قازاقستاندا قاتتى قالدىقتاردى رەتتەۋ تۇجىرىمداماسى ازىرلەنىپ جاتىر

- بيىل 28-ناۋرىزدا پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا كوممۋنالدىق جانە وندىرىستىك قالدىقتارمەن جۇمىس ىستەۋ سالاسىنداعى ساياساتتى جۇيەلى تۇردە قايتا قاراۋ قاجەتتىلىگىنە ەرەكشە نازار اۋدارىلدى، - دەدى جومارت اليەۆ استانادا وتكەن IX ەۋرازيالىق بيزنەس فورۋمىندا.

وسى ورايدا ەكولوگيا جانە تابيعي رەسۋرستار مينيسترلىگى مۇددەلى تاراپتارمەن ءبىرقاتار باستامانى قولعا الدى:

- 2025-جىلعى 1-قىركۇيەككە دەيىن بارلىق قالدىق ءتۇرىن باسقارۋ جونىندەگى تۇجىرىمداما ازىرلەۋ؛

- قالدىقتاردى باسقارۋ سالاسىنداعى جوبالاردى ىسكە اسىرۋ جۇمىسىن جانداندىرۋ جانە قارجىلاندىرىلعان جوبالار سانىن 5 ەسە ارتتىرۋ؛

- قالدىقتاردى ەنەرگەتيكالىق كادەگە جاراتۋ سالاسىنداعى جوبالار تىزبەسىن ايقىنداۋ؛

- قالدىقتاردى ەسەپكە الۋ جانە مونيتورينگ جۇرگىزۋ بويىنشا سيفرلىق شەشىم ەنگىزۋ؛

- ءوڭىر اكىمدىكتەرىنە قالدىقتاردى سۇرىپتاۋ جانە قايتا وڭدەۋ جونىندەگى ءار جوبانى پايدالانۋعا بەرىلگەنگە دەيىن تولىق سۇيەمەلدەۋدى قامتاماسىز ەتۋ.

- ونەركاسىپ جانە قۇرىلىس جانە ەنەرگەتيكا مينيسترلىگىنە وندىرىستىك قالدىقتاردى قايتا وڭدەۋمەن اينالىساتىن ونەركاسىپتىك جانە ەنەرگەتيكالىق كاسىپورىندارعا قولداۋ كورسەتۋ مەن ىنتالاندىرۋدىڭ ناقتى شارالارىن ازىرلەۋ.

- جوعارىدا اتالعان قادامدار قالدىقتارمەن جۇمىس ىستەۋدىڭ ورنىقتى ءارى اشىق جۇيەسىنە جەدەل كوشۋگە ساياسي ەرىك-جىگەر بار ەكەنىن كورسەتەدى جانە سالاداعى ۇلتتىق ستراتەگيانى كۇشەيتۋگە نەگىز، - دەيدى ءمينيستردىڭ ورىنباسارى.

بۇعان دەيىن ەكولوگيا ۆيتسە-ءمينيسترى جومارت الييەۆ قازاقستاندا «جاسىل» سالىق ەنگىزۋ تۋرالى ۇسىنىستى جان-جاقتى تالداۋ قاجەتتىگىن ايتقان ەدى.

ايتا كەتەيىك، بۇگىن استانادا «جاڭارتىلاتىن ەنەرگيا جانە قالدىقتاردى قايتا وڭدەۋ» اتتى تاقىرىپتا Ⅸ ەۋرازيالىق بيزنەس-فورۋم ءوتتى. اتالعان جيىندا ءماجىلىس دەپۋتاتى اجار ساعىندىقوۆا قازاقستاندا قالدىقتاردى باسقارۋ بويىنشا جەكە زاڭ جوباسىن ازىرلەۋ كەرەكتىگىن ايتىپ، «جاسىل» سالىق ەنگىزۋدى ۇسىندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى