قازاقستاندا جەكە كلينيكالارعا تالاپتار كۇشەيتىلمەك

«بىرىنشىدەن، سيفرلاندىرۋ دامىپ كەلەدى. ارينە، ءبىز مۇنى ءبىر جىلدا ىسكە اسىرا المايمىز. بۇل باعىتتا اۋقىمدى جۇمىس بار. قازاقستانداعى مەديتسينا سالاسىندا سيفرلاندىرۋ جاقسى دامىپ وتىر. قازىر تۇرعىنداردى تىركەۋگە ارنالعان قوسىمشا جاساقتالعان، سونداي-اق ادامدار الدىن الا جازىلىپ، اناليزدەرىن الىپ، دارىگەرگە حابارلاسا الادى. ەكىنشىسى - ينفراقۇرىلىم. ماسەلەن، كەيىنگى 30-40 جىل ىشىندە نەگىزىنەن مەگاپوليستەردە كەزەك پايدا بولدى، ياعني ءىرى قالالىق ەمحانالار سۇرانىسقا سايكەس سالىنبادى. ءوزىنىڭ مۇمكىندىگىنە قاراي استاناداعى ءبىر ەمحانا 60 مىڭ ادامعا قىزمەت كورسەتۋى كەرەك. ال شىن مانىندە 80-90 مىڭدى قامتىپ وتىر»، - دەدى ا. عينيات پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، ەمحانالاردىڭ ازدىعى ۇزىن-سونار كەزەككە الىپ كەلەدى.

«بۇل ءوز كەزەگىندە دارىگەرگە جانە حالىقتىڭ سانىنا ەسەپتەلمەگەن ينفراقۇرىلىمعا قوسىمشا جۇكتەمە. سوندىقتان مىندەتتى الەۋمەتتىك مەديتسينالىق ساقتاندىرۋ اياسىندا جەكە كلينيكالارعا مەملەكەتتىك تاپسىرىس بەرۋ تۋرالى شەشىم قابىلداندى. كەلىسىمشارت مىندەتتەمەلەرىن ناقتى ورىندايتىن جەكە كلينيكالار بار، سونداي-اق قىزمەتتەرىنىڭ 80 پايىزىن اۋتسورسينگكە بەرەتىن ەمحانالار دا كەزدەسەدى. وسىنىڭ سالدارىنان كەيبىر تۇرعىندار دارىگەرگە قارالۋ ءۇشىن قالانىڭ تۇكپىر-تۇكپىرىنە بارۋعا ءماجبۇر. بۇعان جول بەرمەۋ تۇرعىسىندا تالاپتاردى كۇشەيتپەكپىز. مەديتسينالىق كومەكتىڭ ساپاسىن تالاپ ەتەمىز»، - دەدى مينيستر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى