قازاقستاندىق 200 دەن استام پەداگوگ شەتەلدە تاعىلىمدامادان ءوتىپ جاتىر
200 دەن استام قازاقستاندىق پەداگوگ «ءبىلىم بەرۋ» جانە «پەداگوگيكا» باعىتتارى بويىنشا «بولاشاق» باعدارلاماسىمەن شەت ەلدەردە تاعىلىمدامادان ءوتىپ جاتىر.
بۇل تۋرالى وقۋ- اعارتۋ ءمينيسترى عاني بەيسەمبايەۆ شىعىس قازاقستان وبلىسى تۇرعىندارىمەن كەزدەسۋدە ايتتى، دەپ حابارلايدى Kazinform.
«ساپالى ءبىلىم بەرۋدىڭ نەگىزى -مۇعالىمدەردىڭ الەۋەتىن ۇزدىكسىز ارتتىرۋ. وسىعان وراي پەداگوگتەردى كاسىبي دامىتۋ جۇيەسى تۇبەگەيلى وزگەرىپ جاتىر. بيىل 142 مىڭ پەداگوگ بىلىكتىلىكتى ارتتىرۋ كۋرستارىنان وتۋدە. نەگىزگى نازار اۋىل پەداگوگتەرىنە باعىتتالعان. ولاردىڭ ۇلەسى %70 دى قۇرايدى»، -دەپ اتاپ ءوتتى عاني بەيسەمبايەۆ.
ۆەدومستۆو باسشىسىنىڭ ايتۋىنشا، ءبىرىنشى باسشىلاردىڭ كاسىبي الەۋەتىن ءتيىمدى پايدالانۋ ماقساتىندا مىڭعا جۋىق بالاباقشا مەڭگەرۋشىسى، مەكتەپ جانە كوللەدج ديرەكتورلارى روتاتسيالاندى.
«پرەزيدەنتتىك جاستار كادرلىق رەزەرۆىنىڭ ۇلگىسى بويىنشا «ءبىلىم بەرۋدەگى وزگەرىستىڭ 1000 كوشباسشىسى» ىرىكتەلىپ، پيلوتتىق رەجيمدە دايارلاۋدان ءوتىپ جاتىر. وسىلايشا، 2024 -جىلدان باستاپ جىل سايىن جاڭا فورماتتاعى باسشىلاردىڭ كادرلىق رەزەرۆى تولىقتىرىلادى. كوللەدجدەردەگى مەنەدجمەنت جۇيەسىن جاقسارتۋ ءۇشىن وسىنداي كادرلىق رەزەرۆتى جاساقتاۋ جۇمىستارى ورتا كاسىپتىك- تەحنيكالىق ءبىلىم بەرۋ ۇيىمدارىندا دا قولعا الىنباق»، — دەدى مينيستر.
سونداي- اق ۇزدىك ءبىلىم بەرۋ ۇيىمدارىنىڭ باسشىلارىن «بولاشاق» باعدارلاماسى بويىنشا 3-6-ايلىق كۋرسقا شەتەلدىك ستاجيروۆكاعا جىبەرۋ جۇمىستارى جالعاسادى.
