قازاقستاندا قاراقۇمىق پەن كۇرىش باعاسى قانداي

قاراقۇمىق: كەلىسى 155 تەڭگەدەن 1000 تەڭگەگە دەيىن

ەڭ ارزان قاراقۇمىق پاۆلودار قالاسىندا ەكەن. كەلىسى 155 تەڭگەدەن. قوستانايدا الەۋمەتتىك قاراقۇمىق باعاسى 177 تەڭگەدەن باستالادى. پەتروپاۆلدا 178 تەڭگەدەن ساتىلسا، استانا، قاراعاندى، جەزقازعان قالالارىندا باعا 180 تەڭگەدەن باستالادى.

ەلدىڭ باتىسىنداعى كەيبىر وڭىرلەردە قىمباتىراق، اتاپ ايتقاندا اقتوبە مەن اقتاۋدا 184 پەن 194 تەڭگەنىڭ اراسىندا. كوكشەتاۋدا قاراقۇمىقتىڭ باعاسى 190 تەڭگەدەن باستالادى.

قازاقستاننىڭ وڭتۇستىگى مەن شىعىسىندا بۇل داقىلدىڭ باعاسى بۇدان دا جوعارى: تارازداعى باعا 240 تان 900 تەڭگەگە دەيىن جەتەدى. ەڭ قىمباتى قاپتاماداعى جوعارى سۇرىپتى تازارتىلعان 800 گرامم قاراقۇمىق 700 تەڭگەدەن ساتىلادى. تۇركىستانداعى باعا 280 نەن 670 تەڭگەگە دەيىن، سەمەيدە، قىزىلوردادا جانە تالدىقورعاندا قاراقۇمىق كەلىسى 300 تەڭگەدەن باستالادى.

شىمكەنتتە 350 تەڭگەدەن، وسكەمەندە 380 تەڭگەدەن جوعارى.

باتىس ءوڭىرى دە باعانىڭ وسۋىنەن قۇر الاقان ەمەس. ورال مەن اتىراۋدا الەۋمەتتىك قاراقۇمىق 350 تەڭگەدەن باستالادى. الايدا دۇكەندەردەگى قاپتاماداعىنىڭ باعاسى 800 تەڭگەنى قۇرايدى.

كەلىسى 535 تەڭگەدەن باستالىپ، قاپتاماداعىسى 1000 تەڭگەگە دەيىن جەتەتىن ەڭ قىمبات قاراقۇمىق الماتى مەن قونايەۆ قالالارىندا.

كۇرىش: كەلىسى 385 تەڭگەدەن 1600 تەڭگەگە دەيىن

قازاقستانداعى كۇرىش باعاسى ءار وڭىردە ءارتۇرلى. ەڭ قولجەتىمدى باعا اقتاۋ قالاسىندا. بۇل جاقتا كۇرىشتىڭ كەلىسىن 385 تەڭگەدەن تابۋعا بولادى.

كەلىسى 410-425 تەڭگەدەن پاۆلودار مەن اقتوبە قالالارىندا ساتىلادى. الايدا بۇل جاقتا پالاۋعا ارنالعان قاپتاماداعى كۇرىشتى 600 تەڭگەگە الاسىز.

ەلدىڭ وڭتۇستىگىندەگى باعا باياۋلاپ ءوسىپ كەلە جاتىر. تالدىقورعاندا اق داقىلدىڭ باعاسى 430 تەڭگەدەن باستالادى. ال سەمەي مەن قىزىلوردادا 450 تەڭگەدەن. تالدىقورعاندا پالاۋعا ارنالعان قاپتاماداعى كۇرىش باعاسى 1000 تەڭگەگە جەتەدى.

قاراعاندى مەن جەزقازعاندا كۇرىش كەلىسى 435 تەڭگەدەن، ال قاپتاماداعى كۇرىش باعاسى - 500 تەڭگە.

