قازاقستاندا سيرەك كەزدەسەتىن جانۋارلار تىزىمىنە تاعى 11 ءتۇرى ەنگىزىلمەك
استانا. KAZINFORM - قازاقستانداعى سيرەك كەزدەسەتىن جانۋارلار تىزىمىنەن 21 ءتۇرى شىعارىلادى. بۇل تۋرالى سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ وتىرىسىندا نۇركەن شاربيەۆ ءمالىم ەتتى.
- رەسپۋبليكا اۋماعىندا 835 ومىرتقالى جانۋار ءتۇرى مەكەندەيدى، ونىڭ ىشىندە سۇتقورەكتىلەر – 178، قۇستار – 489، باۋىرىمەن جورعالاۋشىلار – 49، قوسمەكەندىلەر – 12، بالىقتار - 104. قازاقستانداعى سيرەك جانە جويىلىپ كەتۋ قاۋپى تونگەن جانۋارلار تىزىمىنە 227 ءتۇرى ەنگىزىلگەن، ونىڭ ىشىندە 132 ومىرتقالى جانە 96 ومىرتقاسىز جانۋار ءتۇرى بار، - دەدى ن. شاربيەۆ.
ونىڭ ايتۋىنشا، جويىلىپ كەتۋ قاۋپى بار اڭداردىڭ ءتىزىمىن جاڭارتۋ جۇمىستارى اتقارىلىپ جاتىر. بۇل تۇرعىدا قاۋىپتىڭ ازايۋىنا بايلانىستى ومىرتقاسىزدار ساناتىنداعى 21 ءتۇرى تىزىمنەن شىعارىلماق. سونداي-اق ومىرتقاسىزداردىڭ 6 (شاياننىڭ 3 ءتۇرى مەن جاندىكتەردىڭ 3 ءتۇرى) ءتۇرىن جانە ومىرتقالى 5 (قۇستىڭ 2 ءتۇرى مەن كەسىرتكەنىڭ 2 ءتۇرى جانە سۇتقورەكتىنىڭ 1 ءتۇرى) ءتۇرىن تىزىمگە قوسۋ ۇسىنىلىپ وتىر.
- بۇل تۇرلەرىن ساقتاۋ مينيسترلىكتىڭ باسىم باعىتى سانالادى. ەلىمىزدىڭ بيوالۋانتۇرلىلىگىن ساقتاۋ ماقساتىندا جۇرگىزىلگەن شارالاردىڭ ارقاسىندا توعاي بۇعىسى، قۇلان، ارقار، قاراقۇيرىق سياقتى سيرەك كەزدەسەتىن تۇرلەردىڭ پوپۋلياتسياسى ارتتى، - دەدى ۆيتسە-مينيستر.
بۇدان بۇرىن حابارلانعانداي، ق ر پارلامەنتى دەپۋتاتتارىنىڭ باستاماشىلىعىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اڭشىلىق سالاسى جانە جانۋارلار دۇنيەسىن ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماجىلىسكە ەنگىزىلدى.
