قازاقستاندا قوناق ءۇي جۇيەسىنە رەفورما جۇرگىزىلەدى
استانا. KAZINFORM - ەلىمىزدەگى قوناق ۇيلەردىڭ دەنى زاماناۋي ءارى حالىقارالىق ستاندارتتارعا سايكەس كەلمەيدى. بۇل تۋرالى تۋريزم جانە سپورت ءمينيسترى ەربول مىرزابوسىنوۆ ءمالىم ەتتى.
- قوناق ءۇي سەرۆيسىنىڭ ساپاسىن ارتتىرۋ ءۇشىن قوناق ۇيلەردى جىكتەۋ جۇيەسىن رەفورمالاۋ جوسپارلانىپ وتىر. قولدانىستاعى قوناق ءۇي كريتەريلەرى 2008 -جىلدان بەرى وزگەرتىلمەگەن، - دەدى ەربول مىرزابوسىنوۆ ۇكىمەت وتىرىسىندا.
ءمينيستردىڭ مالىمدەۋىنشە، ەلىمىزدەگى قوناق ۇيلەردىڭ دەنى زاماناۋي ءارى حالىقارالىق ستاندارتتارعا سايكەس كەلمەيدى.
- تۋريستەردىڭ ساپارىن جەڭىلدەتىپ، جايلى ەتۋ ماقساتىندا شەكارالىق وتكىزۋ پۋنكتتەرىندە ۇيىمداستىرىلعان تۋريستىك توپتارعا باسىمدىق بەرۋ، جاسىل ءدالىز تەتىگىن ەنگىزۋ كوزدەلىپ وتىر. قازىر اتالعان مەحانيزم رەسەي مەن قىرعىزستان شەكاراسىندا پيلوتتىق رەجيمدە جۇمىس ىستەپ تۇر، - دەيدى ول.
ەسكە سالا كەتسەك، وتكەن جىلى ۇكىمەت باسشىسى ولجاس بەكتەنوۆ ەلىمىزدەگى قوناق ۇيلەردىڭ باعا ساياساتىنا شاعىم كوپ ەكەنىن ايتقان ەدى.
بۇعان دەيىن ەلىمىزدە شارۋالارعا اگروتۋريزممەن اينالىسۋعا رۇقسات بەرۋ ماسەلەسى قارالىپ جاتقانىن حابارلاعان ەدىك.
اۆتور
داۋلەت ىزتىلەۋ
