قازاقستاندا لوكوموتيۆتەردىڭ 52 پايىزى توزعان
ق ر كولىك ءمينيسترى مارات قارابايەۆ لوكوموتيۆ پەن جۇك كولىكتەرىن ساتىپ الۋ جۇمىستارى تۋرالى ايتىپ بەردى، دەپ حابارلايدى Kazinform ءتىلشىسى.
قازىرگى ۋاقىتتا، لوكوموتيۆ پاركىنىڭ جالپى سانى - 1880 جانە توزۋ دەڭگەيى - % 52.
«قاجەتتى لوكوموتيۆتەر سانىن قامتاماسىز ەتۋ مەن توزۋ دەڭگەيىن تومەندەتۋ ماقساتىندا بيىل 133 لوكوموتيۆ ساتىپ الىندى. لوكوموتيۆتەردىڭ نەگىزگى وندىرۋشىلەرى - وتاندىق لوكوموتيۆ جانە ەلەكتروۆوز قۇراستىرۋ زاۋىتتارى. تاعى قوسىمشا لوكوموتيۆ ساتىپ الۋ ماسەلەسى پىسىقتالۋدا»، - دەدى م. قارابايەۆ بۇگىنگى ۇكىمەت وتىرىسىندا.
وسىلايشا 2025-جىلعا دەيىن 568 لوكوموتيۆ ساتىپ الۋ جوسپارلانۋدا، بۇل جىلجىمالى قۇرام پاركىندەگى تاپشىلىقتى تولىق جويادى.
«وعان قوسا، ەلىمىزدە 135 مىڭ جۇك ۆاگوندارى بار. نارىقتا 300-دەن اسا وپەراتور جۇمىس ىستەيدى. ونىڭ ىشىندە قازاقستان تەمىر جولىنا 38 مىڭ ۆاگون تيەسىلى، ولار الەۋمەتتىك ماڭىزى بار تاسىمالدارعا، ياعني ەلىمىزدىڭ ەنەرگەتيكالىق سەكتورىنا جانە حالىققا جەتكىزىلەتىن كومىردى تاسىمالداۋعا جۇمىلدىرىلعان. 2025 -جىلعا دەيىن ۇلتتىق وپەراتور قوسىمشا 3 مىڭ اشىق ۆاگون ساتىپ الۋدى جوسپارلاپ وتىر. ونىڭ 275- ءى بيىل پايدالانۋعا بەرىلدى»، - دەپ ءتۇسىندىردى مينيستر.
بۇعان دەيىن مارات قارابايەۆ شەكاراداعى تەمىرجول ينفراقۇرىلىمىنىڭ جاي- كۇيى تۋرالى ايتىپ بەرگەن ەدى.
اۆتور
ايجان سەرىكجان قىزى
