قازاقستاندا ماجار بانكتەرىنىڭ فيليالى اشىلادى
استانا. KAZINFORM - بىلتىر قازاقستان مەن ماجارستان اراسىنداعى تاۋار اينالىمى %4,4 ارتىپ، 200 ميلليون دوللاردان استى. ەكى ەل اراسىنداعى ەكونوميكالىق بايلانىس تۋرالى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ مالىمدەدى.
- پەتەر سييارتو مىرزامەن ناقتى ءارى ناتيجەلى كەلىسسوزدەر وتكىزىپ، ءبىرقاتار ۋاعدالاستىققا قول جەتكىزدىك. سونىڭ ىشىندە، ەكىجاقتى ساۋدا كولەمىن ۇلعايتۋعا جانە ينۆەستيتسيالىق كووپەراتسيانى دامىتۋعا اسا ءمان بەرىلدى. بىلتىر تاۋار اينالىمى %4,4 ارتىپ، 200 ميلليون دوللاردان استى. كەلەشەكتە بۇل كورسەتكىشتى 1 ميلليارد دوللارعا جەتكىزۋ جوسپاردا بار. 20 جىلدا ەلىمىزدىڭ ەكونوميكاسىنا ماجارستاننان 370 ميلليون دوللاردان استام تىكەلەي ينۆەستيتسيا تارتىلدى، - دەدى مۇرات نۇرتىلەۋ ب ا ق وكىلدەرىنىڭ الدىندا مالىمدەمە جاساي وتىرىپ.
ءمينيستردىڭ مالىمدەۋىنشە، قازىر ەلىمىزدە 700 ميلليون دوللاردى قۇرايتىن 16 ورتاق جوبا جۇزەگە اسىرىلىپ جاتىر.
- بۇگىندە ماجارلىق «MOL» مۇناي-گاز كومپانياسى 200 ميلليون دوللار ينۆەستيتسيا سالىپ، باتىس قازاقستاندا ءىرى گاز كوندەنساتى كەن ورنىن يگەرۋدە. «Globalia» كاسىپورنى كۇن ەنەرگياسىنىڭ ءۇش ستانتسياسىن، ال «UBM» حولدينگى الماتىدا، قاراعاندى جانە قوستاناي وبلىستارىندا جەم شىعاراتىن ءۇش زاۋىتتى ىسكە قوسپاق. وسى جەتىستىكتەرمەن توقتاپ قالماي، ىنتىماقتاستىقتى ودان ءارى ەكپىندى تۇردە جالعاستىرۋ ءۇشىن ماگيسترالدى جاڭا باعىتتاردى دا ايقىندادىق. اتاپ ايتقاندا، قازاقستاندا ماجار بانكتەرىنىڭ فيليالدارىن اشۋ، بۋداپەشتتە مۋلتيمودالدى تەرمينال سالۋ، ماجارستانعا ەكسپورتتالاتىن مۇناي جانە مۇناي ونىمدەرىن ۇلعايتۋ، سونداي-اق ۋران جانە سيرەك كەزدەسەتىن مينەرالداردى يگەرۋ پەرسپەكتيۆاسىنا سەنىمىم مول، - دەدى ول.
ونىڭ ايتۋىنشا، ەكى ەلدىڭ ستراتەگيالىق سەرىكتەستىگى - شىعىس پەن باتىستى جالعاپ، ساۋدا مەن ينۆەستيتسيانىڭ جاڭا كوكجيەكتەرىن اشاتىن التىن كوپىر.
ايتا كەتەيىك، بۇگىن ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سييارتو ەلورداعا رەسمي ساپارمەن كەلدى.
بەلگىلى بولعانداي ماجارستاننىڭ پرەزيدەنتى تاماش شۋيوك جانە پارلامەنت سپيكەرى لاسلو كيەۆەردىڭ قازاقستانعا رەسمي ساپارمەن كەلەدى.
ودان بولەك، ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ تاياۋ شىعىستاعى جاعدايعا الاڭداۋشىلىق تانىتتى.
سونداي-اق مۇرات نۇرتىلەۋ رەسەي مەن ۋكراينا اراسىنداعى قاقتىعىستىڭ وڭايلىقپەن شەشىلمەيتىنىن ايتتى.
