قازاقستاندا ماجار ءتىلى وقىتىلادى
استانا. KAZINFORM - ەلوردادا ماجار ءتىلىن وقىتۋ ورىندارىن اشۋ تۋرالى قۇجاتتارعا قول قويىلدى. بۇل تۋرالى ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ءمالىم ەتتى.
بۇگىن ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سييارتو ەلورداعا رەسمي ساپارمەن كەلدى.
مارتەبەلى مەيماندى قازاقستان رەسپۋبليكاسى پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ قارسى الدى.
- قازاق- ماجار قارىم- قاتىناسى تەك سيفرلار مەن كەلىسىمدەردەن عانا تۇرمايدى، ونىڭ قۇندى رۋحاني نەگىزى مادەني- گۋمانيتارلىق بايلانىستا جاتىر. قازىر 1 مىڭعا جۋىق قازاقستاندىق ستۋدەنت ماجارستاندا ءبىلىم الىپ جاتىر جانە جىل سايىن 250 گرانت بولەدى. وسى ورايدا ماجارستان ۇكىمەتىنە العىس بىلدىرەمىز. بۇگىن ديپلوماتيالىق اكادەميالار جانە ماجار ءتىلىن وقىتۋ ورىندارىن اشۋ تۋرالى قۇجاتتارعا قول قويىلۋى ارىپتەستىگىمىزدى كەڭەيتۋدەگى ەلەۋلى قادام، - دەدى مۇرات نۇرتىلەۋ رەسمي كەزدەسۋدەن كەيىن ب ا ق وكىلدەرى الدىندا مالىمدەمە جاساي تۇرىپ.
ودان بولەك، كەزدەسۋ بارىسىندا قازاقستان يادرولىق فيزيكا ينستيتۋتى مەن بۋداپەشتتەگى ەنەرگەتيكالىق زەرتتەۋلەر ورتالىعىمەن بايلانىستى قۇپتاپ، عىلىم سالاسىندا ماڭىزدى جوبالاردى قولعا الۋعا كەلىستى.
- باۋىرلاس حالقىمىز بەن بيزنەستىڭ دامۋىنا مامىر ايىندا اشىلاتىن شىمكەنت- بۋداپەشت تىكەلەي اۋە رەيسى سۇبەلى ۇلەس قوساتىنىنا كامىل سەنەمىن، - دەيدى مينيستر.
ەسكە سالا كەتسەك، بيىل 17-قاڭتاردا قاسىم-جومارت توقايەۆ پەن ماجارستان پرەمەر-ءمينيسترى ۆيكتور وربان ەكىجاقتى كۇن ءتارتىبىنىڭ وزەكتى ماسەلەلەرىن تالقىلاپ، قازاقستان مەن ماجارستان اراسىنداعى ستراتەگيالىق سەرىكتەستىككە وڭ باعا بەردى.
