قازاقستاندا قانداي ەسىمدەردى قويۋعا بولمايدى
استانا. KAZINFORM - ادىلەت مينيسترلىگىنىڭ وكىلى تالعات ءۋالي قازاقستاندىقتارعا اتى-ءجونىن وزگەرتۋ بارىسىندا قانداي تالاپ قويىلاتىنىن ايتتى، دەپ حابارلايدى El.kz اقپارات اگەنتتىگى.
ستاتيستيكالىق دەرەكتەر بويىنشا، قازاقستاندا جىلىنا ورتا ەسەپپەن 12 مىڭ ادام اتى-ءجونىن وزگەرتەدى.
ول دەگەنىمىز ادام ءوزىنىڭ اتىن تولىق وزگەرتىپ تاستاۋ دەگەن ءسوز ەمەس. ادامنىڭ تەگىندەگى «وۆ»، «يەۆ» دەگەن سياقتى جالعاۋلاردى الىپ تاستاپ جاتادى. مىسالى، «ۋلى» دەپ كەتكەن قاتەلەردى «ۇلى» دەپ تۇزەتەدى. دەگەنمەن ازاماتتاردىڭ تولىق اتىن وزگەرتەتىن جاعدايلار دا بار، - دەدى تالعات ءۋالي.
سوزىنشە، ەلىمىزدە ادامنىڭ اتىن وزگەرتۋگە زاڭمەن تىيىم سالىنباعان. دەگەنمەن ادامنىڭ اتىن وزگەرتۋدىڭ وزىندىك تالاپتارى بار.
ادامنىڭ اتىندا قانداي دا ءبىر بوعاۋىز سوزدەردىڭ بولۋى، قوسارلانعان اتتاردىڭ بولۋى، مىسالى، ۇيىندە باسقاشا، ال قوعامدا باسقاشا ايتۋى مۇمكىن جاعدايلار كەزدەسەدى. سول كەزدە جانىنداعى ارىپتەستەرىنەن ارنايى ارىزدى الۋ ارقىلى، قوسارلانعان اتى بار ەكەنىن دالەلدەۋ ارقىلى ادام ءوزىنىڭ اتىن اۋىستىرا الادى. سونىمەن قاتار وعان ءبىر نەمەسە ەكى رەت قانا وزگەرتە الادى دەگەن تىيىم جوق، - دەدى ىدىلەت مينيسترلىگىنىڭ وكىلى.
تالعات ءۋالي اتا-انا بالاسىنا ەسىم قويار كەزىندە تولىق جاۋاپكەرشىلىك ءوز ەرىكتەرىندە بولاتىنىن جەتكىزدى.
ادامنىڭ ەسىمى تەك كيريلليتسامەن، نە لاتىنشا، نە قازاق ارىپتەرىمەن جازىلۋ كەرەك دەگەن تالاپ جوق. كەز كەلگەن اتا-انا ءوزىنىڭ بالاسىنا قانداي ەسىم قويعىسى كەلسە، قانداي ارىپتەرمەن جازىلسا دا ءوز ەركىنە بەرىلەدى. بالاسىنا قانداي ەسىم قويامىن دەسە دە شەكتەۋ جوق، - دەدى ول.
سونىمەن قاتار ول «قازاقستاندا قانداي ەسىمدەردى قويۋعا بولمايدى؟» دەگەن سۇراققا جاۋاپ بەرە كەتتى.
قازاقستاندا ناقتى مىناداي ەسىمدەردى قويۋعا بولمايدى دەگەن ءتىزىم جوق. ەگەر ەسىمىندە بوعاۋىز، بەيادەپ سوزدەر بولاتىن بولسا، وندا حالىققا قىزمەت كورسەتۋ ورتالىعىنىڭ قىزمەتكەرلەرى ادامنىڭ ەسىمىن باسقالاي قويۋعا كەڭەس بەرەدى. ال ەسىمىن وزگەرتكىسى كەلەتىن ازامات 16 جاسقا تولعاندا جەكە كۋالىگىن الۋعا كەلگەن كەزدە ءوز ەسىمىندەگى بوعاۋىز سوزدەردى قالدىرامىن دەسە، وندا وعان ىشكى ىستەر ورگاندارى قارسى بولۋى مۇمكىن. ول كەزدە ەسىمىن وزگەرتۋگە تۋرا كەلۋى مۇمكىن، - دەپ ءتۇسىندىردى.
قوسارلانعان، ەكى سوزدەن نەمەسە دەفيس (-) ارقىلى جازىلاتىن ەسىمدەردى دە قويۋعا بولادى. ءبىراق ول ەكى سوزدەن كوپ بولماۋى كەرەك.
