قازاقستاندا كىمدەرگە پلاستيكالىق وتا تەگىن جاسالادى
پەتروپاۆل. KAZINFORM - تەگىن مەديتسينالىق كومەكتىڭ كەپىلدىك بەرىلگەن كولەمى (ت م ك ك ك) اياسىندا ەل ازاماتتارىنىڭ بەلگىلى ءبىر ساناتىنا پلاستيكالىق وتا تەگىن جاسالادى.
«الەۋمەتتىك مەديتسينالىق ساقتاندىرۋ قورى» ك ە ا ق سولتۇستىك قازاقستان وبلىسى بويىنشا فيليالىنىڭ مالىمەتىنشە، سىرقاتقا اعزاسىنىڭ جوعالعان فۋنكتسيالارىن قالپىنا كەلتىرۋ، ءومىر ءسۇرۋ ساپاسىن جاقسارتۋ جانە ەڭبەككە قابىلەتتىلىگىن قايتارۋ ماقساتىندا رەكونسترۋكتيۆتى پلاستيكالىق وتا ءمامس اياسىندا جۇرگىزىلەدى. مىسالى، ول كۇيىپ قالعان تەرى پلاستيكاسى، ونكولوگيالىق اۋرۋلاردان كەيىنگى قالپىنا كەلتىرۋ نەمەسە بالالاردىڭ بەتىندەگى تۋا بىتكەن اقاۋلاردى تۇزەتۋ وتاسى بولۋى مۇمكىن.
پلاستيكالىق جانە رەكونسترۋكتيۆتى حيرۋرگيا - ءارتۇرلى حيرۋرگيالىق پروتسەدۋرالار جۇرگىزىلەتىن مەديتسينا سالاسى.
پلاستيكالىق حيرۋرگيا:
قول حيرۋرگياسى: قول جاراقاتتارى، سىنىقتار، جۇيكە زاقىمدانۋى سياقتى قول پروبلەمالارىن ەمدەۋ
كۇيىك حيرۋرگياسى: كۇيىكتەردى ەمدەۋ
جۇمساق تىندەردىڭ حيرۋرگياسى: تەرىنى ترانسپلانتاتسيالاۋ، ىسىكتەردى جويۋ سياقتى جۇمساق تىندەرگە حيرۋرگيالىق ارالاسۋ
تراۆماتولوگيالىق حيرۋرگيا: جازاتايىم وقيعالاردان تۋىنداعان جاراقاتتاردى ەمدەۋ.
رەكونسترۋكتيۆتى حيرۋرگيا:
ءسۇت بەزىن قالپىنا كەلتىرۋ: ءسۇت بەزى قاتەرلى ىسىگىنەن كەيىن جاسالاتىن ءسۇت بەزىن قالپىنا كەلتىرۋ پروتسەدۋرالارى
بەتتى قالپىنا كەلتىرۋ: بەتتەگى ىسىكتەردى الىپ تاستاعاننان كەيىن بەت ءپىشىنىن وزگەرتۋ
ءتۋابىتتى اۋىتقۋلاردى تۇزەتۋ: تۋا بىتكەن دەفورماتسيالاردى تۇزەتۋ
جاراقاتتان كەيىنگى قالپىنا كەلتىرۋ: جازاتايىم وقيعالاردان نەمەسە باسقا جاراقاتتان كەيىن پايدا بولعان تىندەردىڭ جوعالۋىن قالپىنا كەلتىرۋ.
ت م ك ك ك اياسىندا جانە (نەمەسە) م ءا م س جۇيەسىندە مامانداندىرىلعان مەديتسينالىق كومەك امبۋلاتوريالىق جاعدايلاردا ءوتىنىش بەرۋ سەبەپتەرىنە قاراي جانە مامانداردىڭ جولداماسى بويىنشا جوسپارلى تارتىپپەن كورسەتىلەدى.
ەستەتيكالىق كوسمەتولوگيالىق وپەراتسيالار - بلەفاروپلاستيكا، رينوپلاستيكا، كەۋدەنى كوتەرۋ جانە باسقالارى تەگىن جاسالاتىن وتا تىزىمىنە ەنبەگەن.
بۇعان دەيىن قازاقستاندا تەگىن وتا كىمدەرگە جاسالاتىنىن، كىمدەر ءتىسىن تەگىن ەمدەتە الاتىنىن جازدىق.
