قازاقستاندا پسيحولوگيالىق قىزمەت تۋرالى ارنايى زاڭ ازىرلەنىپ جاتىر

- مەكتەپتە بالالارمەن جۇمىس ىستەيتىن پسيحولوگتار مەن پسيحولوگيالىق قىزمەتكە قاتىستى ءبىزدىڭ دەپۋتاتتار ساۋالىن دا جولدادى. ولاردىڭ جالاقى ماسەلەسى دە كوتەرىلدى. كادر دايارلاۋدا دا پروبلەما بارشىلىق. كادر جەتىسپەۋشىلىگى، قالاي دايارلاپ جاتىرمىز بۇل ماڭىزدى. قازىر پسيحولوگيالىق قىزمەت كورسەتەتىن ورتالىقتار اشىلىپ، جۇمىس ىستەپ جاتىر، ءبىراق ونىڭ تيىمدىلىگىنە قاتىستى ماسەلەلەر بار. ءبىز پسيحولوگيالىق قىزمەت باعىتىندا زاڭ جوباسىن دايىنداۋعا كىرىستىك، - دەدى اسحات ايماعامبەتوۆ ءماجىلىستىڭ كوميتەت وتىرىسىندا.

حالىق قالاۋلىسىنىڭ ايتۋىنشا، قازىر جاڭا جوباسى بويىنشا جۇمىس ءجۇرىپ جاتىر.

ءماجىلىس دەپۋتاتى اينا ءمىسىرالىموۆانىڭ ايتۋىنشا، ەلىمىزدە پسيحولوگيالىق قىزمەتكە قاتىستى ءبىرقاتار شارا بار، اتقارىلىپ جاتىر، ءبىراق جەتكىلىكسىز.

- پرەزيدەنتتىڭ 2023 -جىلعى قازاقستان حالقىنا جولداۋىندا جانە «AMANAT» پارتياسىنىڭ سايلاۋ الدى باعدارلاماسىندا قازاقستاندىقتاردىڭ دەنساۋلىعىن قامتاماسىز ەتۋ ماسەلەلەرىنە ۇلكەن ءمان بەرىلەدى. وسكەلەڭ ۇرپاقتىڭ پسيحيكالىق دەنساۋلىعىنىڭ پسيحولوگيالىق قولداۋ قىزمەتتەرىن قۇرۋدىڭ ماڭىزدىلىعى اتاپ وتىلەدى. وسى تاپسىرمالار اياسىندا ءبىراز جۇمىس اتقارىلۋدا. سەگىزىنشى شاقىرىلىمداعى كوپتەگەن زاڭ جوباسى حالىقتىڭ بەلگىلى ءبىر ساناتىن پسيحولوگيالىق قولداۋعا بايلانىستى ماسەلەلەردى شەشۋدى كورسەتتى. بۇل بالالىق شاق پەن انانى قورعاۋ، تۇرمىستىق زورلىق-زومبىلىق پەن بۋللينگپەن كۇرەس، لۋدومانيا، حالىقتى الەۋمەتتىك قورعاۋ ماسەلەلەرىنە قاتىستى زاڭ جوبالارى بولدى. بۇگىندە «AMANAT» پارتياسى «پسيحولوگيالىق كومەك تۋرالى» زاڭ جوباسىن ازىرلەۋدە، - دەيدى دەپۋتات.

بۇعان دەيىن ءماجىلىس دەپۋتاتى اسحات ايماعامبەتوۆ ايتۋىنشا ەلىمىزدە پسيحولوگيالىق قىزمەت كورسەتۋدىڭ ءتيىستى نورمالارى بار، ءبىراق ول شاشىراڭقى ەكەنىن ايتقان ەدى.

ايتا كەتەيىك، ەلىمىزدە مىنەز-قۇلقى پسيحيكالىق بۇزىلعان (اۋىتقۋى بار) 204408 ادام بار. ونىڭ ىشىندە 44781 كامەلەت جاسىنا تولماعان بالالار مەن جاسوسپىرىمدەر.

سونداي-اق پسيحيكالىق اۋىتقۋى بار ادام قانداي جاعدايدا ماجبۇرلەپ ەمدەۋگە جىبەرىلەتىنى تۋرالى جازعان ەدىك.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى