قازاقستاندا سۇندەتكە وتىرعىزۋ قىزمەتى قانشا تۇرادى

قازاقستانداعى جەكە ەمحانالار جانە مەملەكەتتىك اۋرۋحانالاردا سۇندەتكە وتىرعىزۋ قىزمەتى بار. باعاسى قىزمەت تۇرىنە قاراي ەرەكشەلەنەدى. حيرۋرگتەر ۇلداردى لازەرمەن جانە ءداستۇرلى تۇردە پىشەدى. سونىمەن بىرگە وتا جاساۋ كەزىندە بالالار ويىن وينايدى نەمەسە مۋلتفيلم كورەدى. رەيتينگ جاساۋ كەزىندە حيرۋرگ كەڭەسى مەن قاجەتتى اناليز تاپسىرۋ قۇنىن قوسپاي، تەك سۇندەتكە وتىرعىزۋ باعاسى تاڭدالدى.

تاراز، پاۆلودار مەن اتىراۋدا قىزمەت قۇنى ەڭ تومەن بولىپ شىقتى. مۇندا باعا 10 مىڭ تەڭگەدەن باستالادى.

شىمكەنتتە حيرۋرگتەردىڭ قىزمەتى ءسال جوعارى. قازىر 12000 تەڭگە بولىپ تۇر. كىشكەنتاي بالالاردى عانا ەمەس، ەرەسەك ەر ادامداردى دا پىشتىرەدى. كوبىنە مەديتسينالىق كورسەتكىش سەبەپ بولىپ جاتادى. شىمكەنتتە بۇل قىزمەت قۇنى 30 مىڭنان باستالىپ، 50 مىڭ تەڭگەگە دەيىن جەتەدى.

كوكشەتاۋ، اقتاۋ، قوستاناي مەن تالدىقورعاندا سۇندەتكە وتىرعىزۋ قۇنى 15 مىڭ تەڭگەدەن باستالادى.

سودان كەيىنگى ورىندا اقتوبە تۇر. مۇندا سۇندەتكە وتىرعىزۋ قىزمەتى 18000 تەڭگەدەن باستالادى. بالا Sony PlayStation وينايتىن بولسا، جەكە ەمحانالار 25000 تەڭگە سۇرايدى.

تۇركىستان، جەزقازعان، سەمەي، قىزىلوردا قالالارىندا قىزمەت قۇنى 20 مىڭ تەڭگەدەن باستالادى. تۇركىستاننىڭ كەيبىر اۋىلىندا سۇندەتكە وتىرعىزۋ تەگىن. تەك ءوزىڭىز سىي-قۇرمەت كورسەتسەڭىز بولادى.

ال قىزىلوردادا حيرۋرگتىڭ سۇندەتكە وتىرعىزۋ قىزمەتى تەك جەكە ەمحانالاردا بار. ال وبلىستىق بالالار اۋرۋحاناسىندا بۇل قىزمەت قاراستىرىلماعان.

باعاسى جوعارى وڭىرلەردىڭ ۇشتىگىنە وسكەمەن مەن استانا كىرەدى. مۇندا سۇندەتتەۋ قىزمەتى 25 مىڭ تەڭگەدەن باستالادى. ەل استاناسىندا بالانىڭ جايلىلىعى ءۇشىن قوسىمشا 10-15 مىڭ تەڭگە تولەۋ كەرەك.

رەيتينگ بويىنشا ەكىنشى ورىندا قاراعاندى، ورال مەن الماتى قالالارى تۇر. مۇندا باعا 30 مىڭنان باستالادى. الماتىداعى كەيبىر كلينيكادا سۇندەتكە وتىرعىزۋ قىزمەتى 100 مىڭ تەڭگەگە دەيىن جەتەدى.

ەلىمىزدە سۇندەتكە وتىرعىزۋ قىزمەتىنىڭ ەڭ قىمباتى پەتروپاۆلدا بولىپ شىقتى. مۇندا حيرۋرگ قىزمەتى 35 مىڭ تەڭگەدەن باستالادى.

ايتىپ وتەيىك، كەيبىر كلينيكادا حيرۋرگ، انەستەزيولوگتان كەڭەس الۋ، اناليز تاپسىرۋ مىندەتتەلەدى. مۇنىڭ اربىرىنە بولەك-بولەك اقشا تولەۋ كەرەك.

Kazinform بۇعان دەيىن ەلەكتريك پەن سانتەحنيكتىڭ قىزمەت اقىسىن ءبىلدى.

اۆتور

التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى