قازاقستاندا جۇمىرتقا باعاسى 11 پايىزعا قىمباتتادى
استانا. قازاقپارات - ەلىمىزدە جۇمىرتقا 11 پايىزعا قىمباتتادى. ەڭ قىمبات جۇمىرتقا اقتوبە، اقتاۋ، پاۆلودار، شىمكەنت پەن قاراعاندى قالالارىندا ساتىلىپ جاتىر، دەپ حابارلايدى KTK تەلەارناسى.
قىركۇيەكتىڭ سوڭعى اپتاسىندا باعانىڭ كۇرت كوتەرىلگەنىن تۇتىنۋشىلار دا بايقاعان. ۇلتتىق ستاتيستيكا بيۋروسىنىڭ مالىمەتىنشە، الەۋمەتتىك ماڭىزى بار ازىق-تۇلىكتىڭ بۇل ءتۇرى، اسىرەسە اقتوبە قالاسىندا قىمبات.
الماتىداعى ەڭ ءىرى سۋپەرماركەتتە جۇمىرتقانىڭ نەشە ءتۇرى بار. ون داناسىنىڭ باعاسى 629 تەڭگەدەن باستالىپ، 945 تەڭگەگە دەيىن. ماسەلەن، سۇرپى مەن سالماعى ۇلكەن ءتۇرىنىڭ باعاسى دا 975 تەڭگە. قازىردىڭ وزىندە جۇمىرتقانىڭ ءبىر داناسىنىڭ باعاسى 50 تەڭگەدەن اسىپ تۇسكەن.
ۇلتتىق ستاتيستيكا بيۋروسى ساراپشىلارى سوڭعى ءبىر ايدا ەلىمىزدە جۇمىرتقا قۇنىنىڭ ورتاشا ەسەپپەن 11,6 پايىزعا وسكەنىن ايتادى. ەڭ قىمبات جۇمىرتقا اقتوبە، اقتاۋ، پاۆلودار، شىمكەنت پەن قاراعاندى قالالارىندا ساتىلىپ جاتىر.
«ۇلتتىق ستاتيستيكا بيۋروسى الەۋمەتتىك ماڭىزى بار ازىق-تۇلىك تاۋارىنىڭ تىزبەسىنە كىرەتىن ءبىرىنشى ساناتتاعى جۇمىرتقالاردى عانا تىركەيدى. جۇمىرتقا باعاسى ورتاشا ەسەپپەن 11,6 پايىزعا وسكەن. اقتوبەدە 29,3 پايىز، پاۆلوداردا 20,9 پايىز، شىمكەنتتە 20,6 پايىز، اقتاۋدا 19,6 پايىز، قاراعاندىدا 19,5 پايىز وسكەنى تىركەلدى. باعاسى تومەنى: قونايەۆ، استانا، وسكەمەن»، - دەيدى تۇتىنۋ باعالارى ستاتيستيكاسى باسقارماسىنىڭ ساراپشىسى تاڭشولپان كەرەيەۆا.
قازىر ەلىمىزدە 58 قۇس فابريكاسى جۇمىس ىستەپ تۇر. ونىڭ ىشىندە 29 فابريكا جۇمىرتقا وندىرەدى. ماماندار باعانىڭ كۇرت ءوسۋىن بيىلعى ساپاسىز جيىن-تەرىن ناۋقانىمەن بايلانىستىرادى. وعان قوسا، دەلدالدار دا باعاسىنىڭ ۇستىنە ءوز پايىزىن قوسۋى مۇمكىن.
«جۇمىرتقا مەن قۇس ەتى قۇنىنىڭ 70 پايىزى جەمگە كەتەدى. بيىل جاقسى ەگىن جيناعانىمىزبەن، استىقتىڭ كوبى ساپاسىز بولدى. سوندىقتان رەسەيدەن جوعارى ساپالى جەم ساتىپ الدىق. قۇس فابريكالارى ساۋدا مينيسترلىگىمەن كەلىسىلگەن مەموراندۋمدى ۇستانادى. ولار 50 تەڭگەدەن جوعارى باعا قويمايدى. ءبىز بار بولعانى 40 تەڭگەدەن ساتامىز. ونىڭ ۇستىنە دەلدالدار 15 پايىز، ساۋداگەرلەر تاعى 15 پايىز قوسادى. مۇنداي جاعداي تەك قازاقستاندا عانا ەمەس، سونداي- اق رەسەيدە، قىرعىزستاندا، بەلارۋستە تە بار»، - دەيدى قازاقستان قۇس وسىرۋشىلەر وداعانىڭ پرەزيدەنتى رۋسلان ءشارىپوۆ.
