قازاقستاندا ەلەكتروموبيل سانى 12 مىڭنان استى
استانا. KAZINFORM - ق ر كولىك مينيسترلىگى ەلەكتر كولىكتەرىن دامىتۋ جانە ولاردىڭ ينفراقۇرىلىمىن قۇرۋ بويىنشا قانداي مەملەكەتتىك قولداۋ شارالارى قاراستىرىلعانىن ءتۇسىندىردى.
- ستاتيستيكالىق دەرەكتەرگە سايكەس، بۇگىنگى تاڭدا قازاقستاندا ەلەكتر قوزعالتقىشتارى بار 12120 اۆتوكولىك تىركەلگەن. سونداي-اق، قازىرگى ۋاقىتتا ەلىمىزدە 426 ەلەكتر زاريادتاۋ ستانتسياسى بار، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
2024 -جىلعى 18- شىلدەدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىك جانە ەلەكتروموبيلدەرگە ارنالعان ينفراقۇرىلىمدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى. وندا ەلىمىزدە ەلەكتروموبيلدەرگە ارنالعان ينفراقۇرىلىمدى قۇرۋ جانە حالىقتى ەلەكتروموبيلدەرگە كوشۋدى ىنتالاندىرۋ بويىنشا نورمالار ەسكەرىلگەن.
سونداي-اق، ەلىمىزدە ەلەكتروموبيلدەردى دامىتۋ ءۇشىن ءبىرقاتار شارا قابىلداندى:
- ەلەكتروموبيلدەر كادەگە جاراتۋ الىمىنان بوساتىلدى؛
- ەلەكتروموبيلدەر ءۇشىن باستاپقى مەملەكەتتىك تىركەۋ ءۇشىن الىم مولشەرلەمەسى كولىكتىڭ باسقا تۇرلەرىنە قاراعاندا شامامەن 2 ەسە تومەن بەلگىلەنگەن.
- تۇراقتى مارشرۋتتارعا قىزمەت كورسەتۋ قۇقىعىنا كونكۋرستىق ىرىكتەۋدە ەلەكتروبۋستارى بار تاسىمالداۋشىلارعا ارتىقشىلىقتار بەلگىلەنگەن. 2018-2024 -جىلدارى جەڭىلدەتىلگەن ليزينگتىك قارجىلاندىرۋ باعدارلاماسى اياسىندا وڭىرلەرگە 125 ەلەكتروبۋس جەتكىزىلدى.
بىلتىر Kazinform ءتىلشىسى «ەلەكتروموبيلدەر ادام دەنساۋلىعىنا قاۋىپتى مە؟» دەگەن سۇراققا ساراپتاما جاسادى.
سونىمەن قاتار، ەلەكتروموبيلدەردى قۋاتتايتىن ستانسيالار ءىرى كولىك دالىزدەرى بويىندا ورناتىلاتىنى ءمالىم بولدى.
اۆتور
رۋسلان عابباسوۆ
