قازاقستاندا ەت باعاسى وسە مە - ا ش م جاۋاپ بەردى

ۆيتسە-مينيستر بىلتىردىڭ قورىتىندىسى بويىنشا 1,1 ميلليون توننادان استام سيىر ەتى مەن قوي ەتى وندىرىلگەنىن، بۇل كورسەتكىش ەل ىشىندەگى سۇرانىستى تولىق وتەيتىنىن اتاپ ءوتتى.

- 2024 -جىلدىڭ قورىتىندىسىنا قاراساق، ءوندىرۋ كولەمى شامامەن 4 پايىزعا، ونىڭ ىشىندە سيىر ەتى 2 پايىزدان استام دەڭگەيگە ءوستى. بۇل باعىتتاعى ءىس-شارالار حالىقتىڭ ەتكە دەگەن سۇرانىسىن تولىق قاناعاتتاندىرۋعا مۇمكىندىك بەرەدى، سوندىقتان ەت باعاسىنىڭ وسۋىنە نەگىز جوق، - دەدى ە. كەنجەحان ۇلى سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، ەت باعاسىنىڭ كوتەرىلۋىنە وزبەكستان جاعىنان بولعان جوعارى سۇرانىس اسەر ەتكەن.

- ءبىراق سوڭعى اپتادا بايقاعانىمىزداي، باعا تۇراقتاندى جانە قازىر ءوسىمنىڭ باسقا فاكتورلارىن كورىپ تۇرعانىمىز جوق، - دەدى ۆيتسە-مينيستر.

سونىمەن قاتار ول قازىرگى كەزدە مال شارۋاشىلىعىمەن اينالىساتىن فەرمەرلەرگە 5 پايىزدىق مولشەرلەمەمەن جەڭىلدەتىلگەن قارجىلاندىرۋدى ءبولۋ قاراستىرىلىپ جاتقانىن اتاپ ءوتتى.

- بۇل قادامدار ەلىمىزدە ەت ءوندىرۋدى ودان ءارى ىنتالاندىرادى. قازىر سيىر ەتىنىڭ باعاسى كەلىسىنە شامامەن 2700-3000 تەڭگەنى قۇراپ تۇر»، - دەدى ەرمەك كەنجەحان ۇلى.

بۇعان دەيىن حابارلانعانداي، ۆيتسە-مينيستر ەلىمىزدە ءسابىزدىڭ جاپپاي ءبۇلىنۋى دەرەكتەرى انىقتالماعانىن ءمالىم ەتتى.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى