قازاقستاندا ەنەرگيانى ۇنەمدەۋ جۇمىستارى قالاي ءجۇرىپ جاتىر

فورۋمنىڭ اشىلۋىندا ءماجىلىس دەپۋتاتى، ەكولوگيا جانە تابيعاتتى پايدالانۋ ماسەلەلەرى جونىندەگى كوميتەت ءتوراعاسى ەدىل جاڭبىرشين مەملەكەت باسشىسى قاسىم-جومارت توقايەۆتىڭ بيىلعى جولداۋىندا ەنەرگيانى ۇنەمدەۋ جانە تيىمدىلىگىن ارتتىرۋ سالاسىن ەرەكشە اتاپ وتكەنىن ەسكە سالدى.

«ۇكىمەت ەىدۇ ستاندارتتارىن ەسكەرە وتىرىپ، قولدانىستاعى ەنەرگيا تيىمدىلىگى ساياساتىن تۇبەگەيلى قايتا قاراۋى قاجەت. بۇل تۋرالى پرەزيدەنت ءوز جولداۋىندا اتاپ ءوتتى. 2029-جىلعا قاراي الدىمىزدا ەنەرگيا تۇتىنۋدىڭ جانە ەنەرگيا سىيىمدىلىعىنىڭ نەگىزگى كورسەتكىشتەرىن كەمىندە %15 عا تومەندەتۋ مىندەتى تۇر. سونداي-اق قازىرگى قالىپتاسقان ەنەرگيا ۇنەمدەۋ جۇيەسىنىڭ باستالۋى 2012-جىلى ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ ساياساتىنىڭ نەگىزگى باعىتتارىن كوزدەيتىن ارنايى زاڭ قابىلداۋ ارقىلى ايقىندالدى»، - دەدى ەدىل جاڭبىرشين.

دەپۋتاتتىڭ ايتۋىنشا، وسى ساياساتتى بەلسەندى ىسكە اسىرۋ ارقىلى قازاقستان 2021-جىلى ەنەرگيا سىيىمدىلىعىنىڭ 2008-جىلعى دەڭگەيىنەن %38,5 تومەندەۋىنە قول جەتكىزدى. الايدا دەپۋتات بۇل سالادا ءالى دە كوپ جۇمىس اتقارىلۋى كەرەك دەپ سانايدى.

«حالىقارالىق ەنەرگەتيكالىق اگەنتتىكتىڭ مالىمەتىنشە، قازاقستاننىڭ ەنەرگيا سىيىمدىلىعى 2021-جىلدىڭ قورىتىندىسى بويىنشا الەمدەگى ورتاشا دەڭگەيدەن ەكى ەسە، ال ە ى د ۇ ەلدەرىمەن سالىستىرعاندا 3,2 ەسە جوعارى بولدى. ەنەرگيا تۇتىنۋدىڭ كوپ بولىگى وندىرىستىك جانە تۇرعىن ءۇي سالالارىنا تيەسىلى. ايتا كەتۋ كەرەك، ونەركاسىپ سەكتورى كۇردەلى جاڭعىرتۋدى تالاپ ەتەدى»، - دەيدى ءماجىلىس دەپۋتاتى.

ق ر ونەركاسىپ جانە قۇرىلىس مينيسترلىگى ونەركاسىپ كوميتەتىنىڭ ءتوراعاسى ازامات پانبايەۆ 2018-جىلى قازاقستان العاش رەت ەنەرگيا ۇنەمدەۋ فورۋمىن وتكىزگەنىن ايتتى. ال 2019-جىلى 11- قاراشا ەنەرگيانى ۇنەمدەۋ كۇنى بولىپ جاريالانعان.

ونىڭ ايتۋىنشا، ب ۇ ۇ باس اسسامبلەياسى 2014-2024-جىلداردى بارلىعى ءۇشىن تۇراقتى ەنەرگەتيكانىڭ ونجىلدىعى دەپ جاريالاعان. ب ۇ ۇ العا قويعان ءۇش ماقساتتىڭ ءبىرى - 2030-جىلعا قاراي ەنەرگيا تيىمدىلىگىنىڭ جاھاندىق كورسەتكىشىن ەكى ەسە ارتتىرۋ.

«ەكونوميكانىڭ دامۋى ەنەرگيا رەسۋرستارىن تۇتىنۋدىڭ وسۋىمەن تىعىز بايلانىستى. ولاردى ءتيىمسىز پايدالانۋ قورشاعان ورتانىڭ سارقىلۋىنا جانە لاستانۋىنا اكەلەدى. بۇل فاكتور الەمدىك قوعامداستىقتى جاۋاپتى تۇتىنۋدى ەنگىزۋ جانە ورنىقتى ءوسۋدى قامتاماسىز ەتۋ بويىنشا باتىل ءىس-قيمىل جاساۋعا ءماجبۇر ەتەدى»، - دەيدى ازامات پانبايەۆ.

تاعى ءبىر ماڭىزدى تاقىرىپ قازاقستاندا ەلەكتروموبيليزاتسيانى دامىتۋ بولدى. ساراپشىلار ەلەكتروموبيلدەر ءۇشىن ينفراقۇرىلىمدى جەدەل دامىتۋ جانە تازا كولىكتى پايدالانۋدى ىنتالاندىرۋ شارالارىن ەنگىزۋ قاجەت ەكەنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى