قازاقستاندىقتار 8 مىڭ تونناعا جۋىق التىن ساتىپ العان
استانا. KAZINFORM - ۇلتتىق بانك 2024 -جىلدىڭ قورىتىندىسى بويىنشا ەكىنشى دەڭگەيلى بانكتەرگە جانە بانكتىك ەمەس جەكەلەگەن ايىرباستاۋ پۋنكتەرىنە جالپى سالماعى 1,7 توننا 47395 ولشەمەلى قۇيما ساتقان. بۇل تۋرالى ۇلتتىق بانكتىڭ باسپا ءسوز قىزمەتى حابارلادى.
2024 -جىلى قۇيمالار كوپ ساتىلعان وڭىرلەر: الماتى (32735 دانا، %69)، شىمكەنت (5200 دانا، %11) جانە قاراعاندى (2209 دانا،%5).
حالىققا ارنالعان ولشەمەلى قۇيمالاردى ساتىپ الۋ جانە ساتۋ Halyk Bank، ەۋرازيالىق بانك، Jusan Bank، سەنتركرەديت بانكى ارقىلى، سونداي-اق بانكتىك ەمەس جەكەلەگەن ايىرباستاۋ پۋنكتەرىندە قولجەتىمدى.
- 2024 -جىلى ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرى كەرى ساتىپ الۋدى ەسكەرگەندە، حالىققا جالپى سالماعى 2,5 توننا 71106 قۇيما ساتتى. باعدارلاما ىسكە قوسىلعالى جالپى سالماعى 7,9 توننا بولاتىن 222680 التىن قۇيما ساتىلدى. حالىق اراسىندا سۇرانىسقا يە قۇيما سالماعى - 10 گ. جالپى ساتىلعان كولەم ىشىندە ونىڭ ۇلەسى %25 - 54875 دانا. ودان كەيىن 5 گرامدىق قۇيما - 49145 دانا (%22)، 100 گرامدىق قۇيما - 47943 دانا (%22)، 20 گرامدىعى - 40843 دانا (%18) جانە 50 گرامدىق قۇيما - 29 874 دانا (%13)، - دەلىنگەن حابارلامادا.
التىن قۇيمالار سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى - بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى.
- ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە بەدەرلى جيەگى بار) جانە مەحانيكالىق زاقىمدانۋدان قورعايتىن ارنايى قوراپقا سالىنىپ شىعادى. سول ارقىلى قۇيمانىڭ اشىلعان- اشىلماعانىن وڭاي تەكسەرۋگە بولادى. قورعانىش قورابى ساپا سەرتيفيكاتى بولىپ تا سانالادى. سوندىقتان، التىن قۇيمانى ۇقىپتى ساقتاپ، قورابىن بۇلدىرمەۋگە كەڭەس بەرەمىز، - دەلىنگەن ۇلتتىق بانك حابارلاماسىندا.
اۆتور
نازىم بولەسوۆا
