قازاقستاندا قىزىلشا بويىنشا ەپيدەميولوگيالىق جاعداي تۇراقتالىپ كەلەدى
استانا. KAZINFORM - سوڭعى 2 ايدا ەلىمىزدە قىزىلشا اۋرۋى %38 عا تومەندەدى. بۇل تۋرالى ق ر دەنساۋلىق ساقتاۋ مينيسترلىگى حابارلادى.
قوسىمشا يممۋنداۋ شەڭبەرىندە ۆاكسينالاۋعا جاتاتىن ادامداردىڭ %92 ەكپە العان.
«بۇل رەتتە قىزىلشامەن سىرقاتتانعانداردى تىركەۋ ءالى دە جالعاسۋدا. وسىعان بايلانىستى اتا-انالار بالالارىندا قىزىلشاعا قارسى ەكپەنىڭ بولۋىن قاداعالاۋى قاجەت. ۆاكسينالاۋ بولماعان جاعدايدا تىركەلگەن جەرى بويىنشا ەمحانادا ۆاكسينا الۋدى ۇسىنامىز»، - دەپ جازدى مينيسترلىك.
سونىمەن بىرگە، ۆەدومستۆو قىزىلشانىڭ ەنتسەفاليت (ميدىڭ قابىنۋى)، وكپەنىڭ قابىنۋى، وتيت (قۇلاقتىڭ قابىنۋى) سەكىلدى اسقىنۋلارعا اكەپ سوعاتىن قاۋپىن ەسكە سالدى.
قىزىلشانىڭ بەلگىلەرى ج ر ۆ ي بەلگىلەرىنە ۇقسايدى: دەنە قىزۋى كوتەرىلەدى، جوتەل جانە اۋرۋدىڭ 4-5 كۇندەرى بورتپە پايدا بولادى.
«قىزىلشانىڭ الدىن الۋدىڭ جالعىز سەنىمدى قۇرالى - ۋاقىتىلى ۆاكسينالاۋ. ەكپە 1-6 جاس ارالىعىنداعى بالالارعا جۇرگىزىلەدى. ۆاكتسينالاۋ ارقىلى بالالارىڭىزدى قىزىلشانىڭ اۋىر تۇرىنەن جانە ونىڭ سالدارىنان قورعاي الاسىز. قازاقستاندا قىزىلشاعا قارسى د د س ۇ سەرتيفيكاتتاعان قاۋىپسىز جانە ءتيىمدى ۆاكسينا قولدانىلادى. ەلىمىزدە ۆاكسينادان كەيىنگى قولايسىز جاعدايلار تىركەلمەگەن»، - دەيدى مينيسترلىك.
