قازاقستاندىق Neo Nomad ۆيزاسىن قانشا شەتەل ازاماتى الدى
استانا. KAZINFORM - ەلىمىزدە Neo Nomad ۆيزاسى بىلتىر قاراشادا ىسكە قوسىلدى.
Neo Nomad Visa - قاشىقتان جۇمىس ىستەپ، قازاقستاندا تۋريست رەتىندە كەلەتىن شەتەل ازاماتتارىنا ارنالعان. ۆيزانى ءبىر جىلعا دەيىن ۇزارتۋعا بولادى.
- ۆيزا شەتەل ازاماتىنا ەلىمىزدە بولۋعا مۇمكىندىك بەرەدى، ءبىراق قازاقستاننىڭ ەڭبەك نارىعىندا جۇمىس ىستەي المايدى. شەتەل ازاماتتارى قاشىقتان جۇمىس ىستەپ، قازاقستاندا قوناق، تۋريست بولا الادى. قازاقستاندا بولۋ مەرزىمى اياقتالعاننان كەيىن شەتەل ازاماتى سالىق ەسەبىنە تۇرۋى كەرەك. سونىمەن قاتار ۆيزا العانداردى قوسارلانعان سالىقتان بوساتاتىن حالىقارالىق زاڭناما دا بار. سەبەبى قازاقستاندا رەسمي تۇردە جۇمىس ىستەمەيدى، ولار تۋريستەر،-دەدى تۋريزم جانە سپورت ءمينيسترىنىڭ ورىنباسارى ەرجان ەركىنبايەۆ سىرتقى ىستەر مينيسترلىگىندە وتكەن Neo Nomad Visa, Digital Nomad Visa جانە B9 ۆيزالارىن تۇسىندىرۋگە ارنالعان بريفينگ بارىسىندا.
سونداي-اق ۆيتسە-مينيستر الەمنىڭ 20 ەلىندە وسى سەكىلدى ۆيزا ءتۇرى بارىن تىلگە تيەك ەتتى.
- Neo Nomad ۆيزاسى بىلتىر قاراشادا ىسكە قوسىلدى، بۇگىندە 7 شەتەل ازاماتى ۆيزا الدى،-دەيدى ە. ەركىنبايەۆ.
ەسكە سالا كەتسەك، بىلتىر قاراشادا مەملەكەت باسشىسى قاسىم-جومارت توقايەۆتىڭ تاپسىرماسى بويىنشا Neo Nomad دەپ اتالاتىن جاڭا ۆيزا ءتۇرى ەنگىزىلدى. بۇل ۆيزا زاماناۋي كوشپەندىلەرگە-ساياحاتتاپ، قاشىقتان جۇمىس ىستەيتىن شەتەلدىك تۋريستەرگە ارنالعان.
ايتا كەتسەك، Neo Nomad ۆيزاسىنىڭ العاش يەگەرى-ەنەرگەتيكا جانە قارجى سالاسىندا تاجىريبەسى بار ۇلىبريتانيا ازاماتى سەرتاچ يەنەر.
بيىل قاڭتاردا Kazakh Tourism ۇلتتىق كومپانياسى تاعى ەكى شەتەلدىك ازاماتقا زاماناۋي كوشپەندىلەرگە ارنالعان Neo Nomad Visa بەرىلگەنىن حابارلادى.
