قازاقستاندا قانشا جانارماي قورى بار - ۆيتسە-ءمينيستردىڭ جاۋابى
ەلىمىزدەگى اي-92 ماركالى بەنزيننىڭ قازىرگى قورى ءبىر ايدان استام ۋاقىتقا جەتەدى. ال ديزەلدىڭ قورى 36 كۇنگە، اي-95 ماركالى بەنزين قورى 24 كۇنگە جەتەدى.
ەنەرگەتيكا ۆيتسە-ءمينيسترى ەرلان اقكەنجەنوۆ ب ا ق وكىلدەرىمەن وتكەن بريفينگىدە وسىنداي مالىمەت كەلتىردى، دەپ حابارلايدى قازاقپارات ءتىلشىسى.
«ءبىزدىڭ ەسەپتەگى دەرەكتەر بويىنشا جانە جيناقتالعان قور مەن قازان ايىنداعى جوندەۋ ماۋسىمى كەلە جاتقانىن ەسكەرىپ ايتساق، قازاقستان بۇل كەزەڭدى قانداي دا ءبىر توسىن وقيعاسىز وتكىزەدى دەپ وتىرمىز. بەنزين بولادى»، - دەدى ول.
ەرلان اقكەنجەنوۆتىڭ سوزىنشە، ەلدە ەكى ايعا جەتەتىن اۋە جانارمايىنىڭ قورى بار.
«جانارماي قورى تۋرالى ايتساق، بەنزين جەتكىلىكتى. اۋە وتىنى شامامەن ەكى ايعا، اي-92 ماركالى بەنزين ءبىر ايدان استام ۋاقىتقا، ديزەل 36 كۇنگە، اي-95 ماركالى بەنزين، قاتەلەسپەسەم، 24 كۇنگە جەتۋ كەرەك»، - دەدى ۆيتسە-مينيستر.
