قازاقستاندا قىستا موپەد ايداۋعا بولا ما؟
استانا. قازاقپارات - قازاقستاندا، اسىرەسە الماتىدا، موپەدتەر جەتكىزۋ قىزمەتتەرىنىڭ اراسىندا ۇلكەن تانىمالدىلىققا يە. جىل بويى كوشەلەردە تاپسىرىستاردى جىلدام جەتكىزىپ جۇرگەن جۇزدەگەن كۋرەرلەردى كورۋگە بولادى. الايدا، ايازدا موپەدتى پايدالانۋ قانشالىقتى قاۋىپسىز جانە ورىندى؟ اكىمشىلىك پوليتسيا كوميتەتىنىڭ وكىلدەرى بۇل ماسەلەگە قاتىستى پىكىر ءبىلدىردى.
اكىمشىلىك پوليتسيا كوميتەتىنىڭ حابارلاۋىنشا، قازاقستاندا قىس مەزگىلىندە موپەدتەردى پايدالانۋعا رەسمي تىيىم سالىنباعان. سوندىقتان، تەوريا جۇزىندە، بۇل كولىكتى جىل بويى قولدانۋعا بولادى.
دەگەنمەن، قىستا ارنايى ەرەجەلەر بار. قازاقستان نارىعىندا موپەدتەرگە ارنالعان ارنايى قىسقى شينالار جوق. بۇعان موپەدتەردىڭ نەگىزىنەن اۋا رايى جىلى ەلدەردە كەڭىنەن تانىمال بولۋى سەبەپ.
موپەد جۇرگىزۋشىلەرى، اسىرەسە كۋرەرلەر، تابىس تابۋ ءۇشىن تاۋەكەلگە بارىپ جاتادى. مۇز نەمەسە قار باسقان جولدار مۇنداي كولىك ءۇشىن قاۋىپتى بولۋى مۇمكىن.
سوندىقتان قىستا موپەدتى تەك باتىل نەمەسە وعان ءماجبۇر بولعان ادامدار ايداپ جاتادى. كولىكتىڭ بۇل ءتۇرىن تاڭداعان ادامدار ونىڭ سالدارىن تۇسىنە ءبىلۋى قاجەت. الايدا، قىستا موپەدپەن ءجۇرىپ، وزىمەن قوسا، وزگەلەرگە دە قاۋىپ توندىرەتىنىن ۇمىتپاعان ءجون.
