قازاقستاندا مانداريننىڭ كەلىسى قانشا تۇرادى

قازاقستانعا ماندارين قىتاي، پاكىستان، ماروككو مەن تۇركيادان جەتكىزىلەدى. سونىمەن بىرگە يران، مىسىر، ءتىپتى وڭتۇستىك افريكا، ارگەنتينا مەن پەرۋدەن دە اكەلىنەدى. وسىنىڭ ىشىندە تۇرىك تسيترۋسى سۇرانىسقا يە. سوندىقتان ءبىز دە وسى ەلدەن اكەلىنگەن مانداريننىڭ وڭىرلەردەگى باعاسىن سالىستىرىپ كوردىك.

تۇرىك ماندارينىنىڭ كەلىسى 1000-1820 تەڭگە تۇرادى

ەلىمىزدە ەڭ تومەن باعا ورال، تالدىقورعان، كوكشەتاۋ قالالارىندا تىركەلدى. مۇندا باعا 1000-1400 تەڭگە ارالىعىندا.

ال الماتى مەن قونايەۆتا باعا ءسال ارزان. مۇندا سيترۋس باعاسى 1300 تەڭگەدەن باستالادى. پەتروپاۆلدا ماندارين باعاسى 1350-دەن باستالىپ، 1500 تەڭگەگە جەتەدى. ال اتىراۋدا كەلىسى 1430 تەڭگە دەپ كورسەتىلگەن.

ال ەلىمىزدىڭ وڭتۇستىگىندە باعا الدەقايدا جوعارى. ماسەلەن تارازدا تۇرىك ماندارينىنىڭ كەلىسى 1400 دەن باستالادى. ال تۇركىستان مەن قىزىلوردادا باعا كەلىسىنە 1500 تەڭگە. 
ال ەلىمىزدىڭ ورتالىعىندا، ياعني، قاراعاندى مەن جەزقازعاندا شامامەن 1400-1800 تەڭگە ارالىعىندا. پاۆلوداردا دا وسى باعا. ال قوستانايدا مانداريننىڭ كەلىسى 1400-1580 تەڭگە تۇرادى.

ەلوردامىزدا ماندارين كەلىسى 1590 تەڭگە دەپ بەلگىلەنگەن. ال قازاقستاننىڭ شىعىسىندا باعاسى جوعارى. سەمەيدە ماندارين قۇنى 1450 تەڭگەدەن باستالىپ، 1700 تەڭگەگە دەيىن جەتەدى. وسكەمەندە تسيترۋستىڭ بۇل ءتۇرى 1800 تەڭگە. بۇل ەڭ جوعارى باعانىڭ ءبىرى.
ەلىمىزدىڭ باتىسى دا قالىسپاي تۇر. تۇركيادان جەتكىزىلگەن ماندارين اقتوبە قالاسىندا 1500 تەڭگە تۇرادى. ال اقتاۋدا كەلىسى 1800 تەڭگە.

ماندارين شىمكەنتتە قىمبات. مۇندا كەلىسى 1820 تەڭگە تۇرادى.

باعا نەگە ءارقيلى؟

وزگە ەلدەن جەتكىزىلەتىن جەمىس-جيدەك، سونىڭ ىشىندە ماندارين باعاسىنا بىرنەشە فاكتور اسەر ەتەدى. ولار:

1. لوگيستيكا. نەعۇرلىم الىستان جەتكىزىلسە، باعا سوعۇرلىم جوعارى بولادى.

2. سۇرپى مەن ساپاسى. پاكىستان مەن قىتاي ماندارينىنە قاراعاندا تۇرىك سيترۋسىنىڭ ءدامى تاتىمدى ءارى ەتتى. سالىستىرمالى تۇردە الساق، قىتاي مەن پاكىستاننان جەتكىزىلەتىن ماندارين باعاسى كەلىسىنە 800-900 تەڭگەدەن باستالىپ، 1000 تەڭگەگە دەيىن جەتەدى.

3. باسەكەلەستىك. ءىرى قالالاردا باعا ساۋدا ورىندارى مەن وندا وتكىزىلەتىن اكسيالارعا نەگىزدەلگەن.

ايتا كەتەيىك، Kazinform بۇعان دەيىن ماكارون، نان، كۇرىش، شۇجىق، ىرىمشىك جانە وزگە دە تاعام ءتۇرى قانشا تۇراتىنىن انىقتاپ ءبىلدى.

اۆتور

التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى