قازاقستاندىق بىتىمگەرلەر سيريادان ەلگە ورالدى
استانا. KAZINFORM - اسكەري قىزمەتكەرلەردى ەلوردا اۋەجايىنان قورعانىس ءمينيسترى رۋسلان جاقسىلىقوۆ باستاعان قارۋلى كۇش قۇرامى سالتاناتتى تۇردە قارسى الدى.
- بۇگىن وتان الدىنداعى بورىشىن ورىنداپ ەلگە ورالعان ساربازداردى قارسى الدىق. بىتىمگەرلەر ادال دا ەرەن ەڭبەگىمەن جاقىن تۋىسىنىڭ عانا ەمەس بارشا حالىقتىڭ ماقتانىشى. سىزدەردى ءبىر جىل بۇرىن باس قولباسشىنىڭ كوماندالىق تاپسىرماسىمەن بىتىمگەرلىك ميسسيانى ورىنداۋعا جىبەردىك. قويىلعان مىندەتتى مۇلتىكسىز ورىنداپ ەلگە ورالدىڭىزدار، اسكەري مىندەتتى بەرىك بولعان سىزدەردە العىس ايتامىن، - دەدى قورعانىس ءمينيسترى رۋسلان جاقسىلىقوۆ بىتىمگەرلەردى قارسى الا تۇرىپ.
ەسكە سالساق، 2024-جىلى ناۋرىزدا قازاقستاننىڭ العاشقى ۇلتتىق بىتىمگەرلىك كونتينگەنتى (139 اسكەري قىزمەتكەر) بۇۇ ميسسياسى اياسىندا گولان جوتالارىنا جىبەرىلدى.
اسكەري قىزمەتشىلەر ءموبيلدى پاترۋلدەۋ، باقىلاۋ بەكەتتەرىن كۇشەيتۋ، ەۆاكۋاتسيا جانە ميناسىزداندىرۋ جۇمىستارىن ورىندادى.
ايتا كەتەيىك، بىرىككەن ۇلتتار ۇيىمى كۇشتەرىنىڭ ءبولىنۋدى باقىلاۋ ميسسياسىنىڭ قولباسشىلىعى (سووننر - UNDOF) گولان بيىكتىكتەرىندە ق ر قارۋلى كۇشتەرىنىڭ ۇلتتىق بىتىمگەرشىلىك كونتينگەنتىن جەتكىزۋ جانە ورنالاستىرۋ قىزمەتىن جوعارى باعالادى.
بيىل اقپاندا سەنات قازاقستاننىڭ بىتىمگەرلەرىنە ارنالعان وتەماقىعا قاتىستى زاڭدى ماقۇلدادى.
سونداي-اق بىرەر كۇن بۇرىن قازاقستان بىتىمگەرلەرىنىڭ ەكىنشى قۇرامى گولان جوتالارىنا اتتاندى.
