قازاقستاندىق بيزنەس سۋ تاسقىنىنان زارداپ شەككەندەرگە قانداي كومەك بەرۋدە

Kcell جانە Beeline ۇيالى بايلانىس وپەراتورلارى سۋ تاسقىنىنان زارداپ شەككەن ازاماتتارعا تەلەفون قوڭىراۋلارى ءۇشىن تەگىن مينۋتتار، سونىمەن قاتار ينتەرنەت گيگابايتتارى مەن ونداعان SMS ۇسىناتىنىن حابارلادى.

ءوز كەزەگىندە قازاقستاندىق ەكىنشى دەڭگەيلى بانكتەر 2024 -جىلدىڭ 1-ساۋىرىنەن 30-ماۋسىمىنا دەيىن زارداپ شەككەندەر ءۇشىن نەسيە تولەمىن وتەۋ مەرزىمىن كەيىنگە قالدىرۋعا جانە ءوسىمپۇلدار مەن ءوسىمپۇلداردى ەسەپتەمەۋگە دايىن ەكەنىن ءبىلدىردى.

قازاقستاندىق Astana Motors اۆتوموبيل كومپانياسى سۋ تاسقىنىنان زارداپ شەككەن وڭىرلەردىڭ تۇرعىندارىنا كومەك كورسەتۋ ءۇشىن «دەمەۋ قازاقستان قورى» كورپوراتيۆتىك قورىنىڭ شوتىنا 500 ميلليون تەڭگە اۋدارعانىن حابارلادى.

«بارلىعىمىز بولعان وقيعا ءۇشىن ۋايىمداپ، تابيعي اپات سالدارىنان كەنەتتەن باسپاناسىنان، مۇلكىنەن جانە كۇنكورىس قۇرالدارىنان ايىرىلعان وتانداستارىمىزعا جاناشىرلىق تانىتىپ وتىرمىز. ءبىز زارداپ شەككەن ايماقتاردا قالىپتى ءومىردى قالپىنا كەلتىرۋ ءۇشىن 500 ميلليون تەڭگە ءبولۋدى ۇيعاردىق. توزىمدىلىك، شىدامدىلىق جانە ءوزارا كومەك سۋ تاسقىنىنىڭ سالدارىن ەڭسەرۋگە كومەكتەسەدى»، - دەدى Astana Motors كومپانياسىنىڭ نەگىزىن قالاۋشى نۇرلان سماعۇلوۆ.

زارداپ شەككەندەرگە كومەك قولىن سوزۋدا قاراپايىم قازاقستاندىقتار دا شەتتە قالمادى. بىرنەشە كۇننىڭ ىشىندە «Biz Birgemiz Qazaqstan» قورىنىڭ ەسەپشوتىنا 55 مىڭ ازامات 80 ميلليون تەڭگە جينادى. Kaspi.kz بۇل سومانى 200 ميلليون تەڭگەگە دەيىن ارتتىردى.

«اقشا اقتوبە جانە قوستاناي وبلىستارىنداعى جولداردى جوندەۋ، قۇتقارۋ تىكۇشاقتارىنىڭ جۇمىسىن قامتاماسىز ەتۋ، گەنەراتورلار، سورعىلار، ۇرلەمەلى قايىقتار مەن ءدارى-دارمەك ساتىپ الۋ ءۇشىن «Biz Birgemiz Qazaqstan» قوعامدىق قورىنا جىبەرىلەدى»، - دەدى Kaspi.kz باسشىسى ميحايل لومتادزە.

Halyk Bank پەن «حالىق» قايىرىمدىلىق قورى سۋ تاسقىنىنان زارداپ شەككەندەرگە كومەك رەتىندە تاعى ءبىر ميلليارد تەڭگە بولەدى. Halyk توبىنىڭ باسشىلىعى بۇل قادام مەملەكەت تاراپىنان قولداۋ شارالارىمەن بىرگە، سونداي-اق بارلىق مۇددەلى ازاماتتار مەن بيزنەس وكىلدەرىنىڭ قاتىسۋىمەن ادامداردىڭ تابيعي اپاتتىڭ زارداپتارىنان تەزىرەك ساۋىعىپ كەتۋىنە ىقپال ەتەتىنىنە سەنىم ءبىلدىردى.