كۇرىش كوكشەتاۋ مەن پەتروپاۆلدا ءسال قىمباتىراق. مۇندا كەلىسىنىڭ ەڭ تومەنگى باعاسى سايكەسىنشە 521 جانە 536 تەڭگەدەن باستالادى. ءبىراق پەتروپاۆلدا ۇزىن ءداندى كۇرىشتىڭ ءبىر قاپتاماسى 600 تەڭگەگە دەيىن ساتىلادى. بۇل ەڭ قولجەتىمدى باعالاردىڭ ءبىرى.

ورال مەن اتىراۋداعى باعا جوعارى. ورالدا قىسقا ءداندى كۇرىشتىڭ كەلىسى 480 تەڭگەدەن، ال اتىراۋدا 755 تەڭگەدەن ساتىلۋدا. الماتى، قونايەۆ جانە تۇركىستان قالالارى سالىستىرمالى تۇردە ورتاشا باعالارمەن كوڭىل قۋانتادى. مۇندا كۇرىشتىڭ كەلىسى - 550 تەڭگە، پالاۋعا ارنالعان كاپتاماداعى كۇرىشتىڭ كەلىسى - 700-750 تەڭگەدەن.

ەلىمىزدىڭ شىعىسىنداعى وسكەمەندە دە كۇرىشتىڭ كەلىسى 550 تەڭگەدەن ساتىلۋدا. دەگەنمەن، قاپتاماداعى كۇرىش باعاسى 1000 تەڭگەگە جەتەدى.

تارازدا كۇرىشتىڭ كەلىسى 560 تەڭگە تۇرسا، ال قاپتاماداعى داقىل باعاسى 1200 تەڭگەگە جەتەدى.
ال استاناداعى كۇرىش كەلىسى 685 تەڭگەدەن، پاكەتتەگى كۇرىش باعاسى 1000 تەڭگەگە دەيىن ساتىلىپ جاتىر.

شىمكەنتتەگى باعا وزگە وڭىرلەرگە قاراعاندا باسقاشا. بۇل جەردە قىسقا ءداندى داقىلدى كۇرىشتىڭ كەلىسى 800 تەڭگەدەن، ال پالاۋعا ارنالعان قاپتاماداعى ۇزىن سۇرىپتى باسماتي كۇرىشىنىڭ باعاسى - 1600 تەڭگە.

قوستاناي كۇرىش قۇنىنىڭ قىمباتتىعىنان كوش باستاپ تۇر. كەلىسى 835 تەڭگەدەن جانە قاپتاماداعى باعاسى 867 تەڭگەگە دەيىن ساتىلۋدا.

سونىمەن، پالاۋدى اقتاۋ، پاۆلودار، اقتوبە قالالارىندا ءپىسىرۋ ارزانعا شىعادى. بۇل جاقتاردا جوعارى سۇرىپتى كۇرىش پەن قاپتاماداعى ءونىم دە قولجەتىمدى باعادا. ال شىمكەنت پەن قوستاناي قالالارىندا كۇرىش باعاسىنىڭ قالتاعا مولىراق سالماق سالاتىنى بايقالادى.

تومەن باعاداعى داقىلدى ىزدەگەن تۇتىنۋشىلار ەلدىڭ سولتۇستىگى مەن شىعىسىنان ساتىپ السا بولادى. مىسالى، پەتروپاۆل مەن پاۆلوداردا قاراقۇمىق پەن كۇرىش ەڭ قولجەتىمدى باعا بولىپ قالا بەرەدى. باعا جوعارى وڭتۇستىك پەن باتىستا الەۋمەتتىك دۇكەندەردەن نەمەسە ناۋقان ۋاقىتىندا ساتىپ الۋعا بولادى.

ءونىم باعاسى ءبىر قالانىڭ وزىندە ءارتۇرلى بولۋى مۇمكىن ەكەنىن ەستە ۇستاعان ءجون. ال ساپاسى مەن سۇرىپى تىكەلەي باعاعا اسەر ەتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى