قازاقستاندا وسىمدىك مايى ءوندىرىسى 26 پايىزعا ارتتى
استانا. KAZINFORM - 2024 -جىلى مايلى داقىلدار القابى 2,9 ميلليون گەكتارعا دەيىن جەتكىزىلدى. مايلى داقىلدار ەگىستىكتەرىنىڭ ەڭ كوپ القاپتارى سولتۇستىك قازاقستان (جالپى ەگىس القابىنىڭ 23,3 پايىز)، قوستاناي (23 پايىز)، پاۆلودار (12,5 پايىز)، اباي (10,2 پايىز)، اقمولا (9,2 پايىز) جانە شىعىس قازاقستان (7,7 پايىز) وبلىستارىنا تيەسىلى.
ق ر اۋىل شارۋاشىلىعى مينيسترلىگى باسپا ءسوز قىزمەتىنىڭ حابارلاۋىنشا، مايلى داقىلداردىڭ ءونىمى 3,3 ميلليون توننانى قۇرادى، بۇل 2023 -جىلمەن سالىستىرعاندا 53 پايىزعا ارتىق (2,1 ميلليون توننا). وسى كولەمنىڭ 1,8 ميلليون تونناسىن كۇنباعىس قۇرادى.
وسىمدىك مايى ءوندىرىسى ءوسۋىن جالعاستىرۋدا. قازاقستاندا جىلىنا شامامەن 4,0 ميلليون توننا شيكىزاتتى قايتا وڭدەۋ قۋاتى بار 88 كاسىپورىن جۇمىس ىستەيدى. ولار نەگىزىنەن شىعىس قازاقستان، سولتۇستىك قازاقستان جانە اباي وبلىستارىندا شوعىرلانعان.
2024 -جىلى بارلىعى 753 مىڭ توننا وسىمدىك مايى ءوندىرىلدى، بۇل 2023 -جىلمەن سالىستىرعاندا 12 پايىزعا ارتىق (672,1 مىڭ توننا). 2025 -جىلعى قاڭتار- اقپاندا ءوندىرىس كولەمى 2024 -جىلدىڭ ۇقساس كەزەڭىمەن سالىستىرعاندا 26,7 پايىزعا، 124,8 مىڭ توننادان 158,1 مىڭ تونناعا دەيىن ۇلعايدى. ونىڭ ىشىندە كۇنباعىس مايى ءوندىرىسى 22,4 پايىزعا - 113 مىڭ توننادان 138,2 مىڭ تونناعا دەيىن ۇلعايدى.
وتكەن جىلى وسىمدىك مايى ەكسپورتىنىڭ كولەمى 582,1 مىڭ توننانى قۇرادى، بۇل 2023 -جىلمەن سالىستىرعاندا 12 پايىزعا ارتىق. ونىمدەر ق ح ر-دا جوعارى سۇرانىسقا يە، وزبەكستان، تاجىكستان، اۋعانستان، قىرعىزستان، لاتۆيا جانە تۇرىكمەنستان ەلدەرىندە ەكسپورت ۇلەسى جالپى كولەمنىڭ 42,4 پايىزىن الادى.
قايتا وڭدەلگەن ونىمدەردىڭ ەكسپورتتىق الەۋەتىن ارتتىرۋ ءۇشىن قازاقستان قىتايمەن ىنتىماقتاستىقتى دامىتۋدى جالعاستىرۋدا. قول قويىلعان سانيتارلىق جانە فيتوسانيتارلىق تالاپتار حاتتامالارى مايلى داقىلداردى قايتا وڭدەۋ ونىمدەرىن ەكسپورتتاۋ ءۇشىن قوسىمشا مۇمكىندىكتەر اشادى.
سونداي-اق، ماي سالاسىنىڭ باسەكەگە قابىلەتتىلىگىن ارتتىرۋ ءۇشىن ا و ك سۋبەكتىلەرىن، سونىڭ ىشىندە مايلى داقىلداردى قايتا وڭدەۋ كاسىپورىندارىن سۋبسيديالاۋ باعدارلاماسى بويىنشا قولداۋ كوزدەلگەن. وسى باعدارلاما شەڭبەرىندە قارجى ينستيتۋتتارىمەن اينالىم قاراجاتىن تولىقتىرۋعا قارىز شارتتارىن جاساسقان كاسىپورىندار جەڭىلدىكتى كرەديتتەر الا الادى، بۇل سالانىڭ ودان ءارى دامۋىنا ىقپال ەتەدى.
وسىعان دەيىن اۋىل شارۋاشىلىعى ونىمدەرىن قايتا وڭدەۋدى دامىتۋدىڭ كەشەندى جوسپارى قابىلدانعانى تۋرالى جازدىق.
