قازاقستاندا جازاسىن وتەپ جاتقان 12 مىڭعا جۋىق ادام جۇمىسپەن قامتىلدى
استانا. KAZINFORM - بۇل تۋرالى پەنيتەنتسيارلىق جۇيە تۋرالى وزەكتى ماسەلەلەر بويىنشا جولدانعان دەپۋتاتتىق ساۋالدارعا جاۋاپ بەرگەن ولجاس بەكتەنوۆتىڭ جاۋابىندا ايتىلعان.
- باس بوستاندىعىنان ايىرۋ ورىندارىنداعى ەڭبەك سوتتالعانداردى تۇزەتۋ مەن الەۋمەتتىك ورتاعا بەيىمدەۋدىڭ باستى قۇرالى بولىپ قالىپ وتىر. جۇمىسپەن قامتىلعان سوتتالعانداردىڭ ءتارتىپ بۇزۋ جاعدايلارى وتە سيرەك كەزدەسەدى. بۇل ءوز كەزەگىندە باس بوستاندىعىنان ايىرۋ ورىندارىنداعى تۇراقتىلىقتى قامتاماسىز ەتۋگە ىقپال ەتەدى. سونداي-اق ەڭبەكپەن تابىلعان تابىس سوت شىعىندارى مەن اليمەنتتەردى جانە وزگە دە مىندەتتەمەلەردى تولەۋگە مۇمكىندىك بەرەدى.
بۇگىنگى تاڭدا قىلمىستىق اتقارۋ جۇيەسى مەكەمەلەرىندەگى ەڭبەككە جارامدى 22 مىڭ ادامنىڭ 12 مىڭعا جۋىعى جۇمىسپەن قامتىلدى، - دەلىنگەن ق ر پرەمەر-ءمينيسترىنىڭ جاۋابىندا.
قىلمىستىق اتقارۋ جۇيەسىندە باستى جۇمىس بەرۋشى «ەڭبەك» ر م ك-سى بولىپ تابىلادى. اتالمىش مەكەمە:
جەڭىل ونەركاسىپ؛
قۇرىلىس-مونتاجداۋ جۇمىستارى؛
كۇزەت قىزمەتىنىڭ ينجەنەرلىك-تەحنيكالىق قۇرالدارىن مونتاجداۋ، جوندەۋ؛
بەينەباقىلاۋ جۇيەسى، كوممۋنالدىق قىزمەتتەر؛ تاماقتاندىرۋدى ۇيىمداستىرۋ؛
اۋىل شارۋاشىلىعى ونىمدەرىن ءوندىرۋ سياقتى جۇمىستاردى جۇزەگە اسىرادى.
پاۆلودارداعى كولونيادا حالال سابىن جانە سپورت كيىمدەرى وندىرىلە باستاعانى تۋرالى جازدىق.
