قازاقستاندا كىمدەر تەگىن جەكە كومەكشى الۋعا قۇقىلى
استانا. KAZINFORM - ەلىمىزدە مۇگەدەكتىگى بار ادامدارعا جەكە كومەكشى قىزمەتىن قارجىلاندىرۋ «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى جەرگىلىكتى اتقارۋشى ورگانداردىڭ قاراجاتى ەسەبىنەن جۇزەگە اسىرىلادى.
ق ر الەۋمەتتىك كودەكسىنىڭ 163-بابىنا سايكەس، جەكە كومەكشىنىڭ قىزمەتىن الۋ قۇقىعى ءجۇرىپ-تۇرۋى قيىن ءبىرىنشى توپتاعى مۇگەدەكتىگى بار ادامدارعا عانا بەرىلەدى. بۇل قىزمەت تۇرعىلىقتى جەرى بويىنشا مەديتسينالىق-الەۋمەتتىك ساراپتاما ازىرلەگەن بەيىمسىزدىك جانە وڭالتۋ جەكە باعدارلاماسى اياسىندا كورسەتىلەدى.
كومەكتى قالاي راسىمدەۋ كەرەك
جەكە كومەكشى قىزمەتىن الۋ ءۇشىن ءوتىنىم بەرۋشى «ازاماتتارعا ارنالعان ۇكىمەت» مەملەكەتتىك كورپوراتسياسىنا نەمەسە تۇرعىلىقتى جەرى بويىنشا ەڭبەكپەن قامتۋ جانە الەۋمەتتىك قورعاۋ باسقارماسىنا جۇگىنۋى قاجەت.
ءبىرىنشى توپتاعى مۇگەدەكتىگى بار ادامنىڭ ءوتىنىمىن، جەكە باسىن كۋالاندىراتىن قۇجاتىن، سونىمەن قاتار مۇگەدەكتىگىن راستايتىن قۇجاتتارى مەن بولعان جاعدايدا بەيىمسىزدىك جانە وڭالتۋ جەكە باعدارلاماسىن ۇسىنۋى قاجەت.
ءوتىنىمدى مۇگەدەكتىگى بار ادامنىڭ ءوزى، سونداي-اق ونىڭ زاڭدى وكىلى نەمەسە سەنىم بىلدىرگەن تۇلعاسى بەرە الادى. ەگەر قۇجاتتار دۇرىس ءارى ۋاقىتى راسىمدەلگەن جاعدايدا ءوتىنىم بەس جۇمىس كۇنى ىشىندە قاراستىرىلادى.
جەكە كومەكشى تاڭداۋ ءۇشىن الەۋمەتتىك قىزمەتتەر پورتالىن پايدالانۋعا بولادى.
كومەك كورسەتۋ مەرزىمدىلىگى مەن شارتتارى
جەكە كومەكشى ءبىرىنشى توپتاعى مۇگەدەكتىگى بار ادامداردىڭ ءجۇرىپ-تۇرۋىنا جانە نىساندارعا بارۋىنا كومەكتەسەدى. قىزمەت قازاقستاننىڭ ازاماتتىق زاڭناماسىنا سايكەس جاسالعان كەلىسىمشارت نەگىزىندە كورسەتىلەدى.
ق ر الەۋمەتتىك كودەكسىنىڭ 163-بابىنا سايكەس، جەكە كومەكشىنىڭ قىزمەتتەرى ءجۇرىپ-تۇرۋى قيىن، ءبىرىنشى توپتاعى مۇگەدەكتىگى بار ادامدارعا ۋاكىلەتتى مەملەكەتتىك ورگان ايقىنداعان تارتىپپەن كۇنىنە سەگىز ساعاتتان اسپايتىن ەسەپپەن ۇسىنىلادى. كومەك كورسەتۋ ءتارتىبى مەن شارتتارىن ءاربىر قىزمەت الۋشىنىڭ قاجەتتىلىگىنە قاراي وكىلەتتى مەملەكەتتىك ورگان رەتتەيدى.
جەتكىزۋشى كەلەسى ءمان-جاي كەزىندە قىزمەت كورسەتۋدەن باس تارتۋعا قۇقىلى:
ۇيىم ەندى قىزمەتتەردى كورسەتپەيدى - جەتكىزۋشىلەر تىزىلىمىنەن الىپ تاستاۋ تۋرالى ءوتىنىم بەرىلگەن
جۇكتەمەگە بايلانىستى بوس ماماندار جوق
الۋشىنىڭ تۇرعىلىقتى جەرىندە قىزمەت كورسەتىلمەيدى
الدىنداعى كومەكشىمەن جانجال - ماماندى بالاعاتتاۋ نەمەسە قورلاۋ (كۋاگەرلەرمەن دالەلدەنگەن)
فورس-ماجور جاعدايى (توتەنشە وقيعا، تابيعي اپات نەمەسە اسكەري ءىس-قيمىل نە وزگە دە جايتتار).
بۇعان دەيىن تەگىن مەديتسينالىق كومەكتىڭ كەپىلدىك بەرىلگەن كولەمى (ت م ك ك ك) اياسىندا ەل ازاماتتارىنا، قانداستارعا جانە تۇرۋعا ىقتيار حاتى بار شەتەلدىكتەرگە وتا تەگىن جاسالاتىنىن جازعان ەدىك.
