قازاقستاندىقتار دارىگەرگە سيفرلىق سايكەستەندىرۋ ارقىلى قارالادى

- بىزگە م ءا م س ەسەبىنەن ەمدەلەتىن ازاماتتاردان كوپ شاعىم ءتۇستى. ولار مەديتسينا ۇيىمدارىنان وزدەرى الماعان قىزمەت تۋرالى حابارلاما كەلگەنىن ايتادى. 2023 -جىلى 818 ميلليون تەڭگەگە 46 مىڭ جالعان قىزمەت كورسەتۋ فاكتىسى تىركەلگەن. بۇل تەك بەلسەندى ازاماتتاردىڭ شاعىمىنا نەگىزدەلگەن ستاتيستيكا ەكەنىن ەسكەرسەك، جالعان قىزمەتتەردىڭ سانى بۇدان الدەقايدا كوپ بولۋى مۇمكىن، - دەيدى ەلەكتروندىق دەنساۋلىق ساقتاۋدى دامىتۋ دەپارتامەنتى باسشىسىنىڭ ورىنباسارى ايدار قاسەنوۆ.

ال بىلتىر اق حالاتتىلار 43328 رەت ناۋقاستارعا قىزمەت كورسەتتىك دەپ جالعان اقپارات بەرگەن. بۇل جاعداي دەپۋتاتتاردىڭ دا قاتاڭ سىنىنا ۇشىرادى. ءدال وسىنداي وقيعالاردىڭ الدىن الۋ ءۇشىن دەنساۋلىق ساقتاۋ مينيسترلىگى سيفرلىق سايكەستەندىرۋدىڭ ەكى ءتۇرلى مەحانيزمىن ۇسىنىپ وتىر.

- سيفرلىق سايكەستەندىرۋ ەكى ءتۇرلى ادىسپەن جۇرگىزىلەدى. ءبىرىنشىسى «سيفرلىق قۇجات» ەلەكتروندىق ۇكىمەتتىڭ» سەرۆيسىنەن ۇسىنىلاتىن 6 ساندىق كود بويىنشا جانە Face ID تەحنولوگياسىن پايدالانا وتىرىپ پاتسيەنتتى سايكەستەندىرۋ. بۇل مەحانيزمدەر ىسكە قوسىلسا، قۇجاتتارىڭىزدى وزىڭىزبەن الىپ ءجۇرۋدىڭ قاجەتى بولمايدى. سونداي-اق، جەكە باسىڭىزدى كۋالاندىراتىن قۇجات ارقىلى سايكەستەندىرۋدەن وتۋگە قۇقىعىڭىز بار. جۇيەنىڭ تەكسەرىسى 100 پايىز سەنىمدى دەپ ايتا الامىز، - دەيدى دەنساۋلىق ساقتاۋ مينيسترلىگى.

دارىگەرگە قارالۋ ءۇشىن «سيفرلىق قۇجات» سەرۆيسىنىڭ قىزمەتىن پايدالانۋ قاجەت:

1-قادام: Egov mobile، نەمەسە وزگە دە سيفرلىق قۇجاتىڭىز ساقتالعان قوسىمشانى اشاسىز.

2-قادام: «سيفرلىق قۇجاتتار» ءبولىمىن تاڭداپ، «رۇقسات بەرۋدى اشۋ» باتىرماسىن باساسىز.

3-قادام. دارىگەرگە 6 تاڭبالى كودتى ايتاسىز.

4-قادام. دارىگەر كودتى جۇيەگە ەنگىزىپ، قابىلداۋعا كەلگەنىڭىزدى راستايدى.

ال سمارتفونىڭىز بولماسا، ءوزىڭىزدىڭ جەكە باسىڭىزدى Face ID تەحنولوگياسى ارقىلى كۋالاندىرا الاسىز:

1-قادام: دارىگەر ۆەب-كامەرا ارقىلى بەتىڭىزدى سۋرەتكە تۇسىرەدى؛

2-قادام: جۇيە فوتوسۋرەتتى دەرەكقورمەن سالىستىرادى؛

3-قادام: دەرەكتەر سايكەس كەلسە، دارىگەردىڭ قابىلداۋىندا بولعانىڭىز راستالادى.

- سيفرلىق سايكەستەندىرۋ بىلتىر قازان ايىنان باستاپ پيلوتتىق جوبا رەتىندە قولدانىلىپ جاتىر. مەحانيزم العاش رەت رەسپۋبليكالىق مەديتسينالىق- سانيتاريالىق العاشقى كومەك ورتالىعىنا ەنگىزىلدى. جىل سوڭىنا دەيىن استاناداعى مەديتسينا مەكەمەلەرى تۇگەلدەي ءدال وسى جۇيەمەن جۇمىس ىستەۋدى باستادى. بيىل قازاقستانداعى بارلىق ەمحاناعا سيفرلىق سايكەستەندىرۋ قىزمەتىن ەنگىزۋدى جوسپارلاپ وتىرمىز. دەنساۋلىق ساقتاۋ سالاسىن بۇل باعىتتا تسيفرلاندىرۋ ءۇشىن بيۋدجەتتەن ەشقانداي اقشا بولىنبەيدى. Face ID تەحنولوگياسىنا قاجەتتى ۆەب-كامەرالاردى ءاربىر مەديتسينالىق ۇيىم ءوز قارجىسىنا ساتىپ الادى، - دەيدى ايدار قاسەنوۆ.

ايتا كەتەيىك، وتكەن جولى م ءا م س-پەن قامتىلماعاندار اقىسىز ونكولوگيالىق سكرينينگتەن وتە الاتىنىن حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى