەتتىك قىزمەتكەرلەر اراسىندا دا جەمقورلىق فاكتىلەرى تۋرالى حابارلامانى دەر كەزىندە جەتكىزۋ جايتتارى ارتىپ كەلەدى
مىسالى، شىمكەنت قالاسىندا 6 ميلليون تەڭگە، ياعني پارا سوماسىنىڭ %10- نا «ت» جانە «ب» ازاماتتارىنىڭ قىلمىستىق ءىس-ارەكەتىنىڭ جولىن كەسۋگە كومەكتەسكەنى ءۇشىن «ب» ازاماتى سىياقى الدى.
استانا قالاسى بويىنشا دەپارتامەنتى 3 ميلليون تەڭگە سوماسىنا پوليتسيا قىزمەتكەرلەرىنە پارا بەرۋگە يتەرمەلەگەن ەكى ازاماتقا قاتىستى سىبايلاس جەمقورلىق تۋرالى حابارلاعانى ءۇشىن «ت» ازاماتىنا سىياقى بەردى.
ەڭ باستىسى، سىبايلاس جەمقورلىققا قارسى قىزمەت اقپارات بەرۋشىلەردىڭ قۇپيالىلىعىن تولىق قامتاماسىز ەتەدى. وسىعان ماقساتتا 2023 -جىلعى 3-قاڭتاردان باستاپ اتالعان ساناتتاعى ازاماتتاردى قورعاۋدىڭ كەشەندى باعدارلاماسى قابىلداندى. ەندى سىبايلاس جەمقورلىق تۋرالى حابارلاعان ادامدارعا قاتىستى فيزيكالىق قول سۇعىلماۋشىلىق عانا ەمەس، سونىمەن قاتار قۇپيا اقپاراتتى جانە ولاردىڭ ەڭبەك قۇقىقتارىن قورعاۋ شارالارى كۇشەيتىلدى. وسىلايشا سىبايلاس جەمقورلىق تۋرالى حابارلاعان ادامداردى كوميسسيا قۇرامىندا سىبايلاس جەمقورلىققا قارسى قىزمەت قىزمەتكەرىنىڭ قاتىسۋىنسىز تارتىپتىك جاۋاپكەرشىلىككە تارتۋعا، جۇمىستان شىعارۋعا نەمەسە باسقا لاۋازىمعا اۋىستىرۋعا بولمايدى. ال سىبايلاس جەمقورلىق تۋرالى حابارلاعان ادامدار تۋرالى قۇپيا اقپارات جاريا ەتىلگەن جاعدايدا قىلمىستىق جاۋاپكەرشىلىك كوزدەلگەن.
ەسكە سالا كەتسەك، سىبايلاس جەمقورلىق فاكتىلەرىنە توزبەۋشىلىكتى ارتتىرۋ، پاراقورلىققا بەي-جاي قاراماۋ ادەتىن قالىپتاستىرۋ ماقساتىندا انتيكور جەدەل حابارلاۋ ءۇشىن 1424 ءنومىرلى WhatsApp-چات- بوتىن ىسكە قوستى. ول ءۇشىن 87770001424 نومىرىنە حابارلاما جىبەرۋ جەتكىلىكتى.
WhatsApp چات-بوت انتيكور 1424 ارقىلى نە ىستەۋگە بولادى؟
سىبايلاس جەمقورلىق فاكتىلەرى تۋرالى حابارلاۋ؛
سىبايلاس جەمقورلىققا قارسى ءىس- قيمىل ماسەلەلەرى بويىنشا كەڭەس الۋ؛
- حابارلاما مەن ونى حابارلاعان ادامنىڭ قۇپيالىلىعىنا كەپىلدىك بەرىلەدى. بارلىق حابارلاما مىندەتتى تۇردە قارالادى جانە قۇقىق بۇزۋشىلىقتار انىقتالعان جاعدايدا قولدانىستاعى زاڭناماعا سايكەس شارا قابىلدانادى. الايدا، سىبايلاس جەمقورلىق تۋرالى جالعان حابارلاۋ قىلمىستىق جاۋاپتىلىققا اكەپ سوعاتىنىن ەسكە سالامىز، - دەپ ەسكەرتەدى انتيكور.
ايتا كەتسەك، بىرەر كۇن بۇرىن مەملەكەتتىك كەڭەسشى ەرلان قاريننىڭ توراعالىعىمەن قازاقستان رەسپۋبليكاسى پرەزيدەنتى جانىنداعى سىبايلاس جەمقورلىققا قارسى ءىس- قيمىل ماسەلەلەرى جونىندەگى كوميسسيانىڭ وتىرىسى ءوتتى.
مەملەكەتتىك كەڭەسشى كەشەندى جوسپاردىڭ ءتيىستى تارماقتارىن ساپالى ورىنداۋدىڭ ماڭىزدىلىعىنا نازار اۋداردى. سونداي-اق كولەڭكەلى ەكونوميكاعا قارسى ءىس-قيمىل سالاسىنداعى جاڭا باعدارلامالىق قۇجاتتاردى دايىنداۋ كەزىندە تالدامالىق جۇمىستى كۇشەيتۋدىڭ وزەكتىلىگىنە توقتالدى.
