قازاقستاندا جالعا بەرىلگەن پاتەرلەر جەكەشەلەندىرىلەدى
بۇگىندە ەلىمىزدە جالعا بەرىلگەن پاتەرلەردى جەكەشەلەندىرۋدى قاراستىرىپ جاتىرمىز. بۇل تۋرالى ونەركاسىپ جانە قۇرىلىس ءمينيسترى قانات شارلاپايەۆ ايتتى.
ءماجىلىستىڭ جالپى وتىرىسىندا دەپۋتاتتار «قازاقستاننىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلدادى.
مينيستر بۇل زاڭ جوباسى اياسىندا جالعا بەرىلگەن پاتەرلەردى جەكەشەلەندىرۋ ماسەلەسى قارالىپ جاتقانىن اتاپ ءوتتى.
«ءبىز اكىمدىكتەن پاتەردى جالعا العان ادامدارعا باسپانانى ساتىپ الۋ قۇقىعىن بەرۋ اقىلعا قونىمدى شارا دەپ ويلايمىز. وكىنىشكە قاراي، پاتەرلەردى جالعا بەرۋ ۇزاققا سوزىلىپ كەتتى. ادامدار بۇل پاتەرلەردەن كوشپەيدى. سەبەبى، بۇل - الەۋمەتتىك وسال توپتار. ولاردىڭ جەكە پاتەر الۋعا مۇمكىندىگى جوق.
ءبىز پاتەردە تۇرۋ ۋاقىتىن ەسكەرىپ، ساتىپ الۋ ەرەجەسىن قاراستىرىپ جاتىرمىز. قازىر بۇل ماسەلە تالقىلانۋدا. مىسالى، ءبىز «ەگەر ادام پاتەردە 5 جىل تۇرسا، باسپانا ساتىپ الۋعا قۇقىعى بار» دەپ قاراستىرىپ جاتىرمىز»، - دەدى قانات شارلاپايەۆ ءماجىلىس كۋلۋارىندا.
ونىڭ ايتۋىنشا، جالعا بەرىلگەن پاتەرلەردىڭ نەشە تەڭگەگە ساتىلاتىنى الداعى ۋاقىتتا بەلگىلى بولادى.
«پاتەردىڭ باعاسى دا ماڭىزدى ەلەمەنت بولىپ سانالادى. ولاردىڭ پاتەردى نارىقتاعى باعامەن ساتىپ الا المايتىنى تۇسىنىكتى. سوندىقتان قازىر بالانستىق قۇنى بويىنشا ساتىپ الۋعا مۇمكىندىك بەرۋ تۋرالى پىكىرتالاس ءجۇرىپ جاتىر»، - دەدى مينيستر.
قانات شارلاپايەۆ بۇل باسپانالاردى جەكەشەلەندىرۋ ماڭىزدى دەپ سانايدى.
«مۇندا ادامدار جالعا بەرىلگەن ۇيلەردە تۇرىپ جاتىر. ءسىز پاتەر يەسى مەن جالعا بەرىلگەن ادامنىڭ ۇيگە قالاي قارايتىنىن بىلەسىز. مۇنى ەسكەرىپ، ءبىز جالعا بەرىلەتىن تۇرعىن ۇيگە جەكە مەنشىك قۇقىعىن بەرۋدى وتە ماڭىزدى دەپ سانايمىز»، - دەدى ول.
ەسكە سالايىق، بۇعان دەيىن يندۋستريا جانە ينفراقۇرىلىمدىق دامۋ ءمينيسترى مارات قارابايەۆ قازاقستاندا جالعا بەرىلگەن 36 مىڭ پاتەر بارىن، ولاردىڭ توزىپ جاتقانىن ايتقان ەدى.
