قازاقستاندا نوتاريۋس قىزمەتى قانشا تۇرادى

بۇرىن نوتاريۋس قىزمەتى ەلىمىزدە عانا ەمەس، ءبىر ايماقتىڭ ءوز ىشىندە دە ءارتۇرلى بولدى. ادامدار ۇنەمدەۋ ءۇشىن ءتيىمدى جولىن ىزدەي باستادى. ءبىراق 2012 -جىلى قازاقستاندا ءبىرىڭعاي تاريف ەنگىزىلدى. بۇل ازاماتتارعا تەڭ مۇمكىندىك بەردى. سونىمەن بىرگە ءبىرىڭعاي تاريف ادامدارعا شىعىندى الدىن الا جوسپارلاپ، ارتىق شىعىننىڭ الدىن الۋعا كومەكتەستى. تولەم جۇيەسى قازىرگى كەزدە ا ە ك-كە تىكەلەي بايلانىستى.

نوتاريۋس كابينەتىندەگى قىزمەت باعاسىنا بىرنەشە فاكتور اسەر ەتەدى. بىرىنشىدەن، باج سالىعىن (ق ر سالىق كودەكسىنىڭ 536-بابى نەگىزىندە رەتتەلەدى) تولەۋ كەرەك. ەكىنشىدەن، نوتاريۋس قىزمەتىنىڭ باعاسى قۇقىقتىق جانە تەحنيكالىق («نوتاريات تۋرالى» زاڭىنىڭ 30-1-بابى نەگىزىندە رەتتەلەدى) بولىپ كەلەدى.

ايماقتىق نوتارياتتىق پالاتا جەرگىلىكتى جەكە نوتاريۋستاردىڭ قىزمەت قۇنىنا ەش اسەر ەتە المايدى. تاريفتى تەك ق ر زاڭناماسى جانە ادىلەت مينيسترلىگى رەتتەيدى. قۇجاتتى شۇعىل راسىمدەۋ كەزىندە دە قوسىمشا اقى الىنبايدى. تەك ۇيگە بارىپ قىزمەت كورسەتكەن كەزدە قوسىمشا اقى سۇراۋى مۇمكىن.

2022 -جىلى اەك ەلىمىزدە 3063 تەڭگە بولدى. ءبىر جىل وتكەن سوڭ 3450 تەڭگەگە جەتتى. ال بىلتىر 3692، 2025 -جىلى 3932 تەڭگە بولدى. ءسويتىپ بارلىق نوتارياتتىق شىعىن %6,5 ءوستى.

ءبىرىڭعاي نوتارياتتىق اقپاراتتىق جۇيەدە 41 پۋنكت بار. وسىنىڭ اياسىندا قازاقستانداعى جەكە نوتاريۋس كابينەتتەرى ءوز قىزمەتتەرىن ۇسىنادى. ءبىز كوپشىلىك اراسىندا كەڭ تارالعان قىزمەت ءتۇرىنىڭ اقىسىن سالىستىرىپ كوردىك. سونىڭ ىشىندە جىلجىمايتىن مۇلىكتى، مۇراگەرلىكتى، سەنىمگەرلىكتى جانە وزگە دە جەكە قۇجاتتاردى راسىمدەۋ قۇنىن سالىستىردىق.

كەڭ تاراعان قىزمەتتىڭ ءتۇرى - مۇلىك مەنشىگىنەن ايىرۋ قىزمەتى. بۇعان ساتۋ- ساتىپ الۋ، سىيعا تارتۋ، ايىرباستاۋ، رەنتا كىرەدى. بۇل قىزمەت قۇنى قالا مەن اۋىلعا ءارتۇرلى. قالادان ءۇي ساتىپ الساڭىز نوتاريۋسقا 19660 تەڭگە، باج سالىعىنا 27524 تەڭگە تولەيسىز. بارلىعى 47184 تەڭگە بولادى. اۋىلدا بۇل قىزمەت 10616 تەڭگە تۇرادى. ماسەلەن، ءسىز جىلجىمايتىن مۇلىكتى تۋىسىڭىزدىڭ اتىنا (بالا، جۇبايى، اتا-اناسى، نەمەرە، ءىنىڭىز نەمەسە قارىنداسىڭىز) اۋدارساڭىز، ەكى ەسە ارزانعا تۇسەدى. قالادا قىزمەت 27524، ال اۋىلدا 5898 تەڭگە تۇرادى.

قازاقستاندا مۇراگەرلىك قۇقىق تۋرالى كۋالىك باعاسى 15728 تەڭگە. مۇلىكتى پايدالانۋ جانە يەلىك ەتۋ قۇقىعىنا سەنىمحاتتاردى كۋالاندىرۋ باعاسى 9830 تەڭگە. ساتۋ قۇقىعىنسىز اۆتوكولىك قۇرالدارىن پايدالانۋ جانە باسقارۋ قۇقىعىنا سەنىمحاتتاردى كۋالاندىرۋ - 7864 تەڭگە.

وسيەتتەردى كۋالاندىرۋ قىزمەتى - 11796 تەڭگە. قۇجاتتاردىڭ نوتاريات كۋالاندىرعان كوشىرمەلەرىن بەرۋ - 2752 تەڭگە.

قۇجاتتارداعى قويىلعان قولدىڭ، سونداي-اق قۇجاتتاردىڭ ءبىر تىلدەن باسقا تىلگە اۋدارماسىنىڭ دۇرىستىعىن كۋالاندىرۋ (ءاربىر قۇجات ءۇشىن) - 2083 تەڭگە. قۇجاتتاردى جانە باعالى قاعازدى ساقتاۋ ءۇشىن بىررەتىك 1966 تەڭگە، ال اي سايىن 393 تەڭگە تولەۋ كەرەك.

باعا جەكە تۇلعالارعا بولەك قارالدى. زاڭدى تۇلعالار ءۇشىن بۇل قىزمەت %50-70، كەيبىر ءتۇرى ەكى ەسە قىمبات.

اۆتور

التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى