قازاقستاندىق سپورتشىلار قىسقى ازيا ويىندارىندا ءبىر-بىرىنە قالاي جانكۇيەر بولدى
استانا. KAZINFORM - قىتايدىڭ حاربين قالاسىندا IX قىسقى ازيا ويىندارى ءوز مارەسىنە جەتتى، دەپ حابارلايدى olympic.kz.
قازاقستان قۇراماسى بياتلون، كەرلينگ، سكي-الپينيزم، حوككەي، شورت-ترەك، كونكيمەن جۇگىرۋ، شاڭعى جارىسى، فريستايل-اكروباتيكا، تاۋ شاڭعىسى سپورتى جانە مانەرلەپ سىرعاناۋ سياقتى سپورت تۇرلەرىنەن سىنعا ءتۇستى.
ەڭ العاش بولىپ حوككەي جانە كەرلينگ بويىنشا جارىستار باستالدى. ەرلەر اراسىنداعى حوككەي تۋرنيرىنىڭ العاشقى ماتچتارى 3-اقپاندا ءوتتى. قازاقستان ەرلەر قۇراماسىن قولداۋ ءۇشىن العاشقىلاردىڭ ءبىرى بولىپ ايەلدەر حوككەي قۇراماسىنىڭ مۇشەلەرى كەلدى.
ماتچتار كەزىندە حوككەي ارەناسىنداعى جانكۇيەرلەر قاتارىنان شورت-ترەكشىلەردى، كەرلينگتەن ايەلدەر قۇراماسىن جانە وزگە دە سپورتشىلاردى كورگەن ەدىك.
كەرلينگتەن قازاقستان ايەلدەر قۇراماسىنىڭ كاپيتانى انگەلينا ەباۋەردىڭ ايتۋىنشا، ولار شورت-ترەك كومانداسىنا جانكۇيەر بولىپ، ولاردىڭ جەڭىسىنە قۋاندى.
ال كونكيمەن جۇگىرۋ جارىسىندا 3000 مەتر قاشىقتىقتا ونەر كورسەتكەن كريستينا شۋمەكوۆانى قولداۋعا ونىڭ اپكەلەرى ينەسسا مەن الينا شۋمەكوۆالار كەلدى.
قازاقستاندىق سپورتشىلاردىڭ ءوزارا قولداۋىن ەرەكشە كورسەتكەن ەلەمەنتتەردىڭ ءبىرى - قۇرامانىڭ ارنايى ەكسكليۋزيۆتى حۋدي مەن سۆيتشوتتارى بولدى. ولارعا بالالاردىڭ جىلى تىلەكتەرى مەن سۋرەتتەرى بەينەلەنگەن.
بۇل جارقىن كيىم حاربيندەگى ويىنداردا قازاقستاندىق سپورتشىلاردىڭ ايرىقشا بەلگىسىنە اينالدى.
«ءبىز وتاندىق Arqymaq برەندىمەن بىرلەسىپ، سپورتشىلارىمىزعا بالالار ازىرلەگەن تىلەكتەر مەن سۋرەتتەر بەينەلەنگەن سۆيتشوتتار مەن حۋديلەر توپتاماسىن شىعاردىق. بۇل داستۇرگە اينالعان يگى ءىس بولدى. بۇل جولى ءاربىر جانكۇيەر وليمپيادالىق وتباسىنىڭ ءبىر بولىگى بولىپ، Arqymaq دۇكەندەرىنەن ليميتتەلگەن توپتامانى ساتىپ الا الادى»، - دەپ مالىمدەدى قازاقستان ۇ و ك وكىلدەرى.
ەسكە سالايىق، IX قىسقى ازيا ويىندارى 2025-جىلعى 7-14-اقپان ارالىعىندا حاربيندە ءوتتى. قازاقستان قۇراماسى جالپى ەسەپتە 20 مەدال جەڭىپ الدى: 4 التىن، 9 كۇمىس جانە 7 قولا.
وسىعان دەيىن حوككەيدەن قازاقستان ايەلدەر قۇراماسى ازيا ويىندارىنىڭ كۇمىس جۇلدەسىنە يە بولعانى تۋرالى جازعان ەدىك.
اۆتور مۇحتار قاليموللا ۇلى
