قازاقستاندا مەملەكەتتىك بيۋدجەتتى باقىلاۋدىڭ جاڭا ءتاسىلى ەنگىزىلەدى

بيىل ەلىمىزدە مەملەكەتتىك ساتىپ الۋ ءۇشىن تاڭبالانعان قۇرالدار تەتىگىن پايدالانۋ بويىنشا پيلوتتىق جوبانى جۇزەگە اسىرۋ جوسپارلانىپ وتىر. ق ر سىبايلاس جەمقورلىققا قارسى ءىس- قيمىل اگەنتتىگى ماماندارى اگەنتتىك تىلشىسىنە سيفرلىق تەڭگەنى تاڭبالاۋ تۋرالى تولىعىراق ايتىپ بەردى.

بۇعان دەيىن قازاقستاننىڭ ۇلتتىق تولەم كورپوراتسياسىنىڭ ءتوراعاسى بينۋر جالەنوۆ سيفرلىق تەڭگە ۇلتتىق ۆاليۋتانىڭ ءۇشىنشى نىسانى ەكەنىن اتاپ وتكەن ەدى.

ونىڭ پىكىرىنشە، يننوۆاتسيالىق قارجى قىزمەتتەرىن قۇرۋ ءۇشىن بلوكچەين تەحنولوگياسىنىڭ الەۋەتىن اشىپ، مەملەكەتتىك شىعىستاردىڭ تيىمدىلىگىن قامتاماسىز ەتەدى. سونداي-اق، ءداستۇرلى قارجى مەن سيفرلىق اكتيۆتەر الەمى اراسىندا «كوپىر» بولماق.

بەلگىلى بولعانداي، تسيفرلىق تەڭگە تاڭبالاۋىشتار قولما-قول اقشانىڭ تسيفرلىق انالوگى تۇرىندە ۇسىنىلعان. ءار تاڭبالاۋىش بەلگىلى ءبىر مانگە ءيا. بيۋدجەتتىك شىعىستارعا بولىنەتىن تسيفرلىق تەڭگەلەر سالا بويىنشا ءارتۇرلى تۇسكە بويالادى ەكەن. مىسالى، مەكتەپ سالۋ ءۇشىن بويالعان سيفرلىق تەڭگە تەك مەكتەپ سالۋ شىعىندارىن تولەۋگە جۇمسالۋعا ءتيىس.

- «اقشانى تاڭبالاۋدى» ىسكە اسىرمەن سىبايلاس جەمقورلىققا قارسى قىزمەتتىڭ، ق ر ۇلتتىق بانكىنىڭ، قارجى مينيسترلىگىنىڭ، اۋىل شارۋاشىلىعى مينيسترلىگىنىڭ، جەرگىلىكتى اتقارۋشى ورگانداردىڭ، سونداي-اق مەملەكەتتىك اقشانى قولدانا وتىرىپ، ءوزارا ەسەپ ايىرىسۋعا قاتىساتىن قارجى ينستيتۋتتارى مەن كۆازيمەملەكەتتىك ۇيىمداردىڭ وكىلدەرى اينالىسادى. سيفرلىق تەڭگە پلاتفورماسىن تىكەلەي ازىرلەۋمەن جانە جەتىلدىرۋمەن ق ر ۇلتتىق بانكىنىڭ ەنشىلەس ۇيىمى - «ۇلتتىق تولەم كورپوراتسياسى» اق اينالىسادى»، — دەلىنگەن Kazinform اگەنتتىگى ءتىلشىسىنىڭ رەسمي سۇراۋىنا كەلگەن جاۋاپتا.

سيفرلىق تەڭگەنى باقىلاۋ جونىندەگى ارنايى قىزمەتتى قۇرۋ تۋرالى شەشىم مەملەكەتتىك ساتىپ الۋ ءۇشىن تاڭبالانعان قۇرالدار تەتىگىن پايدالانۋ جونىندەگى 2024 -جىلعى پيلوتتىق جوبانىڭ ناتيجەلەرىنە سۇيەنە وتىرىپ قابىلدانادى.

انتيكوردا الدىن الا تالقىلاۋ شەڭبەرىندە جوعارىدا اتالعان وكىلەتتىكتەردى مەملەكەتتىك بيۋدجەت اكىمشىلەرىنە بەرۋ كوزدەلىپ وتىرعانى ناقتىلاندى.

ق ر سىبايلاس جەمقورلىققا قارسى ءىس- قيمىل اگەنتتىگى وكىلىنىڭ ايتۋىنشا، توكەندەردى تاڭبالاۋ تەتىگىن ازىرلەۋگە مەملەكەتتىك بيۋدجەتتەن قاراجات بولىنبەيدى. ق ر ۇلتتىق بانكى جوبانى ۇلتتىق قارجى ينفراقۇرىلىمىن دامىتۋ جوسپارىنا سايكەس ازىرلەيدى.

- مەملەكەتتىك ساتىپ الۋعا بولىنگەن اقشالاي قاراجاتتى بيۋدجەتتىك باعدارلامانىڭ يەسى ولاردىڭ ماقساتتى پايدالانىلۋىن قاداعالاۋ ءۇشىن بەلگىلەيتىن بولادى. سيفرلىق تەڭگە توكەندەرىنىڭ تاڭبالانۋى ولاردىڭ يەسىنە كورىنەتىن بولادى، ياعني تاڭبالانعان تسيفرلىق تەڭگەنىڭ يەسى زاڭدى تۇلعا وزىنە تيەسىلى قاراجاتتىڭ تاڭبالانعانىن كورەدى، - دەپ ءتۇسىندىردى انتيكوردا.

قاراجاتتى الۋشىنىڭ شوتىنا تۇسكەن كەزدە بەلگى اۆتوماتتى تۇردە الىنادى دەپ بولجانىپ وتىر.

- زاڭدى تۇلعالاردىڭ شوتتارىنا ەسەپكە الۋ كەزىندە تاڭبالاۋدى الىپ تاستاۋ شارتى ماسەلەسى ازىرگە ۇلتتىق بانكپەن، قارجى مينيسترلىگىمەن جانە باسقا دا مەملەكەتتىك ۇيىمدارمەن تالقىلاۋ ساتىسىندا تۇر. اقشانى تاڭبالاۋ جالاقىنى ەسەپتەۋ كەزىندە، ياعني ەڭبەكاقى تولەۋ قورىنان قاراجاتتى ازاماتتاردىڭ تىكەلەي سيفرلىق شوتتارىنا اۋدارۋ كەزىندە، سونداي-اق تاۋارلاردى، جۇمىستار مەن كورسەتىلەتىن قىزمەتتەردى (تىكەلەي وندىرۋشىلەرگە، يمپورتتاۋشىلارعا، ساۋدا ۇيىمدارىنا جانە ت. ب. ) تولەۋ ءۇشىن تۇپكىلىكتى وندىرۋشىلەرگە جانە وزگە دە سۋبەكتىلەرگە قاراجاتتى ەسەپتەۋ كەزىندە الىنادى دەۋگە بولادى، - دەيدى انتيكور باسشىلىعى.

ەستەرىڭىزگە سالا كەتەيىك، تولىققاندى فۋنكتسيونالى بار سيفرلىق تەڭگەنى ونەركاسىپتىك پايدالانۋعا ەنگىزۋ 2025 -جىلعا جوسپارلانىپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى