قازاقستاندا ەت قىمباتتاي ما-ءمينيستردىڭ جاۋابى
اۋىل شارۋاشىلىعى ءمينيسترى ايداربەك ساپاروۆ ەلىمىزدەگى ەت باعاسىنا قاتىستى تۇسىنىك بەردى، دەپ حابارلايدى Kazinform.
«قازىر ەلىمىزدە ەت باعاسى تۇراقتى دەڭگەيدە، ياعني 2,5 مىڭ تەڭگەدەن اسقان جوق. بۇل تۇرعىدا وسى باعادان اسپايدى دەپ ويلايمىز. ويتكەنى بىزدە مالدى تىرىدەي شەتكە شىعارۋعا شەكتەۋ قويىلدى. قوسىمشا كيىكتىڭ ەتى ەت كومبيناتتارى ارقىلى ساتىلىپ جاتىر. بۇل جاعداي دا ءبىرشاما اسەرىن بەرەدى»، - دەدى ا. ساپاروۆ سەناتتا اگرارلىق عىلىمدى دامىتۋ تاقىرىبىنا ارنالعان ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.
وسى ورايدا مينيستر قوستاناي وبلىسىندا كيىك ەتىنەن كونسەرۆى شىعارىلا باستاعانىن ەسكە سالدى.
اتاپ ايتقاندا، اقمولا وبلىسى قورعالجىن اۋدانىنىڭ سابىندى اۋىلىنداعى ەت كومبيناتى - «وحوتزووپروم» مەكەمەسىنىڭ قىزمەتكەرلەرى اتقان كيىك ەتىن تۇرعىندارعا ساتاتىن جەتى ورىننىڭ ءبىرى. Kazinform اگەنتتىگىنىڭ ءتىلشىسى استانا قالاسىنان 70 شاقىرىم جەردەگى نىسانعا بارىپ، كيىك ەتى قالاي ساتىلىپ جاتقانىن كورىپ قايتقان ەدى.
