قازاقستاندىقتار ازىق-تۇلىككە قانشا قاراجات جۇمساپ جاتىر دەگەن سۇراققا ۆيتسە-پرەمەر جاۋاپ بەردى
استانا. KAZINFORM - قازىر ەلىمىزدە تابىستىڭ 22,2 پايىزىن ازىق-تۇلىككە جۇمساپ جاتىرمىز. بۇل تۋرالى پرەمەر-ءمينيسترىنىڭ ورىنباسارى سەرىك جۇمانعارين ءمالىم ەتتى.
بۇگىن سەناتتا وتكەن ازىق-تۇلىك قاۋىپسىزدىگى تاقىرىبىنداعى پارلامەنتتىك تىڭداۋدان كەيىن تىلشىلەر قازاقستاندىقتار جالاقىسىنىڭ نەشە پايىزىن ازىق-تۇلىككە جۇمسايتىنىن سۇرادى.
- بۇل ماسەلە وتە ماڭىزدى. كەيبىرەۋلەرى وسى شىعىندارعا قاتىستى شاتاستىرىپ جاتادى، ياعني «تاپقان تابىستىڭ جارتىسى ازىق-تۇلىككە جۇمسالىپ جاتىر» دەپ ايتادى. ول - دۇرىس ەمەس. جالپى، تۇتىنۋ (ازىق-تۇلىك جانە ازىق-تۇلىك ەمەس تاۋارلارى، اقىلى قىزمەتتەر) شىعىندارىنىڭ ىشىندە 50 پايىزى ازىق-تۇلىككە جۇمسالاتىنىن بىلەمىز جانە ونى مويىندايمىز. ال تۇتىنۋ شىعىندارى - تاپقان تابىسىمىزدىڭ 50 پايىزى. سەبەبى تابىسىمىزدى تۇتىنۋ شىعىندارىنان بولەك، نەسيەنى جابۋعا نەمەسە بالا-شاعاعا كەرەك زاتتاردى الۋعا، قارىزدى جابۋعا، وقۋعا اقىسىنا تولەيمىز. وسىنىڭ ءبارىن ەسكەرە وتىرىپ، قازىر بۇكىل تابىسىمىزدىڭ 22,2 پايىزىن ازىق-تۇلىككە جۇمساپ جاتىرمىز دەپ ايتۋعا بولادى، - دەدى س. جۇمانعارين.
اتاپ ايتقاندا، تۇتىنۋ شىعىندارى - تۇتىنۋ تاۋارلارى مەن قىزمەتتەرىن ساتىپ الۋعا باعىتتالعان اقشالاي شىعىستارىنىڭ بولىگى. تۇتىنۋ شىعىندارىنا ازىق-تۇلىك تاۋارلارىن، ازىق-تۇلىك ەمەس تاۋارلاردى ساتىپ الۋعا جانە اقىلى قىزمەتتەردى الۋعا ارنالعان شىعىستار جاتادى.
