قازاقستاندا جىلىنا 25 مىڭعا جۋىق نارەستە شالا تۋادى
جىل سايىن الەمدە 15 ميلليون ءسابي، ال قازاقستاندا 25 مىڭعا جۋىق نارەستە شالا تۋادى. مۇنداي ستاتيستيكانى الماتىداعى پەدياتريا جانە بالالار حيرۋرگياسى عىلىمي ورتالىعىندا وتكەن جيىندا دارىگەرلەر ءمالىم ەتتى، دەپ حابارلادى Kazinform.
17- قاراشا - حالىقارالىق شالا تۋعان نارەستەلەر كۇنى. قازاقستاندا بۇل كۇن 2013-جىلدان بەرى اتاپ ءوتىپ كەلەدى. ماقسات - شالا تۋعان نارەستەلەر ماسەلەلەرىنە قوعامنىڭ نازارىن اۋدارۋ، اتا-انالارعا قولداۋ كورسەتۋ، ەرتە بوسانىپ قالۋدىڭ قاۋىپتىلىگى مەن سالدارى، سونداي-اق الدىن الۋ جانە جۇكتىلىكتىڭ تولىق مەرزىمىن ساقتاۋ قاجەتتىلىگى تۋرالى اقپاراتتاندىرۋ.
پەدياتريا ورتالىعىنىڭ نەوناتولوگيا جانە جاڭا تۋعان نارەستەلەردىڭ حيرۋرگيا ءبولىمىنىڭ مەڭگەرۋشىسى ايجان بايعۇتتيەۆانىڭ ايتۋىنشا، الەمدە جىلىنا 15 ميلليون نارەستە مەرزىمىنەن بۇرىن دۇنيەگە كەلەدى. ال، ءبىزدىڭ ەلدە جىل سايىن 25 مىڭعا جۋىق ءسابي شالا تۋادى.
«جىل سايىن بولىمدە ءارتۇرلى پاتولوگيامەن رەسپۋبليكانىڭ ءار وڭىرىنەن 400 گە جۋىق نارەستە ەمدەلەدى. ولاردىڭ 80 پايىزىنىڭ سالماعى 700-2500 گرامعا دەيىن. جۇكتىلىكتىڭ 25-35 اپتالىعىنا تۋعان سابيلەر. مەديتسينا ماماندارى 2022-جىلى ءتۇرلى پاتولوگيامەن دۇنيەگە كەلگەن 300 دەن اسا ءسابيدى اجال اۋزىنان امان الىپ قالسا، بيىل جىل باسىنان بەرى 350 گە جۋىق شاقالاقتى كۇتىپ باپتادى. ءبولىم 20 توسەك ورىنعا ارنالعان. دەنە سالماعى 1000 گرام عانا بولاتىن شالا تۋعان نارەستەلەردىڭ ءومىر ءسۇرۋ دەڭگەيى ايتارلىقتاي ءوستى. شالا تۋعان نارەستەلەردىڭ ءولىم-ءجىتىمى 3-4 ەسەگە تومەندەدى»، - دەدى پەدياتريا ورتالىعىنىڭ نەوناتولوگيا جانە جاڭا تۋعان نارەستەلەردىڭ حيرۋرگيا ءبولىمىنىڭ مەڭگەرۋشىسى ايجان بايعۇتتيەۆا.
ايتۋىنشا، بولىمدە نەوناتولوگتار، نەوناتالدى حيرۋرگتەر جانە وفتالمو-حيرۋرگتار جۇمىس ىستەيدى.
«بارشاعا ايان، شاقالارداردى كۇتىپ-باعۋ ۇلكەن كۇش پەن قايراتتى، توزىمدىلىك پەن شىدامدىلىقتى تالاپ ەتەدى. بۇل تاراپتا ەرەكشە ۇقىپتى كۇتىم، جوعارى تەحنولوگيالىق قۇرالداردى قولدانا وتىرىپ ساپالى ەمدەۋ، ۇزاق باقىلاۋدى تالاپ ەتەتىن نەوناتولوگ دارىگەرلەرىنىڭ، نەوناتالدى حيرۋرگتار مەن مەيىربيكەلەردىڭ ەڭبەگى ەرەن. ماماندار اتا-انانىڭ پسيحولوگيالىق دايىندىعى دا شالا تۋعان نارەستەنى ءساتتى كۇتۋدە ۇلكەن ءرول اتقارادى»، - دەيدى ول.