بولات وتەمۇراتوۆ اتىنداعى قور سۋ تاسقىنىنان زارداپ شەككەندەرگە كومەك رەتىندە 680 ميلليون تەڭگە ءبولدى.

«وسى كۇندەرى ءبىز ميلليونداعان وتانداستارىمىز سياقتى سۋ تاسقىنىنان زارداپ شەككەن وڭىرلەردىڭ تۇرعىندارىنا تەرەڭ جاناشىرلىق سەزىمىن بىلدىرەمىز جانە بولىنگەن قاراجات ولارعا ءبىرىنشى كەزەكتەگى قاجەتتىلىكتەردى ساتىپ الۋعا، قيىن كۇندەردەن امان وتۋگە كومەكتەسۋگە مۇمكىندىك بەرەدى دەپ ۇمىتتەنەمىز»، - دەدى بولات وتەمۇراتوۆ قورىنىڭ ديرەكتورى مارات ايتماعامبەتوۆ.

سونداي-اق سۋ تاسقىنىنا قارسى شارالاردى ۇيلەستىرۋ جانە قارعىن سۋ ءجۇرۋ كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ وتىرىسىندا مەملەكەت باسشىسى قاسىم-جومارت توقايەۆ زارداپ شەككەندەردىڭ بارلىق شىعىنىن مەملەكەت وتەيتىنىن ايتتى.

BI Group ديرەكتورلار كەڭەسىنىڭ ءتوراعاسى ايدىن راحىمبايەۆ Facebook الەۋمەتتىك جەلىسىندەگى جەكە پاراقشاسىندا كومپانيانىڭ سۋ تاسقىنىنان زارداپ شەككەن ايماقتارعا قارجىلاي كومەك كولەمىن ارتتىرۋ تۋرالى دا شەشىم قابىلداعانىن جازدى.

BI Group حولدينگى سۋ تاسقىنىنان زارداپ شەككەن ايماقتارعا كومەك كورسەتۋ ءۇشىن 500 ميلليون تەڭگە بولەتىنىن حابارلادى. بۇعان دەيىن كومپانيا اكىمدىكتەردى بارلىق قاجەتتى قۇرىلىس جانە ارنايى تەحنيكامەن، ادامي جانە ماتەريالدىق رەسۋرستارمەن قامتاماسىز ەتتى.

«سۋ تاسقىنىنان زارداپ شەككەن مىڭداعان قازاقستاندىقتارعا شىن جۇرەكتەن كوڭىل ايتامىز. باسپاناسى مەن مۇلكىنەن ايىرىلۋ - كەز كەلگەن ادام ءۇشىن ۇلكەن سىناق جانە وتانداستارىمىزعا قولداۋ كورسەتۋ جاۋاپكەرشىلىگى مەن پارىزىن سەزىنەمىز. ءبىز بىرگە زارداپ شەككەن اۋدانداردى قالپىنا كەلتىرۋگە جانە ادامداردىڭ قالىپتى ومىرگە ورالۋىن جەڭىلدەتۋگە تىرىسامىز»، - دەپ ءبولىستى BI Group ديرەكتورلار كەڭەسىنىڭ ءتوراعاسى ا. راحىمبايەۆ.

بولىنگەن قاراجات قارجىلىق قولداۋعا، سونداي- اق قالپىنا كەلتىرۋ ءۇشىن جۇرگىزىلەتىن قۇرىلىس- مونتاجداۋ جۇمىستارىنا جۇمسالادى. سونداي- اق، جاقىن ارادا BI Group قىزمەتكەرلەرى زارداپ شەككەن ايماقتارداعى ۇيلەردى قالپىنا كەلتىرۋگە كومەكتەسۋ ءۇشىن جىبەرىلەدى.

اۆتور

زارينا تۋعانبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى