قازاقستاندا گولليۆۋد فيلمدەرى تۇسىرىلەدى

تەلەشوۋ جانە كينو ءتۇسىرۋ بويىنشا ىنتىماقتاستىق قوس ەلدىڭ ۇلتتىق مادەنيەتىن دارىپتەپ، ايماق ەكونوميكاسىن دامىتۋعا سەپتىگىن تيگىزەدى دەگەن سەنىم مول. العاشقى فيلمدى قازاقستاندا ءتۇسىرۋ جوسپارلانىپ وتىر.

امەريكالىق WonderHill Studios كومپانياسى قازاقستان جانە گرۋزيا ەلدەرىمەن ىنتىماقتاستىق تۋرالى مەموراندۋمعا قول قويدى. سالتاناتتى شارا سيناندالي قالاسىندا ءوتتى.

مارۆين پيرت، WonderHill Studios كوماپنياسىنىڭ باس ديرەكتورى:

- COVID-19 كەسىرىنەن ستۋديامىز فيلم ءتۇسىرۋدى توقتاتىپ، تەلەباعدارلاما وندىرىسىنە دەن قويدى. ءبارى امەريكالىق كورەرمەن اراسىندا كەڭىنەن تانىلدى. قازىر قايتادان كينو ءتۇسىرىلىمىن قولعا الىپ جاتىرمىز. وسى رەتتە گرۋزيامەن سەرىكتەستىك ورناتۋدى ءجون كوردىك. قازاقستان دا ءبىزدىڭ جوبالارعا قاتىسۋعا دايىن. مەنىڭشە، مۇنداي ىنتىماقتاستىق ايماققا جاڭا مۇمكىندىكتەر اشادى.

العاشقى بىرلەسكەن كوركەم فيلم قازاقستان مەن ا ق ش- تا تۇسىرىلەدى. تۋىندىنىڭ جەلىسى ەرلەر اراسىنداعى بايگەدە باس جۇلدەنى قانجىعاسىنا بايلاعان تۇڭعىش قازاق قىزى جايلى ءوربيدى.

توم تيچولز، سسەناريست:

- مەن قازاقستاننىڭ ءبىراز وڭىرىنە ساياحاتتاپ، ءتۇرلى ادامدارمەن تانىستىم. ولاردان قازاق حالقىنىڭ سالت- ءداستۇرى تۋرالى كوپ نارسە ءبىلدىم. فيلم تۇسىرۋگە بولاتىنداي وقيعالار مەن اڭگىمەلەر ەستىدىم. سول كەزدە بايگە ءداستۇرى مەن ادامداردىڭ ومىرلىك قۇندىلىعى تۋرالى تولىققاندى فيلم تۇسىرۋگە بولادى دەگەن وي كەلدى. مەنىڭشە، ا ق ش- تا بايگەگە ءتۇسىپ جۇرگەن قازاق قىزى جايلى شىعارما امەريكالىقتاردىڭ كوڭىلىنەن شىعادى دەپ ويلايمىن.

فيلمنىڭ سسەناريى دايىن. قازىر ارتىستەر ىرىكتەلىپ جاتىر. باستى ءرولدى ا ق ش- تاعى قانداسىمىز ايانات كىسەنباي سومدايدى. اكتەر قالىڭ كورەرمەنگە «كوشپەندىلەر»، «ءلايلانىڭ زارى» فيلمدەرى ارقىلى تانىس.

ايانات كىسەنباي، اكتريسا:

- رەجيسسەر ساتىبالدى نارىمبەتوۆتىڭ ارقاسىندا كىشكەنتاي كەزىمدە «ءلايلانىڭ زارى» فيلمىنە ءتۇسۋ باقىتى بۇيىردى. سول كەزدەن بەرى قازاق پەن گولليۆۋد كينوسىنىڭ بىرلەسىپ جۇمىس ىستەۋىن ارمانداپ كەلدىم. امەريكادا ۇزاق جىلدار بويى ءومىر ءسۇرىپ كەلسەم دە، وسى ارمانىم جاقىندا ورىندالاتىن سياقتى.

فيلمنىڭ بيۋدجەتى - 45 ميلليون دوللار. تۋىندى كەلەسى جىلى تۇسىرىلەدى. سونىڭ ارقاسىندا 2,5 مىڭ جاڭا جۇمىس ورنى اشىلماق.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى