قازاقستانداعى قوعامدىق كولىكتىڭ 36 پايىزى - شىققانىنا 20 جىلدان اسقان جارامسىز اۆتوبۋستار
بيىل سەگىز ايدا قازاقستاننىڭ اۆتوبۋس پاركى كولىكتەرىنىڭ سانى رەكوردتىق كورسەتكىشكە جەتتى - 105,5 مىڭ. 2022 -جىلدىڭ قىركۇيەك ايىنىڭ باسىمەن سالىستىرعاندا ءوسىم - 27,2 پايىز. تاسىمالداۋشىلار پاركىنىڭ ۇلعايۋى ەكىنشى جىل قاتارىنان بايقالىپ وتىر، دەپ حابارلايدى Kazinform اگەنتتىگى Ranking تالداۋىنا سىلتەمە جاساپ.
ۇلتتىق ستاتبيۋرونىڭ دەرەكتەرىنە سۇيەنسەك، جالپى كولىك پاركىندە ەلەكتروبۋستار وتە از - بار بولعانى 32 كولىك.
«جاسىل» اۆتوبۋستار نەگىزىنەن استانا مەن الماتىدا جۇرەدى. سونداي زاماناۋي اۆتوبۋستاردىڭ ءبىرازى تۇركىستان وبلىسى مەن شىمكەنتتە دە تىركەلگەن.
جالپى، قازاقستاندىق اۆتوبۋس پاركىن ەسكىرگەن دەپ ايتۋعا بولادى. بارلىق اۆتوبۋستاردىڭ 35,9 پايىز (نەمەسە 37,9 مىڭى) - 20 جىلدان اسقان ەسكى، تاعى 40,4 مىڭ دانا ارنايى كولىك (38,3 پايىز) 10-0 جىل بويى جولاۋشى تاسىمالداپ كەلەدى.
تەك 7,8 مىڭ كولىككە ءالى ءۇش جىل تولماعان. ەلدەگى جالپى اۆتوبۋس پاركىندەگى جاڭا اۆتوبۋستاردىڭ ۇلەسى - 7,4 پايىز عانا.
بىلتىرعى سايكەس كەزەڭمەن سالىستىرعاندا 0,7 پايىزدىق تارماققا تومەندەدى.
قازاقستاندا اۆتوبۋس شىعاراتىن وتاندىق كاسىپورىندار - سارانداعى QazTehna، سەمەيدەگى «سەماز» جانە الماتىداعى Hyundai Trans Almaty بار ەكەنىنە قاراماستان وسىنداي جاعداي قالىپتاسىپ وتىر.
10 جىلدان اسقان جولاۋشىلاردى تاسىمالداۋعا ارنالعان ارنايى تەحنيكانىڭ جالپى ۇلەسى بيىل 1-قىركۇيەكتە 74,4 پايىز بولدى.
بۇل بىلتىرعىمەن سالىستىرعاندا كوپ. ءبىر قىزىعى، اۆتوبۋس سانى بويىنشا جاڭا ستاتيستيكالىق رەكوردقا ەسكى اۆتوبۋستار جەتىپ وتىر.
بيىل قوسىمشا تىركەلگەن 22,5 مىڭ كولىكتىڭ جارتىسىنا جۋىعى - 12,1 مىڭ كولىك 20 جىلدان ەسكى بولسا، تاعى 5,8 مىڭ اۆتوبۋس 10-20 جىل بويى جۇمىس ىستەپ تۇر.
بىلتىر اقپاندا قازاقستاندا 10 جىلدان اسقان اۆتوبۋستاردى باستاپقى تىركەۋگە تىيىم سالاتىن زاڭ كۇشىنە ەندى. بۇل كەم دەگەندە ون جىلدان بەرى جۇمىس ىستەپ كەلە جاتقان جولاۋشىلار تاسىمالى ءۇشىن پايدالانىلعان ارنايى تەحنيكانى ەندى ەلگە اكەلۋ مۇمكىن ەمەس دەگەندى بىلدىرەدى.
ءبىراق نارىقتاعى ساۋدانىڭ نەگىزگى بولىگى وسى ەسكى اۆتوبۋستارعا قاتىستى. ماسەلەن، بيىل تامىزدا تىركەلگەن اۆتوبۋستاردىڭ 51,9 پايىز - 10 جىلدان ەسكى بولسا، سالىستىرمالى تۇردە جاڭا تەحنيكانىڭ ۇلەسى از بولدى - 7,6 پايىز.
اۆتوكولىك كاسىپورىندارىنىڭ پاركىن جۇيەلى تۇردە جاڭارتۋعا كەدەرگى كەلتىرەتىن نەگىزگى فاكتورلاردىڭ ءبىرى - ينۆەستيتسيانىڭ جەتكىلىكسىزدىگى.
الەمنىڭ كوپتەگەن ەلدەرىندە قالالىق جولاۋشى تاسىمالى مەملەكەت تاراپىنان سۋبسيديالانادى، ويتكەنى بۇل الەۋمەتتىك ماڭىزى بار بيزنەس كوبىنە ءتيىمسىز.
قازاقستاندا دا جاعداي وسىنداي: ءبىزدىڭ ەلدە دە قۇقىقتىق نورمالار قابىلدانعان، سوعان سايكەس تاسىمالداۋشىلار الەۋمەتتىك ماڭىزى بار باعىتتار بويىنشا شىعىنداردى جابۋ ءۇشىن بيۋدجەتتەن سۋبسيديا الۋى ءتيىس.
دەگەنمەن سەناتور ەۆگەني بولگەرتتىڭ دەرەكتەرىنە سۇيەنسەك، بيۋدجەتتىك ترانشتى تەك بىرنەشە وبلىستىڭ اۆتوبۋس پاركتەرى الادى. كوبىنە مەملەكەتتىك اۆتوكولىك پاركتەرىنە سۋبسيديا تۇراقتى تۇردە بولىنەدى جانە ولار جابدىقتى جاڭارتادى.
جەكە تاسىمالداۋشىلار قيىن جاعدايعا تاپ بولدى.
«بىلتىر جەرگىلىكتى اتقارۋشى ورگاندار بولگەن 113 ميلليارد تەڭگەنىڭ 55 ميلليارد تەڭگەسى الماتىعا، 15 ميلليارد تەڭگەسى شىمكەنتكە ءتۇستى. ياعني، كەيبىر وڭىرلەر سۋبسيديالاۋ تەتىگىن بەلسەندى تۇردە قولدانسا، باسقالارى قالدىق نەگىزدە نەمەسە مۇلدە جاسامايدى»، - دەدى دەپۋتات سەنات وتىرىسىندا.
اۆتور
جانات قاپالبايەۆا
