قازاقستاندا ماينينگپەن اينالىساتىندار قالاي جۇمىس ىستەيدى
الماتى. KAZINFORM - قازاقستاندا ماينەرلەر ينفراقۇرىلىمى مەن مۇمكىندىكتەرىنە قاراي ليتسەنزيانىڭ ەكى ءتۇرىن الادى. ءبىرىنشى ءتۇرى - ءتيىستى ينفراقۇرىلىمعا، ياعني دەرەكتەردى وڭدەۋ ورتالىقتارىنا يەلىك ەتەتىن سيفرلىق ماينەرلەر قىزمەتى. ەكىنشىسى - دەرەكتەر ورتالىقتارىندا ۇياشىقتاردى جالعا الاتىن جانە ەنەرگيا كۆوتاسىن تالاپ ەتپەيتىن جابدىق يەلەرى بولىپ سانالاتىن سيفرلىق ماينەرلەر قىزمەتى.
ق ر ۇلتتىق بلوكچەين قاۋىمداستىعىنىڭ ءتوراعاسى داۋرەن قاراشيەۆتىڭ ايتۋىنشا، ءقازىر ەلدە جەكە دەرەكتەردى وڭدەۋ ورتالىعى بار 50 دەن استام جانە دەرەكتەر ورتالىقتارىندا ۇياشىقتاردى جالعا الاتىن 20 دان استام ماينينگپەن اينالىساتىن كومپانيا بار.
- ءبىرىنشى ليتسەنزيا تەك قۇرال- جابدىقتارى عانا ەمەس، قاجەتتى ينفراقۇرىلىمى بار، ونىڭ ىشىندە ەلەكتر ەنەرگياسىن جەتكىزۋشىلەرمەن كەلىسىم- شارتتارى بار كومپانيالارعا بەرىلەدى. ەكىنشى ليتسەنزيا تەك اپپاراتتىق قۇرالدارى بار ماينەرلەرگە ارنالعان. الايدا ەكىنشى ساناتتاعىلار ءوز بەتىنشە جۇمىس ىستەي المايدى، ويتكەنى زاڭ بويىنشا ولار ءتيىستى ينفراقۇرىلىمى بار ءبىرىنشى ساناتتاعى ماينينگپەن اينالىساتىن كومپانيالارعا تەحنيكالارىن ورنالاستىرۋعا مىندەتتى ، - دەپ ءتۇسىندىردى قاراشيەۆ.
ساراپشى قازاقستاندا سالىق پەن ەلەكتر قۋاتىنىڭ تاپشىلىعى سالدارىنان «اق ماينينگ»، ازايىپ بارا جاتقانىن اتاپ ءوتتى.
- قازاقستاندا تسيفرلىق ماينەردىڭ ءوسۋ ديناميكاسى بايقالمايدى. قازىر ولار زاڭنامالىق جۇكتەمەگە بايلانىستى سيفرلىق ماينينگ نارىعىن تاستاپ جاتىر. ولار باسقا يۋريسديكتسياعا نەمەسە كولەڭكەگە كەتەدى، - دەدى ول.
ونىڭ ايتۋىنشا، ماسەلەنى شەشۋ ءۇشىن تەحنولوگيانى دامىتىپ قانا قويماي، زاڭنامانى سالا سۇرانىسىنا بەيىمدەۋ ماڭىزدى.
- اتاپ ايتقاندا، جابدىق يمپورتىنا قوسىلعان قۇن سالىعىن جانە ءداستۇرلى سالىقتارمەن قاتار قولدانىلاتىن سيفرلىق ماينينگ وندىرۋگە سالىناتىن سالىق سياقتى قاجەتسىز سالىقتاردى الىپ تاستالسا، مىسالى، قوسىلعان قۇن سالىعى مەن كورپوراتيۆتىك تابىس سالىعى. الەمنىڭ ەشبىر يۋريسديكتسياسىندا سيفرلىق ماينينگكە سالىق جوق ، - دەپ اتاپ ءوتتى ۇلتتىق بلوكچەين قاۋىمداستىعىنىڭ ءتوراعاسى.
ايتا كەتەيىك، قازاقستاندا ماينينگ ءوندىرۋ وتكەن جىلدىڭ ءساۋىر ايىندا كۇشىنە ەنگەن «سيفرلىق اكتيۆتەر تۋرالى» زاڭمەن رەتتەلەدى.
