قازاقستاندا ماسكۇنەمدەردى ايىقتىرۋ ورتالىقتارى جەتپەي جاتىر – ق ر ءى ءى م

«تۇرمىستىق قىلمىستاردىڭ كوپشىلىگى - شامامەن %80 ماس كۇيىندە جاسالادى. سول سەبەپتى، ماس كۇيىندەگى تۇرمىستىق جانجالقويلاردى وقشاۋلاۋ ماسەلەسى ماڭىزدى بولىپ وتىر. ەلىمىز بويىنشا 880 توسەك-ورنى بار 35 ۋاقىتشا بەيىمدەۋ جانە دەتوكسيكاتسيا ورتالىعى (مەديتسينالىق ايىقتىرعىش) جۇمىس ىستەيدى. بۇل وتە از. ولاردىڭ بارلىعى وبلىس ورتالىقتارىندا جانە رەسپۋبليكالىق ماڭىزى بار قالالاردا ورنالاسقان. بۇل پروبلەما ەڭ وزەكتى بولىپ وتىرعان مونوقالالاردا مۇلدەم جوق»، - دەدى ي. لەپەحا ۇكىمەت وتىرىسىندا.

سپيكەردىڭ ايتۋىنشا، كۇننىڭ ءبىرىنشى جارتىسىندا-اق ايىقتىرعىشتار تولىپ قالادى. كەشكى جانە تۇنگى ۋاقىتتاردا ورىن بولمايدى.

«مىسالى وسكەمەندە 20 توسەك-ورنى بار ءبىر عانا مەكەمە جۇمىس ىستەيدى. وندا پوليتسەيلەر 9 مىڭ قۇقىق بۇزۋشىنى جەتكىزىپ، تەك 5 مىڭ ادامدى ورنالاستىردى. سول سياقتى پاۆلوداردا 24 توسەك-ورىنعا ءبىر عانا ايىقتىرعىش بار. جالپى، ەلىمىز بويىنشا تاعى 582 توسەك-ورىنعا وسىنداي 31 مەكەمە قاجەت»، - دەدى مينيسترلىك وكىلى.

مۇنداي مەكەمەلەر اتىراۋ جانە تۇركىستان وبلىستارىندا - تورتەۋدەن، اقمولا، اقتوبە، جامبىل، قوستاناي جانە ماڭعىستاۋ وبلىستارىندا - ۇشەۋدەن، شىعىس قازاقستان جانە اباي وبلىستارىندا - ەكەۋدەن، سونداي-اق استانا، الماتى، قاراعاندى جانە ۇلىتاۋ وبلىستارىندا - ءبىر-بىردەن قاجەت بولىپ وتىر.

«تاعى ءبىر ماسەلە - ماسكۇنەمدەردى ماجبۇرلەپ ەمدەۋ. بۇل پروتسەدۋرا وتە بيۋروكراتيالانعان. مامانداندىرىلعان مەديتسينالىق مەكەمەلەردىڭ سانى دا جەتكىلىكسىز. بوس توسەك-ورىنداردىڭ بولماۋىنا بايلانىستى 800 ادامعا قاتىستى ماجبۇرلەپ ەمدەۋ تۋرالى سوت شەشىمى ورىندالماي وتىر»، - دەدى ي. لەپەحا.

بۇعان دەيىن يگور لەپەحا قازاقستاندا تۇرمىستىق زورلىق-زومبىلىق جازاسى قالاي كۇشەيتىلگەنىن ايتىپ بەرگەن ەدى.

سونداي-اق، تۇرمىستىق زورلىق-زومبىلىق بويىنشا وتباسىلاردىڭ %43 تاتۋلاسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى