قازاقستاندا مۇگەدەكتىگى بار جاندارعا قانداي جەڭىلدىكتەر بار

«مۇگەدەكتىگى بار جانداردىڭ قۇقىقتارى 2023-جىلعى 20- ساۋىردە بەكىتىلگەن ق ر الەۋمەتتىك كودەكسىندە ايقىندالعان. ياعني قازاقستاندا مۇگەدەكتىگى بار ادامدار الەۋمەتتىك قورعالۋعا، مەكتەپكە دەيىنگى تاربيە الۋ مەن وقۋ، ءبىلىم الۋ ءۇشىن جاعدايلارمەن قامتىلۋعا، ق ر زاڭناماسىندا ايقىندالاتىن تارتىپپەن مىندەتتى الەۋمەتتىك مەديتسينالىق ساقتاندىرۋ جۇيەسىندەگى جانە كەپىلدىك بەرىلگەن تەگىن مەديتسينالىق كومەككە، ارناۋلى الەۋمەتتىك قىزمەتتىڭ كەپىلدىك بەرىلگەن كولەمىنە تولىق قۇقىلى»، - دەپ جاۋاپ بەردى مينيسترلىك اگەنتتىكتىڭ رەسمي ساۋالىنا.

ۆەدومستۆونىڭ حابارلاۋىنشا، مۇگەدەكتىگى بار جاندار كاسىپتىك جانە قايتا دايارلىققا، جۇمىسقا ورنالاسۋعا، ينفراقۇرىلىم جانە اقپاراتتاندىرۋ وبەكتىلەرىنە، كولىككە، اقپاراتقا، ويىن-ساۋىق جانە مادەني-بۇقارالىق ءىس-شارالارعا، سپورتتىق سايىستار مەن كورسەتىلەتىن مەملەكەتتىك قىزمەتتەرگە، ءوزىنىڭ سايلاۋ جانە سايلانۋ قۇقىعىن جۇزەگە اسىرۋعا، ق ر تۇرعىن ءۇي زاڭناماسىنا سايكەس باسپاناعا، مەملەكەتتىك جانە وزگە ۇيىمداردا ءبىرىنشى كەزەكتە قىزمەت الۋعا، ق ر كونستيتۋتسياسىندا جانە باسقا دا زاڭنامالىق اكتىلەرىندە بەكىتىلگەن جەكە باسىنىڭ قۇقىقتارى مەن بوستاندىقتارىنا تولىق يە بولادى.

وسىلايشا، رەسپۋبليكالىق بيۋجەتتەن مەملەكەتتىك الەۋمەتتىك جاردەماقىلار، وڭالتۋدىڭ تەحنيكالىق قۇرالدارىمەن (پروتەزدىك-ورتوپەديالىق كومەك، تەحنيكالىق كومەكشى قۇرالدار، ءجۇرىپ-تۇرۋ قۇرالدارى) جانە قىزمەتتەرىمەن (جەكە كومەكشى، ىمداۋ ءتىلى مامانى، ساناتوري- كۋرورتتىق ەمدەۋ) قامتاماسىز ەتىلەدى.

ودان بولەك، جەرگىلىكتى اتقارۋشى ورگاندار مۇگەدەكتىگى بار ادامدارعا الەۋمەتتىك كومەك كورسەتەدى، ونىڭ ىشىندە كوممۋنالدىق تولەم اقىسىن وتەپ بەرۋ، قالالىق كولىكتە تەگىن ءجۇرۋ كىرەدى.

سونىمەن بىرگە، ق ر الەۋمەتتىك كودەكسىنە سايكەس، جەرگىلىكتى اتقارۋشى ورگاندار اۋىر جۇمىستارداعى، ەڭبەك جاعدايلارى زياندى، قاۋىپتى جۇمىس ورىندارىن ەسەپكە الماعاندا، مۇگەدەكتىگى بار ادامدار ءۇشىن جۇمىس ورىندارىنىڭ %2-4 دەيىنگى مولشەردە جۇمىس ورىندارىنا كۆوتا بەلگىلەيدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى