قازاقستاندىق ارنايى جاساق تۋرالى فيلم كورەرمەنگە جول تارتتى
بۇگىن، 2- قاراشادان باستاپ ەلىمىزدىڭ بارلىق كينوتەاترىندا مەملەكەت قاۋىپسىزدىگى مەن ەل تۇرعىندارىنىڭ ومىرىنە اسا قاتەر توندىرەتىن قىلمىستارعا قارسى جەدەل ارەكەت ەتەتىن «Burkit» ارنايى جاساعى تۋرالى فيلم پروكاتقا شىقتى، دەپ حابارلايدى kazinform.
«Burkit» - ارنايى جاساقتا قىزمەت ەتەتىن ءۇش دوستىڭ حيكاياسى. ولاردىڭ كۇندەلىكتى مىندەتى - قاۋىپتى قىلمىستىق توپتارعا قارسى تۇرۋ. وسىنداي قاراما-قايشىلىقتارعا قاراماي، ولارعا دوستىققا ادالدىقتى سىناۋ مىندەتى دە تۇر.
فيلم تۇسىرىلىمىنە ارنايى جاساق، اسكەري تەحنيكا جانە اۆياتسيا، سونداي-اق ەكى جۇزدەن استام بەلسەندى اسكەري قىزمەتشى قاتىسقان. جەدەل-ىزدەستىرۋ شارالارى ارقاۋ بولعان كارتينانىڭ كەيبىر ەپيزودتارى شىنايى وقيعالارعا نەگىزدەلگەن. ءتۇسىرىلىم جۇمىستارى الماتى وبلىسىندا، قونايەۆ قالاسىندا، ەسىك كولىنىڭ تاۋلارىندا جانە ىلە وزەنى بويىندا ءوتتى.
ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ايتۋىنشا، قازىرگى كورەرمەندەردىڭ سۇرانىس، تالعامى جان-جاقتى. سوندىقتان كورەرمەنگە ءارتۇرلى جانرداعى، وسىنداي ءتۇرلى تريۋكقا تولى ەكشن فيلمدەردى دە ۇسىنعان ءجون. فيلمدە «بۇركىت» ارنايى جاساعىنىڭ ساربازدارى «كۇرەڭ بەرەت» كيۋ قۇقىعىنا يە بولۋ ءۇشىن سىنعا تۇسەدى.
«ەلىمىزدە بۇگىنگى كۇنگە 200 گە جۋىق «كۇرەڭ بەرەت» يەگەرى بار ەكەن. كۇرەڭ بەرەت كيۋ مارتەبەسىنە ارنالعان بىلىكتىلىك سىناعىنان ءوتۋ - جاۋىنگەرلىك رۋحتىڭ بەلگىسى. سوندىقتان جاڭا فيلمىمىز جاستاردى وتانعا دەگەن ادالدىق پەن رياسىز ماحابباتقا تاربيەلەيدى دەپ سەنەمىز» - دەدى قۇرمانبەك جۇماعالي.
فيلمنىڭ رەجيسسەرى - دانيار يبراگيموۆ، ول ءۇشىن بۇل كارتينا دەبيۋتتىك جۇمىس. بۇعان دەيىن دانيار «قازبات» جانە «التىنشى بەكەت» اسكەري فيلمدەرىندە پروديۋسەر رەتىندە قىزمەت ەتكەن. سول سەبەپتى تاجىريبەلى مامان تۋىندىنى ءتۇسىرۋ وعان قيىندىق تۋدىرماعانىن ايتتى.
فيلمگە داۋرەن سەرعازين، سانجار ءمادي، اسىلحان تولەپوۆ، گۇلناز جولانوۆا، اسەل ساعاتوۆا، جاندوس ايباسوۆ جانە ازامات ساتىبالدى سياقتى ەلىمىزدىڭ تانىمال اكتەرلەرى ءتۇستى. سونىمەن بىرگە تانىمال مۋزىكانت عالىمجان مولدانازار دا انتاگونيست كەيىپكەردىڭ ءرولىن سومداپ شىقتى. باستى رولدەگى اكتەرلەر ءتۇسىرىلىم جۇمىستارىنا كىرىسپەس بۇرىن بىرنەشە اپتا بويى جاۋىنگەرلىك وقۋ-جاتتىعۋلارىنا قاتىسىپ، تاكتيكالاردى ۇيرەندى.
«فيلمگە ءتۇسۋ ءۇشىن ءبىز ارنايى نورماتيۆتەردى تاپسىردىق. شىنايى سارزبازداردان ەش ايىرماشىلىعىمىز بولمادى. 30 كەلىدەن اۋىر فورمانى كيىپ جۇردىك. ءبىر ەپيزودتىڭ ءتۇسىرىلىمى كەزىندە ارقامدى وڭباي جاراقاتتاپ الدىم. ءبىر اپتا بويى ەم الۋىما تۋرا كەلدى. كاسكادەر بولعاندىقتان بارلىق تريۋكتى ءوزىم جاساۋعا تىرىستىم»، - دەيدى فيلم اكتەرى سانجار ءمادي.
«Burkit» ەكشن فيلمى 2- قاراشادان باستاپ بارلىق كينوتەاترلاردا قازاق جانە ورىس تىلدەرىندە شىعادى.
