قازاقستانداعى بالالار حيرۋرگياسىنىڭ نەگىزىن قالاۋشى كامال ورمانتايەۆ ومىردەن وزدى

قارالى حاباردى س. ج. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ باسپا ءسوز قىزمەتى جەتكىزدى.

قازاقستاننىڭ بالالار حيرۋرگياسى، پەدياتريا، تراۆماتولوگيا مەن انەستەزيولوگياسىنىڭ نەگىزىن قالاۋشى كامال ورمانتايەۆ 1936 -جىلى 11-قىركۇيەكتە قىزىلوردا وبلىسىنىڭ قارماقشى اۋدانىندا دۇنيەگە كەلگەن.

جوعارى بىلىكتى بالالار حيرۋرگى كامال ورمانتايەۆ كوكىرەك قۋىسى، وكپە، وڭەش، قۇرساق قۋىسى، باس سۇيەك پەن بۇيرەك مۇشەلەرىنە جيىرما ءتورت مىڭعا جۋىق كۇردەلى وتا جاساعان.

كامال ورمانتايەۆ 1953 -جىلى الماتى مەملەكەتتىك مەديتسينا ينستيتۋتىنىڭ پەدياتريا فاكۋلتەتىنە تۇسەدى. 1959 -جىلى الماتى مەملەكەتتىك مەديتسينا ينستيتۋتىنىڭ بالالار حيرۋرگياسى كافەدراسىنىڭ كلينيكالىق ورديناتۋراعا ءتۇسىپ، 1961 -جىلى كلينيكالىق ورديناتۋرانى جانە 1965 -جىلى كانديداتتىق ديسسەرتاتسيانى قورعاپ گوسپيتالدىك حيرۋرگيا كافەدراسىنىڭ اسپيرانتۋراسىن ءتامامدايدى. سودان سوڭ كامال ءسارۋار ۇلى جوعارى وقۋ ورنىندا بالالار حيرۋرگياسى كافەدراسىنىڭ اسسيستەنتى بولىپ ەڭبەك جولىن باستايدى.

1971 -جىلى كسرو معا پەدياتريا عىلىمي- زەرتتەۋ ينستيتۋتىندا دوكتورانتۋرانى بىتىرگەننەن سوڭ دوكتورلىق ديسسەرتاتسيانى قورعاپ، وعان پروفەسسور اتاعى بەرىلدى.

1968 -جىلدان باستاپ 2012 -جىلعا دەيىن كامال ءسارۋار ۇلى ورمانتايەۆ بالالار حيرۋرگياسى كافەدراسىن باسقاردى. كافەدرانى باسقارعان 43 جىلدىڭ ىشىندە بىلىكتى ۇستازدىڭ قولىنان 1500 دەن استام دارىگەر بولاشاققا جولداما الىپ، كوبىسى وبلىسارالىق بالالار حيرۋرگياسى بويىنشا ۇلتتىق ورتالىقتاردىڭ جەتەكشىلەرى، كافەدرا مەڭگەرۋشىلەرى اتاندى. اكادەميك كامال ورمانتايەۆ جوعارى بىلىكتى ماماندار دايىنداۋدا حيرۋرگتاردىڭ كاسىبي جان-جاقتى دامۋىن، عىلىمنىڭ دامۋىنا جانە ونىڭ حالىقارالىق دەڭگەيگە كوتەرىلۋىنە ۇلكەن كوڭىل ءبولدى.

كامال ورمانتايەۆ 320 دان اسا عىلىمي جۇمىستاردىڭ، بالالار حيرۋرگياسى بويىنشا كەڭەستىك نۇسقاۋلارداعى 9 تاراۋدىڭ جانە 9 مونوگرافيانىڭ اۆتورى.

دارىگەر II دارەجەلى «دوستىق»، III دارەجەلى «بارىس» جانە «پاراسات» وردەندەرىمەن ماراپاتتالعان.

اۆتور

الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى